Apostolo 11:2-13

²Petere kêpi Jerusalem gêja, tec lau Juda ŋanô ŋagêdô sêsôm eŋ gebe

³“Aôm kôpi lau samuc nêŋ andu to goeŋ gêŋ gôŋgôŋ gôwiŋ êsêacgoc.”

⁴Tec Petere gêôc awa sa ma gêwa biŋ tau sa tomalageŋ gêdêŋ êsêac gebe

⁵“Aê kateŋ mec gaŋgôŋ malac Jope e katuc kaiŋ teŋ kêsa ma galic gêŋ teŋ amboac obo kapôêŋ sêmoatiŋ ŋalêsu aclê tôŋ kêsêp aŋga undambê gêdêŋ aê gêmêŋ.

⁶Aê gaôc kêniŋ e galic bôc nomŋa kaiŋ teŋ-kaiŋ teŋ, bôclai ma gêŋ kêkêŋŋa to moc umboŋ ŋalabuŋa.

⁷Ma gaŋô awa teŋ kêsa gêdêŋ aê gebe ‘Petere, ôndi sa, ômbuc ma ôniŋ.’

⁸Go kasôm gebe ‘Apômtau, masigoc, gêŋ sec to alôb-alôb amboac tonaŋ aocsuŋ gêjam kauc samuc.’

⁹Go awa tau aŋga undambê gêjô aê aoc kêtu dim luagêc gebe ‘Gêŋ taŋ Anôtô kêmasaŋ kêtu selec naŋ, ômbu gebe alôb-alôb atom.’

¹⁰Gaŋô biŋ tonaŋ e kêtu dim têlêac, go gêŋ samob tonaŋ ŋai kêpi undambê gêja kêtiam.

¹¹Ma gaôgeŋ galic lau têlêac, taŋ sêsakiŋ aŋga Kaisarea dêdêŋ aê mêŋsêô lasê andu, taŋ gaŋgôŋ naŋ.

¹²Ma Ŋalau Dabuŋ kêsôm gêdêŋ aê gebe ‘Ôwiŋ êsêac taêm ênam biŋ naêsanaêsa atom.’ Tec gawiŋ lasitêwai 6 tecenec e api ŋac tau nê andu.

¹³Go Ŋac tau gêjac miŋ gêdêŋ aêac gebe gêlic aŋela teŋ kêkô ênê andu ma kêsôm gêdêŋ eŋ gebe ‘Ôsakiŋ lau sêna Jope ma sêkôc Simon, taŋ sêsam eŋ sebe Petere naŋ sêmêŋ.