1Miaŋgö andöŋe Farisi (Köna keugö kapaŋkölköl) aka Köna keugö böhi tosatŋan Jerusalem sitiyök Jisösgöreŋ kaba kewö qesim waŋgiget,
2“Göhö gwarekurupkan wuanöŋgöra köna walöŋda ambösakoninaŋgö silikŋini qeze? Yeŋön mönö böröŋini saŋgoŋda dom-amöt qahö qeba töndup könahiba nene neze?”
3Mewö qesim waŋgigetka kewö jii mötket, “Nanŋinak mönö wuanöŋgöra ambösakoninaŋgö silikŋini wuataŋgöbingöra köna walöŋda Anutugöreŋ jöjöpaŋ keu qeze?
4Miaŋgö keuŋi kun kewö: Anutunöŋ kewö jim kutuyök, ‘Iwinamgi mönö göda qem etkimakŋan,’ aiga ‘Kunŋan iwiŋi me namŋi qesuahömawi, i mönö qegetka kömuma.’
5“Mewö jim kutuyökmö, iŋini keu mi oŋgita kewö jimakze, ‘Kunŋan iwiŋaŋgöra me namŋaŋgöra kewö jima: Wösöni mötzal. Nöŋgö naŋgönaŋgö yuaini buŋa qem aŋgubanak, mi lök Anutugö saiwap naluköra kewöta albi ahöza. Kunŋan mewö jiba iwiŋi me namŋi göda qem waŋgimawaŋgö dop qahö akza.’
6“Mewö jiba silikŋini walŋaŋgöra aka Anutugö jöjöpaŋ keuŋi utalgetka omaŋi aka pömsöm qemakza. Mi qahö dop kölja.
7O urumeleŋgö silesile ambazip, kezapqetok azi Aisaianöŋ mönö eŋgö könaŋamŋini törörök qeljiŋe indela kewö jii ahöza,
8‘Ambazip kambu kiaŋön mönö numbu jitŋinan ölöpŋanök göda qem niŋgimakzemö, uruŋinan nönöŋgan ak niŋgiba kungen algetka köröwen ahöza.
9Mewö ahöiga nöŋgö waikni öne töhön memba möpöseim niŋgimakze. Köna keu kusum eŋgibin, jiba salupŋe ambazip yeŋgö jimkutukutuŋini mi numbu o alakze.’” Mewö meleŋ eŋgiyök.
10Jisösnöŋ ambazip kambu kunbuk eŋgoholi kagetka kewö jii mötket, “Iŋini mönö keu ki kezap ala möt asarime.
11Yuai azigö numbuŋeyök uruŋe gemakzawi, miaŋön qahö tölohom waŋgimakzapmö, nanŋi numbuŋeyök keu erakzawi, miaŋön mönö tölohom waŋgimakza.”
12Mewö jii mötketka gwarekurupŋan kaba kewö qesiget, “Farisi (Köna keugö kapaŋkölköl) yeŋön keu mi mötket eŋgui uruŋinan bölizawi, mi mötzan me qahö?”
13Qesigetka kewö meleŋnök, “Nöŋön warök pakpak nöŋgö Suep Iwinan qahö kömöröhi, mi mönö jalöŋinambuk qözölmam.
14Muat, i mönö eŋgömosötme. Yeŋön ‘Jegömöl ambazip eŋguaŋgitpin,’ jimakzemö, nanŋini jeŋinan mönö gömöliza. Jegömöl kunŋan jegömöl alaŋi kun böröŋe memba waŋgitma ewö, yetkön mönö mohotŋe lömnöŋ geba etkuma.”
15Mewö meleŋniga Pitönöŋ jiyök, “Dopkeu miaŋgö könaŋi mönö jim asarinöŋ mörin.”
16Mewö jiiga Jisösnöŋ jiyök, “O alaurupni, iŋini mewöyök toroqeba mötmötŋini ölöpŋi qahö akze me?
17Yuai pakpak azi numbuŋeyök uruŋe gemakzawi, mi kömgokŋe geba yaigep erakza. Mi möt kutuze me qahö?
18“Mi erakzapmö, keu uru könömŋeyök kota numbuŋeyök erakzawi, miaŋön mönö tölohom waŋgimakza.
