Mateo 15

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Na parava tara e huriki a Pariseo, a mari na vinara na lotu ri pea e Ierusalem ri valai ri gi masia e Isu. Ri nanea,

²“E huriki a murimuri vomu, i navai ri longotaro a vilo ne huriki a gare hosi? I uka ma ri loi taro a limane ria muga ni kani!”

³E Isu i koli, i ta maea, “Pali mua, i navai mu longotaro a vinara na Vure mu gu muri mai a vilo hosi?

⁴A Vure i vakuku maea, ‘Mu togo e kinane mua e tamane mua.’ I ta maea tabu, ‘E rei a viri i harogi e tamana e kinana, ni gi rabalaki.’

⁵“Pali mua mu taki ta a viri ge takia e tamana e kinana, ge ta maea, ‘A kinori ta ga habi marua vona, a habi pali na Vure.’ Mu takia i kamumu nahea ge togo e tamana e kinana.’

⁶Na naro iea, mu longotaroa a nitana Vure, mu gu ramai kunana a narone mua.

⁷Mua e huriki a tabele rua! E Isaia i ta muholi na tahuna i taki virihi mua na nita propet i ta maea,

⁸“‘Re huriki nga, ri taki ta ri togo iau, pali i uka ma ri ngaru muholi iau.

⁹Ri kavurike tavula iau; ri tovo e huriki na vinara tavula na bakovi, ri takia ta a vinara na Vure.’”

¹⁰Muri e Isu i gale valai e huriki, i ta maea, “Mu talangaki valai, mu longokilalea a nitagu.

¹¹A maki i dili na ngavana bakovi i uka ma i ratea ge katoki na matana Vure. A maki i ratea i katoki na matana Vure, a maki i pagitala na ngavana.”

¹²Muri e huriki a murimuri vona ri vakalongoa, ri ta maea, “E huriki a Pariseo ri longoa a nitamu, i madihi a hatene ria vona.”

¹³Pali e Isu i koli mule, i ta maea, “A maki lobo e Tata na Hunu i uka ma i varo, bara ni lipu tala.

¹⁴Naha ria. Ri ngaru ni vakasiri a dala ne huriki, pali ri manga a kepa. Pali a kepa, bara i toni ni tulia a kepa, rua varago bara ru boru puru na lovo.”

¹⁵Muri e Petrus i ta maea, “O tuveve poloa ne mia a pelegona nivakakika.”

¹⁶Lakea e Isu i taki ria, “Ra mua, i uka ma mu longokilala ma a nitagu?

¹⁷I kavakava. A maki i dili na ngavamu bara i puru na kavutumu, muri i pagitala na kakaimu.

¹⁸Pali a ngava i pagitala na ngavana viri i valai na hatena, i ratea i katoki.

¹⁹A maki hale nga ri pagitala na hatena bakovi: a niluhoi hale, a naro ni rabalaki a viri, a molenga, a panahoa, a marapusianga, a nipadimomo.

²⁰A naro nga ri rata a bakovi i katoki na matana Vure. Pali a viri i uka ma i loi a limana muga ni kani, i uka ma i ratea ge katoki.”

²¹Muri e Isu i pea a tanga iea, i lakea na tabeke ne Tair, e Sidon.

²²A ngatavine o Kenan tara i made vonga. I valai ne Isu, i ta dagi, i ta maea, “Bakovi Dagi, hamone Davit, o dodo iau! E tugu a ngatavine i dili vona a hanitu, i ratapilea.”

²³Pali e Isu i uka ma i taratotoa. Muri e huriki a murimuri vona ri taki torea, ri ta maea, “O tonoa a ngatavine iea ge vano. I gale vilihui ne teu.”

²⁴Pali e Isu i koli, i ta maea, “A Vure i rudu valai iau ga kori kunana a kabu ne Israel, ri manga a maka sipsip ri velu.”

²⁵Pali a ngatavine i turume puru na ngalana, i ta maea, “Bakovi Dagi o tuhori iau!”

²⁶E Isu i koli, i ta maea, “I uka ma i kamumu ni gi bole a maki ni kani ne huriki a koma, ni gi voro lakea na ligo.”

²⁷A ngatavine i koli, i ta maea, “Bakovi Dagi, o ta muholi. Pali a ligo ranga ri kani poi a momona maki ni kani.”

²⁸Lakea e Isu i koli, i ta maea, “Ngata­vine, o luhoi tora hateka iau! Ge bele manga a hini o ngarua ge bele.” I mavonga, e tuna ngatavine i tavaga mala­viriri kunana.

²⁹Muri e Isu i malaga vonga, i laho na dahana Darilomu e Galili. Muri i sike na dahana lolo, i made puru.

³⁰E huriki ala kupo ri valai vona, ri tuli valai vona e huriki a vaha hale, e huriki a kepa, e huriki a beu, e huriki a ngavarubu, turana e huriki ranga. Ri taparaki ria na ngalane Isu. Lakea i vakamahuri ria lobo.

³¹E huriki lobo ri turutu na tahuna ri matai e huriki a ngavarubu ri ta, e huriki a beu ri tavaga, e huriki a vaha hale ri laho tabu, e huriki a kepa ri matapara. Lakea ria lobo ri kavurikea a Vure ne Israel.

³²Muri e Isu i gale palupu e huriki a murimuri vona, i ta maea, “Iau a dodo e huriki nga. Ri made turagu na parava i tolu pali. I uka ma ri kani. Pali ngane a koi ni rudu hamule ria, ma ge vurea a matane ria na dala, a vuhuna ri vitolo.”

³³E huriki a murimuri ri koli, ri ta maea, “Pali si gi bole vai a bret koea na tabeke i ngeki, ge kara e huriki nga? Ri ala kupo hateka.”

³⁴Lakea e Isu i nana ria, “I riva bret mu tahoka?” Ri koli, ri ta maea, “Mi tahoka a bret i polorua, a manu kiroko ranga.”

³⁵Lakea i taki e huriki ri gi made puru na malala.

³⁶Muri i bole a bret i polorua, a manu kiroko ranga, i kavurikea a Vure. I keve, i habi ne huriki a murimuri ri gi veru ne huriki.

³⁷E huriki lobo ri kani, ri maru. Muri ri tahoni na kulopi i polorua a kalavana maki ni kani.

³⁸E huriki a bakovi ri kani ri ala rangale va (4,000). A ngatavine, a koma i uka ma ni gi.

³⁹Muri e Isu i rudu e huriki ri gi hamule lakea na tanga ne ria. I rike na aga ia, i lakea na tabeke ne Magadan.