Y Salmo Sija 22:25-31

²⁵Ya iya jago nae mamaela y alabansajo gui dangculon inetnon: ya y promesajo juapase gui menan y manmaañao güe.

²⁶Ufañocho y manmanso ya ufanjaspog: ufanmanalaba as Jeova y umaliligao güe: polo ya ufanmanlâlâ y corasonmiyo para taejinecog.

²⁷Ujajaso ya ufanalo guato as Jeova todo y uttimon y tano: ya ufamnanadora gui menamo todo y familian y nasion sija.

²⁸Sa as Jeova y raeno: ya güiya umagas gui todo nasion.

²⁹Ufañocho ya ufanmanadora todo y yinemog y tano: gui menanña ufandimo, todo y manunog gui eda: güiyaja ni y tisiña unalala y antiña.

³⁰Un semiya usinetbe güe: ya umasangan si Jeova asta y uttimo generasion.

³¹Ufanmato ya ufanmasangan y tininasña ni y taotao na umafañago, na güiya fumatinas este.