Aposel 11:2-13

²Pillmaka Pita Jerusalem pi ba, Juda pillgi pai una wo kandja awo embe dji,

³epil djell una gaklene kelip natonj ba ni numog po ga boll kwa non ge kune nayendo we dji.

⁴Djimaka Pita wal porapora kaima yei mal ge kandjabe to embe dji,

⁵na dumo Jopa kamang yemolo, nalena al kanill. Besit kerman mal embe kupill al paika, wulle 4 pela pai al una amblo kal makimb al wormaka wo na moll al pai.

⁶Paika na kane pakna woro kanill, nomaga ne, mend doa ka ne, wal simbill porapora pakna moi.

⁷Moika una nubke ta na moll al embe dji, Pita, ni aglo molo, wal moro ge to namben we dji.

⁸Dji ba, na kandja embe djill, Iwa Kerman, man we! Na asa molo woll mal ge, wal mapill wal ne, wal ni man djin wal moi ge na kaima nanoll we djill.

⁹Djillka una nubke kandja alla dje embe dji, wal moro ge God dji wopake moro. Ni wal moro ge kune nayendo we nadjimben we dji.

¹⁰Na nalena al kanill ge kun 3 pela kanillka, wal besit ge alla i er pla kupill al pi.

¹¹Er pika na numb moll al kuntaimane iwa 3 pela wo kond djillake al aglo moi. Una woi ge dumo Sisaria iwa ta dje worika wo na pille dulo woi.

¹²God Murble moro ge une na moll al embe dji, ni kamalen ngundjo napupen. Kambono boll aike ben ge kune yendo we dji. Djika na una 3 pela ge yemaka, agana 6 pela manda moi ge boll aike erwo iwa ge numbiye al pupin.

¹³Po mopinka iwa Kornilius ge kandjabe to embe dji, na numb al molo kanill, tau agelo ta wo embe dji, ni kandja sigiye dje worbenka una dumo Jopa po iwa Saimon kandjiye ta Pita we dji ge po dje iune!