Menge Ininang 11:2-13

²Peglikò i Pedro doton te Jerusalem, simila se menge Judiyo egtoladà te keilangan tomolò se kedita te otaw nemenal ki Cristo te menge punù ingkeliwat i Moises, kagi dan,

³“Medaet se ininang no, so mig-ogpà ka ekon doton te otaw kenà Judiyo, aw migdoma ka kandan kimaen.”

⁴Penga niyan, migtebò si Pedro mig-indan diyà kandan te kedita te neinang.

⁵Minikagi sikandin, “Pegtawal-tawal ko doton te Jopa, doen impekità te Timanem diyà kanak. Doen migpedanà diyà kanak iling te dakel bekas intonton lekat te langit aw inewidan diyà te epat dogong.

⁶Penga niyan, timengteng a aw kinità ko se awop niyan ontò medita kemolò te ayam-ayam aw menenanap aw manok.

⁷Penga niyan, doen minikagi diyà kanak lekat te langit, ‘E Pedro, pengiyaw ka amon doen iotan nikaw.’

⁸Meneng timaba a, ‘Pengolo, eked a kaen kenyan, so eked a làpang te punù ingkeliwat i Moises, sìyan gayed ko egtoloen.’

⁹Meneng todà heman minikagi diyà kanak, ‘Ikà eg-ikagi te eked kepakay aw kànen, so minikagi se Timanem te mepakay iyan kànen.’

¹⁰Meketelo heman iyan keinang diyà kanak iling kenyan, aw penga niyan neengat se bekas doton te langit. Meneng wedad kinaen ko.

¹¹Penga niyan te wedà kenamay, dimateng se telo otaw doton te balay inogpaan ko aw kenà dan Judiyo.

¹²Insogò dan lekat te Sesarya amon engayen a dan. Minikagi se Espiritu Santo diyà kanak te eked a kulu se tomaking kandan. Enem se otaw egpemenal timaking kanak lekat te Jopa. Pegdateng day doton te balay i Cornelio, minawop se kedita day.

¹³Mig-indan sikandin kenami tepad te pegkità din te anghil doton te balay din. Minikagi se anghil, ‘Sogò ka te otaw domoton te Jopa amon mangay ki Simon, se doma ngadan din si Pedro.