Melkahka Kan 49:1-14

¹Kumwail wehi koaros, kumwail rong met! kumwail rong, tohn wasa koaros,

²me lapalap oh me tikitik kan, me kepwehpwe oh me semwehmwe kan.

³Ei lamalam pahn sansal; I pahn koasoiahda koasoi en loalokong kei.

⁴I pahn kanahieng tehk lepin kahs kei oh kawehwehda nindokon ei kesekesengki nei arp.

⁵I sohte pahn masepwehk ni ahnsou keper ni ahnsou me ei imwintihti kan pahn kapiliepene,

⁶oh aramas suwed me kin likih ar kepwe kan oh aksuweiki uwen tohtohn ar dipwisou kan.

⁷Sohte me kak kapitala pein ih; sohte me kak patohwanohng Koht pweinen eh mour,

⁸pwe pweinen mour me nohn laud kowahlap. Me emen kak kihda sohte pahn itarohng

⁹kadohwaneweisang ih nan sousou, pwe en kak momour poatopoat.

¹⁰Aramas emen sohte lipilipil kak kilang duwen me loalokong kan ar pil kin iang mehla, pil duwehte me pweipwei oh loalopwon akan. Oh kadaudokarail kan kin sohsohki ar dipwisou kan.

¹¹Ar sousou kan, iei imwarail poatopoat; wasa re kin mihmi ie kohkohlahte, mehnda ma re sapweniki sahpw ehu mahso.

¹²Roson lapalap en aramas sohte kak doarehsang mehla; e pahn mehla duwehte mahn akan.

¹³Kilang dahme kin wiawihong irail kan me kin koapworopworki pein irail, oh imwilahn irail kan me kin nsenamwahuki ar kepwe kan—

¹⁴e kileldier re en mehla duwehte sihpw kei, oh Mehla me pahn wia sileparail. Me pwung kan pahn poweiraildi nindokon paliwararail kan pahn wiepwella nan sousou nan sapwen me melahr akan dohsang imwarail kan.