Miti Mânec 146:2-10

²No jufehuc jupemu sâc Wofuŋ muteŋkezepac, juju fonareocmu sâc Anutu‐nane ʒeri gae hecnezepac.

³Ŋoŋe ŋicbomboŋ jaŋerao mi roweckenʒepieŋ, mâreŋŋic jaŋe bafic‐nâponiŋte tâpiri mi fojarekac.

⁴Nokafe‐jeŋic qândâŋkeme wândocko risieniŋmu, eme ʒoaŋ ijaha dâŋ birickembiŋ i omaeocmu.

⁵Moc e Jakobore Anutuzi babafic‐ticne ekac, â Wofuŋ Anutu‐ticne worickehuc juekac, ŋic iŋucnezi sâcne juhâmoocmu.

⁶Wofuŋ eki hâcne sambâŋ mâreŋ bâfuac‐jofawec, erâ hâwecmaŋko wiac fokac i bâfua‐fârewec, erâ hec hetikic tâmiric siocmâc juekac.

⁷Eki ro waha âte ejarekicne ŋezic‐jopaekac, â tac qararacne nânâ bâfua‐jareekac; Wofuŋzi niŋgiŋ‐jopakicne firuec‐jopaekac.

⁸Wofuŋ e ʒâŋe tiŋtuŋ ʒâŋe fifi bacjopaekac, Wofuŋ e badapec‐jopakicne bafaharec‐jopaekac, Wofuŋ e tiŋne juju maŋjauŋ ejareekac.

⁹Wofuŋ e ŋic jabane hone soŋaŋ ejareekac, â hozec bekâ dope hutuŋ ejareekac; ŋic sindaŋne mamana biri‐jeŋic ine hesifuckeekac.

¹⁰Wofuŋ e guriŋ bapa gie bahuc juocmu sanaŋ; Zioŋ gore Anutu e mimiŋzi ɋâric iŋuc erahuc juocmu. Wofuŋ muteŋkeniŋ!