Lɛnʋgbʋnya 11:2-13

²Da Piɛlɩ yia lʋ -Zeluzalɛmʋ, -Lagɔnyɩma -wa mɩa Zuifʋ nya, 'ɩn -maa yia ɔ tʋ dɩlɩ.

³Wa nɛɛ: «-Ɩn ka nyɩma 'nɩa knɩ 'wʋ mɩɩ -gbɛ pla , 'ɩn -ɩn -yɔ wa 'sɔ yia li!»

⁴-Bha Piɛlɩ gbaa wa -yla, -we 'plɩa -bhlo -bhlo, we bhlili we gwedɩda, ɔ nɛɛ wa -yla:

⁵«'Ylɩ yabhlo nya, ɩn mɩ -Zopeegbe 'wʋ, da ɩn mɩa -Lagɔ bhubhoeda, 'ɩn -lu yabhlo -Lagɔ 'paa yoo yia na 'yli -gʋ yi. Wee 'yli 'wʋ, ɩn 'yɩa -lu yabhlo -yɔ, -zugba we sibhli la na gbɛgbɛɩn. Wee -lu 'wlʋ sa 'naa 'kadʋ. We mɩ lakpada we gwɩgwɩ -mnʋa 'yli, -zugba we bhʋ yalɩ, 'ɩn we yia 'mɩ kwesi nyni.

⁶Ɩn ylaa we nʋkplɛ tenyii, 'ɩn ɩn yia nɩma kaa 'lali -mnʋa klaa, -fliinɩma klaa, lagbizeli -nɩma klaa, 'zianya klaa -yɔyɩ.

⁷Tɔʋn, 'ɩn ɩn yia wɛlɩ yabhlo 'nʋ, we nɛɛ 'mɩ -yla: ‹Piɛlɩ, -ɩn -sɔ 'wʋ, -ɩn 'bha, 'ɩn -ɩn 'ka li!›

⁸«'Ɩn ɩn nɛɛ: ‹'Ao, na -Kanyɔ, -ɩnnya! Ɩn -ka bhaa 'wlʋ, pʋɩnkalu -yɔ -na -gba 'nɩ -slɔ na ŋwɛɛ pla.›

⁹«'Ɩn we 'sɔnʋ nya, wee wɛlɩ yia yalɩ 'bhʋ, 'ɩn we nɛɛ 'mɩ -yla: ‹-We -Lagɔ tɩa 'wʋ 'wlalaa nɩ, -mɩ 'na 'yɩlɩ we pʋɩnkalu 'bhisa -nɩ.›

¹⁰We nʋ 'sa -zakpa ta. 'Bhie, we 'dɛ weee yia yalɩ lʋmnɩ.

¹¹«We bhla tɔʋn, nyɩma ta -wa 'bhʋa Sezalee, -wa wa tiea 'mɩ 'wʋ, -budu -we ŋwɛɛ ɩn mɩa, 'ɩn wa yia -bha nyni.

¹²-Lagɔɔ Zuzu nɛɛ 'mɩ -ylaɛ: ‹-Ɩn 'na gbɩzɩlɩ nyɩma 'wʋ -nɩ, -ɩn -yɔ wa 'sɔ mnɩ.› -Amɩaa -Lagɔbhelia gbelibhlo -wa -yɔ 'mɩ 'sɔ yia da -seli nɩ, ma kwaa 'mɩ yoo Sezalee. 'Ɩn -a 'dɛ weee yia Kɔlʋnɛɩɩ -budu zɔ pla.

¹³-We ylɩa Kɔlʋnɛɩ nɩ, ɔ yia we gba -aɩn -yla. Sa ɔ 'yɩa ɔ -budu zɔ -Lagɔɔ 'anzɩ 'yligbeda, 'ɩn -mʋʋ yia ɔ -yla gba: ‹-Ɩn tie nyɩma -Zopee, nyɩmɛ wa laa Simɔ Piɛlɩ, wa -yɔ ɔ 'sɔ 'ka yi.