ZABURA 69:4-24

⁴Gbɛ̃ kũ ò zã̀magu pãnↄn dasi de ma mìkãla. Ma ibɛrɛnↄn lɛ́ vĩro, ò ye ò ma dɛ pↄ́ke wíńnɛ sari. Pↄ́ kũ mádi a kpãni oron ò pì mà kpáḿma.

⁵Luda, ń ma yↄ̃nkↄyãnↄ dↄ̃, ma taarinↄn utɛnannɛro.

⁶Dikiri Luda Zĩ̀karide, gbɛ̃ kũ ń wɛ́ dↄnyĩnↄ ǹsun tó wé'i ń kũ ma yãiro. Isarailanↄ Luda, gbɛ̃ kũ òdi n ki wɛtɛnↄ ǹsun tó ń tↄ́ yaka ma yãiro.

⁷Zaakũ n yãin matɛn sↄ̃sↄ̃na fↄ̃, akũ ma gasuu gↄ̃̀ kpá ma wɛ́i.

⁸Ma gↄ̃ zĩ̀tↄ ũ ma gbɛ̃nↄ tɛ́, ma gↄ̃ boado ũ ma da bedenↄ tɛ́.

⁹N ↄn yã ma kũ gbãna manamana, gbɛ̃nↄ dↄkɛna kũnwo gↄ̃̀mɛnɛ.

¹⁰Tó ma lɛ́ yĩ̀ pↄsira gũn, òdigↄ̃ ma sↄ̃sↄ̃.

¹¹Tó ma uta kasanↄ fĩ̀fĩma, òdigↄ̃ ma lalandi kɛ.

¹²Gbɛ̃ kũ ò vutɛna gãnulɛanↄ dì ma pi, ígbãnamirinↄ dì lɛ̀ da ma yãi.

¹³Ama tó à gↄ̃̀ ma yãi, Dikiri, mↄkↄ̃n manigↄ̃ wɛ́ kɛmma a gↄrↄa. Ǹ wema Luda n gbɛ̃kɛ zↄ̃kↄ̃ yãi, ǹ ma sura ba yãpura.

¹⁴Ǹ ma bo fokon, ǹsun tó mà vlɛ̃nlo. Ǹ ma bo í lòkoton, ǹ ma sí ma zãngurinↄa.

¹⁵Ǹsun tó ísↄ̃ damalaro, ǹsun tó mà kpátɛ í lòkotonlo, ǹsun tó wɛ̀ɛ tatamalɛro.

¹⁶Ǹ wema Dikiri, zaakũ n gbɛ̃kɛ mana, ǹ arɛ dↄma n sùru zↄ̃kↄ̃ↄ gũn.

¹⁷Ǹsun mìkpɛrɛ zu n zↄ̀bleriinɛro, ǹ wema likalika, zaakũ ma gↄ̃ kagura gũmmɛ.

¹⁸Ǹ namai ǹ ma mì sí, ǹ ma sura ba ma ibɛrɛnↄa.

¹⁹Ń ma sↄ̃sↄ̃na dↄ̃ kũ ma wé'idammanaao kũ ma kpebonaao, ntɛn gbɛ̃ kũ ò ma kũna kũ yãonↄ e.

²⁰Sↄ̃sↄ̃naa ma swɛ̃̀ɛ zↄ̃̀, ma gↄ̃ gbãna sari, gbɛ̃ kũ ani ma wɛ̃nda gwan ma wɛ̀tɛ, mádi lero, gbɛ̃ kũ ani ma nɛ̀sɛ kpátɛmɛnɛn ma wɛ́ dↄ̀i, à kunlo.

²¹Ò ɛzɛ vãni kàmɛnɛ pↄ́blen, kũ ími ma kũ, ò sèwɛ̃ kpã̀kpãa kpàma mà mi.

²²Ń dikpɛkɛna gↄ̃ńnɛ tankutɛ ũ à ń kũ à yã lúńnɛ.

²³Ń wɛ́ sira kũ de òsun gu ero, ń wó gↄ̃ kokona.

²⁴Ǹ n pɛ̃tɛ̃ kipaḿma, ǹ n pↄfɛ̃ pãsĩ pisiḿma.