Melkahka Kan 139:11-24

¹¹I kakete patohwanohng rotorot en koaduhpwaliehdi de marain en rotala,

¹²ahpw mwohn silangmwi rotorot sohte kin rotorot, oh nipwong kin marain duwehte nin rahn. Rotorot oh marain kin duwepenehte rehmwi.

¹³Komwi me ketin wiahda soahng koaros ni paliwereiet; komwi me ketin kakonepene paliwereiet nan kapehd en inei.

¹⁴I kin patohwan kapingahkin komwi omwi lammwin kowahlap; wiepen nin limomwi kan me kapwuriamwei oh inenen mwahu mehlel. I kin wehwehki duwen met.

¹⁵Ni tih kat eh kakonokonpene ni keneinei nan kapehd en inei, ni ei tepin kekeirda wasa riro, komw ketin mwahngihieier—

¹⁶komw ketin mahsanihieier mwohn ei ipwidi. Rahn akan en mouriet kileldi nan sapwellimomwi pwuhk, pil mwohn tepidahn keieun rahn.

¹⁷Maing Koht, ia uwen eh apwal ong ie I en dehdehkihla audepen kupwuromwi kan; ia uwen tohtohn audepen kupwuromwi kan!

¹⁸Ma I song en wadekedi, re pahn tohtohsang piken ni oaroahr kan. Ni ei patohwan pirida, I patohwan ieiang komwihte.

¹⁹Maing Koht, ia uwen ei ngoangki komwi en ketin kemehla aramas suwed kan! Ia uwen ei ngoangki aramas lemei en piseksang ie!

²⁰Re kin lahlahwei komwi; re kin kasaminehla mwaromwi.

²¹Maing KAUN, ia uwen ei kailongki irail kan me kin kailongkin komwi! Ia uwen ei mwamwahliki irail kan me kin kahngohdiong komwi!

²²I kin kailongkin irail mehlel; I kin wiahkin irail ei imwintihti.

²³Maing Koht, komw ketin kasawih ie, pwe komwi en mwahngih mohngiongiet; komw ketin song ie, pwe komwi en mwahngih ei lamalam akan.

²⁴Komw ketin rapahki ma mie suwed ehu rehi oh ketin kahluwa ie nan ahl en mour soutuk.