Miti Mânec 45:3-14

³Qac momori, go ʒika sâqege becsahachec ombâŋgao jomac, eri qaraweŋ ɋuŋɋasaŋgehec go!

⁴Ʒai ʒonʒoŋgehec ʒikare keretacko ɋicwânʒâŋ jaha rac! Ʒâziriŋ dâŋ dopeckezemec, tiŋne juju ŋezickezemec! Mefâregezi wiac hâhâwicne bâfuame honezemec.

⁵Tepe motecge mictara, râsifâcge buhândâŋ‐jeŋicko kizejec, ŋicne ŋicne maigao rândiŋkerâ jopazejec.

⁶Ŋicwofuŋ ŋeŋege Anuturaonec, ŋeŋe sanaŋ ŋeocmu, ŋicwofuŋ gunuge i bâbâtiŋ gunu.

⁷Go tiŋne jauŋkehuc sindaŋ qaisockeekic. Irec Anutu, gore Anutu hâcne, eki wokemaŋ rua‐garewec, ʒerire wokemaŋ i âgofâcge ruaeŋgopieŋ irec sâc jâurukac,

⁸Ŋaqigere âsu mumundoŋ i ʒineŋ saŋkarac â tokic âsu; erificge i elefaŋte micsieczi bakicne, maŋnao musi bapie mana aŋac eekic.

⁹Kiŋaŋ narufâcge jaŋere guruo ŋicwofuŋ gâcne jaŋere otâfâc wâc juŋgopieŋ, mefâregao ŋonâŋge Ofiri mâreŋkonec gol qonaŋke domakac.

¹⁰Otâ‐mae manac, ʒâŋe fitec wareme hazec râec: Mame sâkofâcge â mamacgere ficte nikecguzejec.

¹¹Ŋicwofuŋ e hawari biaŋgere ecneocmu, erâ e kâcɋenege jukacte dapecnezemec.

¹²Tiro hae rune jaŋe taha barâ fisiniŋmu, mafa sâkoheczi âgo bacguniŋte wiac amecke wareniŋmu.

¹³Ficmaŋko ŋicwofuŋte otâ erickekicne ŋekac, ŋaqi‐ticne golzi basarickekicne.

¹⁴Ŋaqi qâreŋ biaŋ rojuha ŋicwofuŋtao jowa wareŋgopieŋ, naru ʒeŋoŋ âgofâc‐ticne eraoa jowac‐jopa fisiŋgopieŋ.