SALMOS 139:11-24

¹¹Intla nijchihuasquía campeca para nimotlatis ipan tzintlayohuilotl, nopa tzintlayohuilotl mocuepasquía tlahuili yahualtic tlen na, pampa ta tiitztos nopano.

¹²Pampa niyon nopa tzintlayohuilotl ax hueli nechtlatis moixtla, Toteco. Pampa para ta nopa yohuali tlahuía queja elisquía tonaya. Nopa tzintlayohuilotl huan tlahuili ta tiquita san se.

¹³Ta tijsencajqui sesen tlamantli tlen onca iijtic notlacayo. Huan tijmotzquilti sesen tlamantli tlen nijpiya, quema niitztoya iijtico nonana.

¹⁴Nimitztlascamati pampa nochi tinechsencajqui ma nieli se tlamantli tlen nelía cuajcualtzi. Quena, nopa tequitl tlen tijchijqui quema tinechsencajqui onpano yejyectzi. San nijsentlachilía para nimoilhuis nochi tlen tijchijtoc ipan notlacayo.

¹⁵Ta tijtlachiliyaya quema na nipejqui nimoscaltía nopano ipan iijtico nonana, nel nimotlatijtoya tlen nochi sequinoc. Quema axaca más quitlachiliyaya, ta tinechchijchijqui ica mohueyi yajatil, queja se tlen cuali quimati tlaxinepalohua.

¹⁶Ta tinechitac quema aya nitlacatiyaya. Huan quema aya nitlaijiyotilanayaya, tiquixtlali quesqui tonali niitztosquía. Huan sesen tonal tlen niitztosquía huan tlachque nopantis, ta tiquijcuilo ipan molibro.

¹⁷Toteco Dios, nelía yejyectzi quema nimomaca cuenta para ta tijsenhuiquilía timoyolilhuía tlen na.

¹⁸Hasta ax hueli nijpohua quesqui huelta timoyolilhuía tlen na ipan se tonali. Huan ica ijnaloc quema niisa, ta noja timoyolilhuijtoc tlen na.

¹⁹Toteco Dios, nelía elisquía cuali intla tiquintzontlamiltisquía nochi tlacame tlen ax mitztlepanitaj. Xijchihua ma nechtlalcahuica nopa temictiani,

²⁰pampa inijuanti mitztlaijilhuíaj, huan san quiahuilmatij motoca.

²¹TOTECO, ¿ax tiquita para quinamiqui ma niquincocoli inijuanti tlen mitzcocolíaj? ¿Ax quinamiqui nicualanis ica mocualancaitacahua?

²²Quena, tlahuel niquincocolía, pampa niquinita queja nojquiya elisquíaj nocualancaitacahua na.

²³NoTeco Dios, xijtlachili noyolo huan xiquita nochi tlen eltoc nopano. Huan xijyejyeco notlalnamiquilis para tiquitas intla xitlahuac tlen nimoilhuía.

²⁴Xinechnextili intla onca ipan notlalnamiquilis se tlalnamiquistli tlen ax mitzpactía, huan xinechyacantiya ipan nopa ojtli tlen tehuica campa onca yolistli para nochipa.