Melkahka Kan 22:25-31

²⁵I pahn kapinga wiepen nin limomwi kan nan pokon laud akan; I pahn kapwaiada meirong kan me I inoukidahr mwohn irail koaros me kin kaudokiong komwi.

²⁶Me semwehmwe kan pahn tungoale uwen me re anahne; irail kan me patohdohng rehn KAUN-O pahn kapinga ih. Re en paiamwahu kohkohlahte!

²⁷Tohn wehi kan koaros pahn tamanda KAUN-O. Sang ni irepen sampah koaros re pahn sohpeiong; keinek en sampah kan koaros pahn kaudokiong.

²⁸KAUN-O iei nanmwarki, oh e kin kakaun wehi kan.

²⁹Me aklapalap koaros pahn poaridi mwowe; me pahn mehla koaros pahn poaridi mwohn silangi.

³⁰Dih kan me pahn kohdo pahn papah; aramas akan pahn padahkihong dih en mwuhr duwen KAUN-O.

³¹Aramas akan me saikinte ipwidi pahn rong: “Kaun-o ketin kamouralahr sapwellime aramas akan!”