Matoosa 15

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Qasseka Yerusalameppe yida Farsaaweetinne Muse woga tamarsizayti Yesusakko shiiqidi

²“Nena kaallizayti kase nu aawata woga aazas dhayssizoo? Quma maanas kushe mecetetenna” gida.

³Yesusikka istas “Inte inte wogas giidi Xoossa azazo ays shaaretii?

⁴Xoossi ‘Ne aayiyonne ne aawa boncha; ba aawa bolla woykko ba aayi bolla iita qaala haasayidaddey hayqo!’ gi azazides.

⁵inte gidikko ay asikka ba aawa woykko ba aayo ‘Ta intes ooththanas bessizaz ay miishekka Xoossas yarsho ooththa shiishadis’ giikko,

⁶‘He addezi ba aawa woykko ba aayo bonchides’ geeta; hessa gish inte woga gish Xoossa qaala shaareta.

⁷Inteno, qoodheppe qommon hanizayto! Isayaasi inte gish yootishe ‘Hayssi derey tana duunan xalala bonchees; woznay gidikko taappe haakkides; mela hada tana goynnees; ista timirteykka asi woththida woga’ gididi sinthafe hananayssa yootidayssi tumakko” gides.

¹⁰Yesusi asaa baako xeygidi “Siyite woznan woththite.

¹¹As tunisizay izaade duunara ha kezizayssafe attin duunara duge gelizay tunisenna” gides.

¹²Qasse iza kaallizayti izakko shiiqidi “Farsaaweeti ne gidayssa siydi hanqettidayssa eradii?” gida.

¹³Izi istas “Ta Aawa saloyssi tokkonta mithi wurikka dhoqallettana.

¹⁴Ista aggagite isti qooqeti kaalethiza qooqeta gidida gish, qooqeti qooqe kaalethikko nam7ay issoy issara oyketidi aafon wullana” gides.

¹⁵Phexroosi Yesusa “Ne yootida leemisoza nuus birsha” gides.

¹⁶Izikka “Inte ha7i gakkanaska eribeekketa guussee?

¹⁷Duunara gelizay wuri duge qanthe kanthidi gede kare kezizayssa ereketii?

¹⁸Duunara kezizay gidikko woznappe pultees. As tunisizay hessa.

¹⁹Iita qofay, shempo wodhoy, laymay, laymatanas qaaqatoy, kaysoy, wordo markatethinne asa sunth mooroy wuri woznappe pultees.

²⁰As tunisizay haytantafe attin kushe mecetonta muusi as tunisenna” gides.

²¹Yesusi heeppe kezidi gede Xiroosenne Sidoona geetettiza dere bides.

²²Issi Kanaane macassi dizaara he heerappe kezada Yesusakko yaada “Godo, Dawute nawu! Taas miisheta! Ta naya tuna ayanay oykkin keeha waayawus” gaada waassadus.

²³Gido attin izi issi qaalakka izis zaaribenna. Histin he wode iza kaallizayti izakko shiiqidi “Nuna kaalla kaalla waayssiza gish ne izo moyzikkochii?” giidi iza oychida.

²⁴Izikka istas “Tani Isra7eele keeththafe dhayida dorsatakko xalala kiitetadis” gides.

²⁵Macasayakka Yesusa toho bolla kundada “Godo! Tana maaddarki!” gadus.

²⁶Izikka izis zaaridi “Nayta kath ekkidi kana butulatas yegganas bessenna” gides.

²⁷Izakka “Ee Godo; butalatikka ba goda maaddappe gaden wodhdhida kath maxi meettes” gadus.

²⁸Hizgin Yesusikka macasayo “Hanne macasaye, ne ammanoy gita! Ne koyda mala nees hano” gides. Macasay nayakka heerakka paxadus.

²⁹Yesusi heeppe dendidi Galila Abba lanqe biidi heen diza issi zuma bolla kezi uttides.

³⁰Qoodan daro derey wobeta, qooqeta, silata, haasayonta duudeta harataka daro harganchata ehidi iza sinthan woththides; izikka ista pathides.

³¹Duudey haasayishin, toho silay paxishin, wobey siti giidi hamutishin, qooqey xeellishin beyidi asay malalettides; Isra7eele Godakka galatides.

³²Yesusi bana kaallizayta xeygidi “Asay tanara heedzdzu gallas gam7ida gishshinne maana kaththi baynda gish asay tana michees. Oge bollan gafan daaburidi kundonta mala mela ulora yeddanas koyikke” gides.

³³Iza kaallizayti “Hayssan aykkoykka baynda bazzo biittan hayssa keena dere mizanas gidiza quma nu awappe demmanee?” gida.

³⁴Yesusi ista “Intes aappun ukethi dizee?” gi oychin istika “Laapun ukethinne qii guutha moleti deettes” gida.

³⁵Izikka derezi gaden uttana mala azazides.

³⁶Laapun ukethanne moleza ba kushen oykkidi galatidappe guye menthidi bana kaallizaytas immides; istika deraas gishida.

³⁷Asay wurikka miidi kallides; Yesusa kaallizayti asaappe attidayssa laapun leemate kumeth shiishida.

³⁸Midaytikka naytinne macasay baynda addeti xalala oyddu shi gidida.

³⁹Yesusi dereza moyzidappe guye wogolon gelidi Megidoone geetettizaso bides.