Pisalem 45:3-14

³Meenei di king maaloo, nnoodia dau hulumanu dauwa gi doo gaba. Goe e honu i nia maaloo ge madamada huoloo!

⁴Hanadu goe i lodo nia madamada o doo aali, e abaaba nia mee ala e donu ge humalia! Oo mahi gaa hai goe gi aali.

⁵Au amu maalei le e gaa, nia maa ga daalo nia hadu manawa o hagadaumee. Nia henua llauehe gaa pala gi lala i mua oo wae.

⁶Teenua king dela ne gowadu go God gi di goe le e waalooloo gaa hana hua beelaa dono hagaodi ai. Goe e dagi au daangada gi di tonu.

⁷Goe e aloho di mee dela e donu, ge e hagadugina nia mee ala e huaidu. Deelaa di mee a God, go doo God, ne hidi ai ga hilihili goe, ga llingi iha gi oo nua di tene dela koia e damana i di tene o nia king ala i golo.

⁸Oo gahu e kala gi nia lolo kala ‘myrrh’ mono lolo kala ‘aloe’. Digau daahili e hai nadau katangi i lodo doo hale dela guu humu gi nia ‘ivory’.

⁹Madalia nia ahina hagalabagau o doo hale la go nia dama ahina o nia king, gei i di baahi gau donu o do lohongo king e duu ai di queen dela e humu gi nia goolo ala koia e humalia.

¹⁰Meenei tama ahina hagababa di king, hagalongo gi dagu helekai dela gaa hai: Haga de langahia ina au daangada mo oo gau.

¹¹Do madanga gaa hai di king gi hiihai adu. Mee di tagi ni oou, goe gi hagalongo gi mee.

¹²Digau Tyre ga gowaga nadau wanga dehuia gi di goe. Digau maluagina ga hagamada belee hai goe gi hiihai ang gi ginaadou.

¹³Tama ahina hagababa di king la i lodo di hale king, mee e madanga huoloo! Di gahu o maa la ne hai gi nia deleedu goolo.

¹⁴Di madagoaa a mee ne laagei gi nia gahu madamada, gei mee guu lahi gi baahi di king, e hula e dagi ginaadou mo nia dama ahina madammaa, digaula e laha mai labelaa gi di king.