Matthew 18

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Ka chingiyal’ nem me yib pi gachalpen Jesus ngak, ni yad be fith ni be lungurad, “Mini’ e en nth’abi tolang ko gagiyeg nu tharmiy?”

²Me pining Jesus bochi tir, nge sak’iynag nga p’eowcherad,

³me ga’ar, “Mu ted fanmediyan ko re bugithin ni ba’aray: Fa’anra dab mpiggad ngam boded e bitir, ma ri dabiyag ni ngam uned ngalan Gil’ilungun e tharmiy.

⁴En nra yan i par ni ir e th’abi tolang ko gagiyeg nu tharmiy e en nra sobut’nag ir nge bod e chi tir ney.

⁵Ma en nra ayuweg reb e bitir ni bod e biney ni bochag e ke ayuwegneg.

⁶“Kabfel’ ni yira the’ gafan ba malang ni ba ga’ nga belel’ugun be’ nga nin’ nga regur nge limoch, ko bin ni nge waliy reb e pi bitir ney ni kug mich u wan’ nge pi’ keru’ ngog.

⁷Ke gafgow e girdi’ nu fayleng ni bo’or ban’en ni bay riy nma waliy e girdi’ ngar pi’ed keru’rad ngak Got! Pin’ey nma waliy e girdi’ ngar pi’ed keru’rad ngak Got e gubin ngiyal’ ni bay i yib — machane ri bayi gafgow e en ni ir e tabolngin e pin’em!

⁸“Ere fa’anra waliyem baraba’ i pa’am fa baraba’ i em ngam pi’ keru’um ngak Got, ma ga th’ab ngam n’ag! Ya kabfel’ rogom ni ga ra yan ko yafos ndariy baraba’ i pa’am fa baraba’ i em ko bin ni kabay pa’am nruw raba’ nge em nruw raba’ mi non’em nga fithik’ e nifiy ni dabi math bi’id.

⁹Ma fa’anra waliyem baraba’ i lan owchem ngam pi’ keru’um ngak Got, ma ga luf ngam n’ag! Ya kabfel’ ni ngam man ko yafos nta’ab baraba’ i lan owchem ko bin ni nge par lan owchem nruw raba’ mi non’em nga fithik’ e nifiy ni dabi math bi’id.”

¹⁰“Mu guyed rogon nge dab mu darifan niged u wun’med bagayad e pi bitir ney. Ya nggog ngomed ni pi engel rorad nu tharmiy e gubin ngiyal’ ni yad bay rok e Chitamag nu tharmiy.

¹²“Uw rogon ni gimed be finey? Gonap’an e mang e ra rin’ be’ ni fa’anra bay ra’ay i saf ni fak me yan reb ngabang? Ra pag fa mereb i ragag nge mereb nem ni yad be kay e pan u sigre’en e burey me yan nge gay fa binem nike yan ngabang.

¹³Nggog ngomed nra pir’eg ma ba gel e felfelan’ nra tay ni bochan e ta’abinem, ko felfelan’ ni be tay ni bochan fa mereb i ragag nge mereb nde yan ngabang.

¹⁴Ere ku errogon e Chitamangimed nu tharmiy nde adag bagayad e nochi tir ney ni nge malog.

¹⁵“Fa’anra ngongliy be’ ni walagem e denen nib togopluw ngom, ma ga yan mu guy ngamog ngak e kireb nike rin’ nge nang. Machane mman ni go’ gur, ngam nonow ni go’ gimew. Ma fa’anra fol ko tin ni ga be yog, ma aram e kam sulweg walagem.

¹⁶Ma fa’anra dabi fol rom ma ga fek ta’abe’ fa l’agruw ni’ ngar unew ngom, ya nge urngin e tin kamog nike rin’ nib togopluw ngom ma nge yag ni micheg l’agruw fa dalip ni’, ni bod ni be yog e babyor nib thothup.

¹⁷Ma fa’anra dabi fol rorad, me ere mog fapi thin ni urngin ngak girdi’en e galesiya. Ma fa’anra dabi fol rok girdi’en e galesiya, ma ga tay ni gowa be’ u yugu reb e nam fa reb e tamukun tax.

