A Umana Kakailai 45:3-14

³Una vi pit, ma ra pakat na vinarubu na taba ta ra papar a rakam, u a rangrang na luluai, Una vi pit ma kaum minamar ma ra ngala na dekdekim.

⁴Ma una ongor ma ra nivut ta ra ngala na dekdekim Ure ra dovot na papalum, ure diat i madu ra bala i diat ma ure ra mangamangana takodo; Ma ra limam tuna na tovo u ta ra lavur magit ba di burut na kaia tana.

⁵Kaum umana pu dia lamia, A tarai dia bura ta ra vavai na kaum; A umana pu dia tar go ra bala i ra umana ebar kai ra king.

⁶God, kaum kiki na king i tur tukum, Kaum buka na king, a buka na varkurai i takodo.

⁷U tar mainge ra mangamangana takodo, ma u tar milikuane ra varpiam; Kari God, kaum God, i tar ku u Ma ra dangi na gugu, upi una lia me ta vavat ma ra umana talaim.

⁸Kaum lavur mal dia ang na katkat ma ra bira na davai, ra alo ma ra kasia. A umana pagol dia tar vagugu u ta ra umana kuba i ra king, nina di mar ia ma ra loko na elepant.

⁹Ta umana vaden, a umana natu i ra umana king, dia ki varurung ma kaum lavur tadar na vavina; Kaum taulai i tur ta ra papar a limam tuna, ma i mong ma ra goled maro ta ra gunan Opir.

¹⁰Ea, u a inip na vavina, una nuk pa ia, ma una valongore; Una nuk vue ra umana niurum ma diat ta ra kuba i tamam;

¹¹Damana ra king na manane ra vakak na matam; Tago ia iat kaum luluai, ma una tul tar ra variru tana.

¹²Ma natu i Tiro, a vavina, na kap vartabar, Maia, ra umana uviana ta ra tarai diat a lul upi una mari diat.

¹³Natu i ra king, a vavina, i ki ra bala na pal na king ma i mamar na kaia; Kana mal di ga vir maravut ia ma ra goled.

¹⁴Ba di ben pa ia tadav ra king na mal ma ra mal na minong, A umana inip na vavina, nina dia talaina me, dia mur ia, Ma da agur pa diat piram.