Metiu 18

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Kala doh oro lau ta Jises ame hawen ma ndremenya iy, “Are lau nyaran tinan ereu baha tondrok ta Kindrei?”

²Eme Jises luhi nadu nah ari nadu bwisik eme ales ereu ndrokowa oro.

³Ano iy tiye i buku doh, “Jo tiye sahou handru ewek tado, buku none ado batubuni ndrine ado bwe, ma basahan buku none nah nadu bwisik dah bwe, ado winiyan bala bolo tondrok ta Kindrei bwe.

⁴Ndramak atehei budon tan asahan buku le nah, ndramak doh kameh nyaran asahan tinan ereu bolo tondrok ta Kindrei.

⁵Ya buku none ari ndramak abudon jo ya iy aseben ari nadu nah bwisik buku nah dah, badeh iy aseben jo.”

⁶Jises asehek ja anya, “Buku none ari ndramak bwidi ari nadu nah ale atehei budon tan eme tek taku ta kandriyen ndra-in, sebwe mwasin ta ndramak doh kasawei ari bek maha-an ki balen ma kakahei iy katuh kili bolo ndras lawe-en ya iy kimek.

⁷“Sisi-in tinan labai kameh i bwele-e iri lau badu kon munyak, iri nane amekes ndramak ari ja taku ta kandriyen ndra-in. Handru, iri kandriyen ndra-in doh kameh asahan. Arile jo tikisiy handru ta ndramak mesekei asahan.

⁸Buku none minem deh katim aliu ou ta amekes kandriyen ndra-in, mwasin ou saniy ya ou akahei ki-iu! Sebwe mwasin ta ou minem raka le ma ou katim raka le ta akohok koham mwasin ta ereu le buku doh. Kora-on minem ma la-uh ma katim ma la-uh udu aliy, ya iri kakahei ou ala bolo jih ale winiyan bamak bwe-en!

⁹Ya, buku none madam aluwi ou ta amekes kandriyen ndra-in, sebwe mwasin ta ou sudiy ma ou akahei ki-iu! Mwasin ta ou madam ari le ya ou akohok koham mwasin ta ereu le buku doh, kora-on madam ma la-uh kudu aliy, ya iri kakahei ou ala bolo jih ta anya ereu le buku doh.

¹⁰“Ado kabudon kamwenen. Kora-on ado anya ari ereu ndrokowa oro nah kede-eh lakou laleyah. Bwe handru. Jo asehek tado amwenen, ereu kandrah oro angelo toro badeh, len mari oro areu mada tama ereu kandrah.”

¹²Jises asehek sahou ja anya, “Ado abudon buku sah? Buku none ari ndramak tan rinek (100) sipsip udu aliy, ya buku none ari sipsip tan amai, sebwe iy winiyan bala batakaleh bwe nadeh? Neh? Bwe labai. Iy kameh ruwani oro sipsip tan ma ndro ronoh ndro ari (99) nane areu bwele-e mandrei are gwek, ma iy kameh iu ili takaleh ari nane amai.

¹³Jo asehek sahou handru ewek tado, buku none iy takalahiy, iy kameh sekesek labai. Iy sekesek toro ndro ronoh ndro ari (99) sipsip nane bamai bwe, arile, buku none iy takalahei sipsip ari nane amai, sekesek tan kameh i tinan labai.

¹⁴Buku le tama ado udu kandrah, iy bwalen ari nadu nah kede-eh samai.”

¹⁵Jises asehek sahou ja i buku doh, “Buku none nadu tinem bwidi kandriyen ndra-in ewek tam, mwasin ta ou ala atou iy, ya ah kasehek sahou ki se ta kandriyen nane. Buku none iy anuhun sahou tam, mwasin, ou ndrandrei nadu tinem ndrame hamon.

¹⁶Arile, buku none iy banuhun sahou tam bwe, mwasin, ou andrei ari deh la-uh ndramak ja kewek hawem, ya, ‘Buku lau la-uh o taloh asehek anya, oro anyolom ari ndramak amekes kandriyen ndra-in, mwasin ta aha kasehek sahou hawen.’

¹⁷Arile, buku none iy banuhun sahou toro bwe, mwasin, ou tiye ki tiri lau mwan ma badih badu bolo iri lau ta Kindrei. Buku batun boto-on ma iy bwalen anuhun sahou toro ale, mwasin, ou atou iy buku none ari ndramak tanan Kindrei bwe, deh iy ndramak ta kolowa luk ta takis ta lau.

