SAAMUNƆ 139:11-24

¹¹Tó ma bè gusiaa damala, ke gupuraa kɛ̀ ligamazii li gwãavĩ ũ,

¹²guu ègↄ̃ siannɛro, gwãavĩ ègↄ̃ dɛnnɛ lán fãantɛ̃ bàmɛ, gupura kↄ̃n gusiaao ègↄ̃ sɛ̃nkpɛnnɛmɛ.

¹³Ḿbe n ma guu kɛ̀, n ma í kàsa ma da gbɛɛɛn.

¹⁴Ma sáabu kɛ̀ kɛ̀nnɛ ma kɛna naasi vĩ bensↄ̃ à yãbↄnsaɛ vĩ. N yãkɛnanↄ è bↄ ń saɛ, má dↄ̃ sãnsãn ma nↄ̀sɛn.

¹⁵Gurↄↄ kɛ̀ n ma í kàsa nɛ́'isↄ guu, ma wá kee utɛnannɛro. Kɛ̀ ma mɛ̀ e lii asii guu gwe,

¹⁶n wɛ́ɛ sì ma nɛ́gberelɛ. Lán n ma gurↄↄ dìɛ nà píngi, à lɛ́ kú n takadan zaalɛ à kee e naaro.

¹⁷Luda, n laasuu bɛ̀ɛ vĩmɛ maamaa, à lɛ́ vĩro fá!

¹⁸Tó má yezi mà naro, aↄ̃ↄ pari dɛ bùsu'ãatɛ̃la. tó ma vu, mɛɛ̀gↄ̃ kúnyo ai tia.

¹⁹Luda, tó nɛ́ gbɛ̃ zaaanↄ dɛdɛ dé? À gumala a gbɛ̃dɛrinↄ!

²⁰N ibɛɛnↄ è n yã o kↄ̃n nↄ̀sɛ zaaao, n tↄ́ bɛ̀ɛ vĩ n lɛ́nlo.

²¹Dii, mɛɛ̀ za gbɛ̃ kɛ̀ aↄ̃ zanguunↄnloo? Mɛɛ̀ gí gbɛ̃ kɛ̀ aↄ̃ fɛ̀ɛnzinↄ kãzi.

²²Má yãke vĩńnɛro, se zangu, mɛɛ̀ ń diɛ ma ibɛɛnↄ ũmɛ.

²³Luda, ǹ ma gwagwa ǹ ma nↄ̀sɛ dↄ̃, ǹ ma yↄ̃ ǹ ma gwa ǹ ma laasuu dↄ̃.

²⁴Ǹ gwa tó má laasuu zaa ke vĩ, ǹ ma da zɛ́ kɛ̀ ègↄ̃ kuu gurↄ píngia guu.