Föför 11:2-13

²Iei mine lupwen Petrus a feila Jerusalem, chokewe mi tipeni än ekewe chon lükün Israel repwe sirkomsais, ra esita i o apasa,

³“En ka wasöla lon imwen ekewe chon lükün Israel resap sirkomsais, ka pwal mwo nge etiir le mongö!”

⁴Mürin Petrus a popuetä le apworausa ngeniir tichikin meinisin mine a fis seni lepoputän,

⁵“Lupwen üa iotek me lon ewe telinimw Joppa, a wor künaei. Üa küna och mettoch mi wewe ngeni echö chenikam mi watte, a föfö pwokukun me rüanü, a ürütiu me läng. Iwe, a köüla mwei.

⁶Üa nenelong lon o üa küna sokopaten man mi wor fofoch pecher, manmwacho, sokopaten mantötö me machang mi mwacho.

⁷Mürin üa rongorong eu möngüngü a üreniei, ‘Petrus, kopwe ütä, kopwe niela ekei man o kopwe ochoch fituker!’

⁸Nge üa pölüeni, ‘Ai Samol, esap fokun öch ngeniei! Üsap fokun mwo nge mongö och mine a pin ngeniei o nom lon tettelin limengau.’

⁹Ewe möngüngü a kapassefäl seni läng, ‘Kosap apasa pwe a limengau och mettoch are Kot a apasa pwe a limöch.’

¹⁰Ei lapalap a fis fän ülüngat, mürin ewe mettoch a ürüsefälitä läng.

¹¹Lon ena chök otun ekewe ülüman mwän Kornelius a tiniireto rei seni Seserea ra tori ewe imw ia üa nom ie.

¹²Iwe, ewe Ngünmifel a üreniei pwe üpwe etiir, nge üsap tipemwaramwar. Ekei wonoman chon lükü Jesus seni Joppa ra pwal etiei le feila Seserea, äm meinisin aia tolong lon imwen Kornelius.

¹³Iwe, Kornelius a apworausa ngenikem usun an küna eman chon läng a ütä lon imwan o üreni, ‘Kopwe tinala ekoch mwän Joppa ren Simon mi pwal iteni Petrus, pwe epwe feito reöm.