Melkahka Kan 86:3-14

³Komwi me ei Koht, eri komw ketin kupwurkalahngan ong ie; I kin wie kapakapohng komwi sang nimenseng lel nipwong.

⁴Maing ei Kaun, komw ketin kansenamwahwihala sapwellimomwi ladu menet, pwehki ei kin patohwandahng komwi ei kapakap akan.

⁵Komwi me kupwur mwahu oh diren mahk ong kiht, diren limpoak poatopoat ong koaros me kin patohwan kapakapohng komwi.

⁶Maing KAUN, komw ketin karonge ei kapakap; komw ketin karonge ei likwer en pek sawas.

⁷I patohwan likweriong komwi ni ahnsou apwal, pwehki omwi kin ketin sapeng ei kapakap akan.

⁸Maing ei Kaun, sohte emen koht mie duwehte komwi, sohte emen me wiadahr dahme komw ketin wiadahr.

⁹Wehi kan koaros me komw ketin wiahda pahn patohdo oh poaridi mwohn silangomwi; re pahn kapikapinga sapwellimomwi roson lapalap.

¹⁰Komwi me manaman oh kin ketin wiahda soahng kapwuriamwei kan; komwihte me Koht.

¹¹Maing KAUN, komw ketin padahkihong ie audepen kupwuromwien, I ahpw pahn kin loalopwoat peikiong komwi; komw ketin padahkihong ie pwe I en kin papah komwi ni kapehdi unsek.

¹²Maing ei Kaun oh ei Koht, I pahn patohwan kapinga komwi sang nan kapehdiet; I pahn kin kalohki sapwellimomwi roson lapalap kohkohlahte.

¹³Ia uwen lapalap en sapwellimomwi limpoak poatopoat ong ie! Komwi me ketin kapitiehla sang nan sousou.

¹⁴Maing Koht, aramas aklapalap suwed kei uhwong ie; pwihn en aramas suwed ehu songosong en kemeiehla— aramas me sohte kin waunekin komwi.