Kɛɛwotiiti 11:2-13

²Siɛgi zu Piyɛlɛ lɛɛni la Zeeluzalɛme, kidaaleʋe nui niiti ti ga Zuifuiti ti peelalani, ti ɠɛ ma:

³«È leʋe ɠale, è liai, è lɛ zii ɠiligiti ta-ʋɛlɛi wu, naa ʋoluma wo laami ʋɔɔma wa tiye.»

⁴Piyɛlɛ tɔɔzeini naazu ga faiti suɠula ti ma ga gilagila, é ɠɛni ti ma:

⁵«Gè ɠɛni Zɔpee taazuʋɛ, gè yɛni GALA falizu sùɠili, gè kulakɛlɛmai ta zɔlɔɔni. Ani ta zeɠeni geeɠɔlɔgi zu, eɠɛ seɠe wola toko logai seki naanigɔi pɛ ga, é ɗa yei, eyɛsu é zeeli mà.

⁶Gè suʋɛtɛni ga pagɔ, gè ɠɔɠɔ naani suaiti kaani, ta dɔɓɔ zuaiti, naa ʋɛɛ kpokpo suaiti ta wɔniiti ba.

⁷Gè woo ɠila mɛnini ɓalaa, é ɗa ɠɛ mà: ‹Wuzeɠe, Piyɛlɛ, è ta ʋaa, è mi.›

⁸Kɛlɛ gè ɠɛni ma: ‹Ɓa-o, Màliɠii, tɔɔzei kaipa kɔzɔba ani ɓa tɔ ma ani la dɛ lɔɔni dàaʋɛ.›

⁹Wooi woni mà ʋolu ná velesiɛi zu, é ɠula geezuʋɛ, é ɠɛ mà: ‹Nii GALA ge ɠɛɛzu ma ɲadegɛ, mina naa ʋɛtɛ ga kɔzɔba ani.›

¹⁰Naama vai zeini ma ga seizu saʋagɔ, naa ʋoluma, ti pɛ ge ɠaaɠaleni ma geeɠɔlɔgi zu.

¹¹Gaamago nɔ, zunu saʋagɔ unkulani, ti zeɠe Seezalee, ti ʋa tòlisu, ti loni siɠidaʋɛ, ʋɛ gi ɠɛni ná.

¹²Zɛnvu Ɲadegai ɠɛni mà, gè ʋilɛ ti ʋolu gi li, gè mina inɛinɛ. Wɛlɛ kɛɛloun lɔzitaiti ba, niiti ti màazani, gi li, gi lɛ Kɔlenɛye ná-pɛlɛi wu.

¹³Naa ɓalaa boni gi ma, ʋelei é kulakɛlɛmai zɔlɔɔni la, geezuɠeelai loni, é ɗa ɠɛ ma: ‹Keela leʋe Zɔpee, ti Simɔn loli, nii daasei pɛai ga Piyɛlɛ.