¹⁸“Ere nggog ngomed ni gimed gubin ni nge lungug: n’en ni gimed ra taleg ndab ni rin’ u roy u but’ e yira tay u tharmiy ni aram rogon; ma n’en ni gimed ra pag ngan rin’ u but’ e yira tay u tharmiy ni aram rogon.

¹⁹“Ma ba’aray ban’en ni ngku gog ngomed: fa’anra ta’reban’ l’agruw i gimed nga ban’en u roy u but’ miyow pi’ e meybil riy, mra rin’ e Chitamag nu tharmiy ngorow.

²⁰Ya gin nra gak l’agruw fa dalip ni’ ngay u fithingag, e aram e gu bay rorad ko gin’em.

²¹Me yib Peter ngak Jesus nge fith ni ga’ar, “Somol, uw urngin yay nrayag ni nge denen walageg nib togopluw ngog ma thingar gu n’ag fan u wun’ug? Medlip yay?”

²²Me fulweg Jesus ni ga’ar, “Danga’, gathi medlip yay, ya medlip yay e medlip i ragag,

²³ya gagiyeg nu tharmiy e bod be’ nib pilung ni turguy ni nge guy babyoren e salpiy nma kol e pi tapigpig rok.

²⁴Ka fini tabab ngay ni nge muruwliy mi ni fek bagayad i yib ngak ni bay in e million e dollar ni malfith rok fa’anem ngak.

²⁵Ma de gaman e salpiy ni bay rok nra thang e malfith rok ngay, ma aram me yog e masta rok ni ngan pi’ fa’anem nge bpin rok nge bitir rok ni chuway’ ngar manged sib, ma ku errogon urngin ban’ en rok ni ngan pi’ ni chuway’ nge yag ni nge math e malfith rok.

²⁶“Me ragbug fare tapigpig u p’eowchen fare masta rok me wenig ngak ni ga’ar, ‘Mu gum’an’ nigem rog, ya bay gu fulweg urngin e salpiy rom!’

²⁷Me kireban’ fare masta rok ngak, me n’ag fan u wan’ fare malfith rok fa’anem ngak me pag fa’anem nge yan.

²⁸“Me yan fare mo’on nga wean me mada’nag reb e tapigpig ko fare masta rok ni bod ir, ni bay in e dollar ni malfith rok fa’anem ngak. Me thiy pa’ ngak nge dun’uf k’angan ni be ga’ar, ‘Mu fulweg ngog e salpiy ni mfek rog ni malfith!’

²⁹Me ragbug fare tapigpig ni yow u p’eowchen nga but’ nge wenig ngak ni ga’ar, ‘Mu gum’an’ nigem rog, ya bay gu fulweg e salpiy rom!’

³⁰Machane dabun; ma aram me yog ni ngan kol nga nin’ nga kalbus nge yan i mada’ ko ngiyal’ nra thang e malfith rok riy.

³¹Ma fa’ani guy e tin kabay e tapigpig e n’en nike rin’ fa’anem, me ri taganan’rad miyad yan ngak e masta rorad ngar weliyed murung’agen fa’anem ngak ni gubin.

³²Me pining fare masta fare tapigpig rok nge yib ngak nga naun. Me ga’ar ngak, ‘Dariy ban’en ni gabfel’ ngay, i gur e binir e sib! Kug n’ag fan u wun’ug urngin e salpiy ni malfith rom ngog, ni bochan e mwenig ngog.

³³Ere susun e ka ga ra runguy e re tapigpig ni gimew nem, ni bod rogon ni gu runguyem.’

³⁴Ma kari puwan’ e re masta nem, ma aram me pi’ fare tapigpig ngan fek nga kalbus ni ngan gechignag nge yan i mada’ ko ngiyal’ nra math fare malfith rok riy ni urngin!”

³⁵Me museg Jesus ni ga’ar, “Ireram rogon e n’en nra rin’ e Chitamag nu tharmiy ngomed ni fa’anra dabi bigimed me n’ag fan u wan’ e n’en nib kireb nike rin’ reb i walagen ngak.”