Kap 86:3-14

³Amɨn Tagɨno, nak gɨldat kɨnda kaloŋ gak do bɨsit asat, do nak do bupmɨ nandaŋ nabi.

⁴Amɨn Tagɨ, nak gak dogɨn bɨsit asat, do oman amɨngo nak do kɨsɨk kɨsɨk nabi.

⁵Amɨn Tagɨ, gak tagɨsisi, dɨwarɨnin wɨrɨrɨk nimɨsal. Gak mɨŋat amɨnyo bɨsit gayaŋ uŋun but dasi galak taŋ yomɨsal.

⁶Yawe, gak bɨsitno do mɨrak pakyaŋsi yopbi. Nak do bupmɨ nandaŋ nabi do yaŋ tɨdosot. Yaŋ ɨlɨtno nandaki.

⁷Nak gak do yaŋ tɨdosot bɨsapmon aŋpulugosol, do jɨgɨ pakeŋ bɨsapmon gak do bɨsit abeŋ.

⁸Amɨn Tagɨ, piŋkop gak yombem dɨ mɨni. Gak da kɨsi morap yapmaŋdal. Ae amɨn kɨnda da wasok tapmɨmɨ toŋ asal uŋudeŋ kɨnda arɨpmɨ dɨma asak.

⁹Amɨn Tagɨ, mɨŋat amɨn kabɨ morap gak da wasagɨl, uŋun da abɨŋ ŋwakbeŋ aŋ gamɨŋek gak dakon man awɨgɨkdaŋ.

¹⁰Nido, gak kaloŋgɨn tapmɨmgo madep ae gak dagɨn yo masɨ masɨmɨsi asal. Gak kaloŋgɨn Piŋkop bamɨsi.

¹¹Yawe kositgo kɨlegɨ do nayɨŋ dekbɨ gengo bamɨsi yolek egɨpbeŋ. Nayɨŋ dekbɨ gak dogɨn nandaŋ egek mango awɨgɨkeŋ.

¹²Amɨn Tagɨ Piŋkopno, nak but dasi gak aŋkɨsikeŋ. Toktogɨsi mango aŋkɨsiŋ wɨgɨkeŋ.

¹³Nido gak nak do madepsi but dasi galak taŋ namɨsal. Kɨmoron naŋ pulugaŋ nepbɨ gapmagwan dɨma pɨgɨgɨm.

¹⁴Piŋkop, kwen wɨgɨk amɨn da nak nɨt do abaŋ. Uŋun amɨn yokwi bupmɨni mɨni da nak nɨkba kɨmokgeŋ do abɨŋ muwukgaŋ. Uŋun manji gamɨŋek gengo dɨma guramɨkgaŋ.