Kölfel 146:2-10

²Üpwe mwareiti ewe Samol mi Lapalap lon unusen manauei. Üpwe kölün mwareiti ai Kot lupwen fansoun ai manau.

³Ousap anomu ämi apilükülük won ekewe samol ika won eman aramas, pun resap tongeni amanaua eman.

⁴Lupwen ra mäla, ra liwiniti pwül. Lon ewe chök rän ar kewe akot meinisin ra tala.

⁵A feiöch ewe aramas a eäni än Jakop we Kot soualilis, a anomu an apilükülük won ewe Samol mi Lapalap an we Kot,

⁶ewe mi föri läng me fanüfan, pwal ewe matau me meinisin mine a nom lor. Ewe Samol mi Lapalap a allükülük tori feilfeilachök,

⁷a eäni pwüng ngeni ekewe mi riaföü ren aramas o amongöni ekewe mi echik. Ewe Samol mi Lapalap a angasala ekewe chon fötek,

⁸a aneloi mesen ekewe mi chun. Ewe Samol mi Lapalap a awenätä sökürün chokewe mi pworotiu o echeni ekewe chon pwüng.

⁹Ewe Samol mi Lapalap a tümwünü ekewe chon ekis, a alisi ekewe fefin mi mä pwülüer me ekewe mi mäsen, nge a atai mine ekewe aramasangau ra akota.

¹⁰Ewe Samol mi Lapalap epwe nemenem tori feilfeilachök. Chon Sion, ämi we Kot epwe nemenem won ekewe täppin aramas meinisin. Ousipwe mwareiti ewe Samol mi Lapalap.