¹⁸“Jo asehek sahou handru ewek tado, iri lakou ado asehek iri mwan ma badih kamekes udu munyak dah, mwasin, Kindrei udu kandrah sekesek ale. Ya saba lakou ado turukiy udu kon munyak, idoh kameh Kindrei ale turukiy udu kandrah.

¹⁹Ya jo asehek ja ewek tado. Buku none ah la-uh lau badu kon munyak atehei budon ta ah i se ta ari lakou, ya ah asolom ta amekes, o, ta akohok lakou doh, mwasin tama udu kandrah winiyan atehei ewek ta-ah.

²⁰Ya, buku none lau la-uh deh lau taloh ame atukum ta nyarak, mwasin, jo amwenen kameh ereu ndrokowa oro.”

²¹Kala doh Pita eme hawe Jises ma ndremenyani iy i buku doh, “Laban, san sabe buku nadu tine kamekes ndra-in keme tek, ya jo kamani kandriyen ndra-in tan doh? Sebwe san ndro taloh le nadeh?”

²²Ya Jises asumon iy i buku doh, “Jo basehek anya ou mani kandriyen ndra-in tan san ndro taloh le bwe. Jo anya ou mani kandriyen ndra-in tan san ndro taloh, ano san ndro taloh ja, ano san ndro taloh ja, ili ili winiya asahan san nyaran bwe.

²³Ado kanuhun, tondrok ta Kindrei i buku none ari kabin anya kakohok iri luk oro lau tan ta gok mene andrei buku dinau udu minen, ma oro batehei saluwen bwe le.

²⁴Iy anya kamekes lakou doh le, iri tiyani ndramak ari eme hawen, iy kameh kisih luk ki hamon ki ta kabin nane na luk solo-an labai (K10,000,000).

²⁵Arile iy ndramak nane tan luk ta edeu saluwe luk nane bwe. Eme ma, kabin nane anya iy kameh atehei iy ndramak nane hawe udun ma nadun ala mada ba-en, ya ari ndramak kasihinei oro kala lau ta gok buku bonyo-ou tan. Ya oro kandrei iri lakou mari ta ndramak nane ki mada ba-en ale ya ta kandriyen doh oro winiyan andrei luk tan mari eme hamon.

²⁶Eme ndramak ta gok nane anuhun sahou doh, iy atehei bwili ndru-un in mirihik ta kati kabin nane, ma iy tiye ta kabin nane i buku doh, ‘Ou tikisi jo, ma ou abe-en jo, idah kameh jo winiyan atehei ewek hamon iri luk mari mene jo akohok tam.’

²⁷Eme ndramak tinan ta lau ta gok nane tikisi iy, ma iy ruwani iy, ma tiye tan ta iy sadeu luk sala hamon sala tan, ndri-iy ai.

²⁸“Arile, ndramak ta gok nane iu ili manan, ya iy atou ndramak ari ta gok badu hawen, iy mene andrei luk tan winiya rinek (K10) le. Eme ma iy tawi ndramak badu hawen nane ta gok, iy tawi balen ma iy asehek sahou boto-on i tan i buku doh, ‘Ou adeu iri luk mari mene ou akohok tek, keme hamon.’

²⁹Lau ta gok badu hawen nane anuhun sahou doh, ma iy atehei bwili ndru-un i andri, ya iy tiye ta ndramak nane i buku doh, ‘Ou tikisi jo, ya ou abe-en jo. Idah kameh jo winiyan atehei ewek hamon iri luk mari mene jo akohok tam.’

³⁰Arile, ndramak nane bwalen. Eme iy atehei lau badu hawen nane i bolo kou winiya le ndramak nane atehei i hamon iri luk mari iy andrei ta ndramak nane.

³¹“Oro lau ta gok ra-on ja badu hawe uru lau nane atou kandriyen doh, ya ndrine oro andra-i labai. Eme oro ala tiye ta tinan toro.

³²Eme ya tinan nane luhi ndramak ta gok nane, ma tiye tan i buku doh, ‘Ou lau ta gok ndra-in. Nane ou aden eme tek, ya jo anya ou sasih same hamon iri luk mari mene ou akohok tek.

³³Jo tikisi ou handru. Arile, buku sah handru ya ou batikisi iy lau ta gok badu hawem nane bwe?’

³⁴Ndramak tinan nane ndrinen irih ya iy atehei iy lau ta gok nane i bolo kou ma iy tiye iri lau ta ndrokei katehei maha-an ki tan winiya le iy kasihinei iri luk tan mari nane kili hamon.

³⁵“Idoh buku le tama udu kandrah, iy kameh amekes iri kandriyen doh ewek taha mari, buku aha bamani iri kandriyen ndra-in nadu tine aha ari ja amekes ewek taha bwe.”