19Ambazip uru könömŋineyök yuai kewöŋi asuhuba korakza: Keu bölöŋi mötmöriba suŋa jinaŋ memba ambazip eŋguget kömumegö mörakze. Qesabulum aka serowilin akingö mörakze. Yoŋgorö membingö mörakze. Jitnöŋ alal keu muneŋi jibingö mörakze. Andöqeqe keu yöhösaŋ jiba Anutu mepaiköbingö mörakze.
20Yuai mewöŋan mönö ambazip tölohom eŋgimakzapmö, böröŋini qahö saŋgoŋda nene nemakzei, miaŋön azi kun qahö tölohomakza.” Mewö.
21Jisösnöŋ Genesaret gölme mosöta siti qetŋiri Taiö aka Saidon mietkö distrik qetŋi Fonisia miaŋgö uruŋe anök.
22Aniga Kenan ambi, gölme miaŋgö toŋi kunŋan kaba Jisös uleta kewö qeta jiyök, “Kembu, Deiwidkö gwölönarökŋi, mönö ak kömum niŋgiman! Ömenöŋ böratni kölköljiŋjiŋ ak waŋgiiga sihimbölö ketaŋi mörakza.”
23Qeta jiyökmö, Jisösnöŋ keu kun qahö meleŋnök. Mewö aiga gwarekurupŋan kaba kewö kuŋgum waŋgiba jiget, “Ambi mi sahöta qeta könanine kazawaŋgöra mönö bauköm waŋginöŋga anma.”
24Mewö jigetka meleŋnök, “Iwinan Israel könagesögö lama sohosohoŋi miyöhök amöt qem eŋgimamgöra aka melaim niŋgiiga kazal.”
25Mewö meleŋniga ambi miaŋön kösutŋe kaba simin köl waŋgiba jiyök, “Kembu, mönö bauköm niŋginöŋ!”
26Mewö jiyökmö, Jisösnöŋ kewö meleŋ waŋgiyök, “Qahö, morö yeŋgö miriŋineyök beret memba kiam eŋgiinga qahö dop kölbapuk. Juda nini kianurup eŋgö qetŋini kiam qerakzin. Nöŋön mutuk Juda ambazip bauköm eŋgibiga kantri tosatŋi eŋön mönö kiamgö dop mamböta malme.”
27Meleŋ waŋgiyökmö, ambinöŋ jiyök, “Kembu, mi ölöp mötzalmö, kiam moröŋi yeŋön mönö mewöyök toŋinaŋgö tebolnöhök nene boromŋi eriga nemakze.”
28Mewö jiiga Jisösnöŋ kewö jii mörök, “O ambi, göhö mötnaripki mi ketaŋi. Miaŋgöra ulet niŋgizanaŋgö ölŋi mönö asuhuma.” Mewö jii möta böratŋan aua miaŋgöreŋök ölöwahök. Mewö.
29Jisösnöŋ gölme mi mosöta kaba Galili o aŋgögö jitŋe kaŋgota kunduŋe öŋgöba eta tarök.
30Tariga ambazip kambulelembenöŋ yaŋgöreŋ kaba ambazip kewöŋi eŋguaŋgitket: Simalokon aka jegömöl ambazip, tosatŋi köna böröŋini heramheramgöŋi, tosatŋi keuŋini mötökŋi aka kawöl tosatŋi gwötpuk eŋgöhöi malgeri, mi eŋguaŋgita Jisösgö köna kösutŋe al eŋgigetka mem ölöwak eŋgiyök.
31Mem ölöwak eŋgiiga ambazip keuŋini mötökŋi yeŋön keu jigetka köna böröŋini heramheramgöŋi yeŋön ölöwaka diŋgigetka simalokon yeŋön köna tiba anda kagetka jeŋini döndöŋgöŋi yeŋön je uba eketka ambazip kambu yeŋön mi eka welipköba Israel neŋgö Anutunini möpöseiget. Mewö.
32Jisösnöŋ gwarekurupŋi eŋgoholi yaŋgöreŋ kagetka kewö jii mötket, “Nöŋön ambazip kambu kieŋgöra wösöni mötzal. Yeŋön nöŋgöreŋ kaba wehön karöbut lök mala kotketka neneŋini qahöwahiga ekzal. Könanöŋ anda mala kembaŋe jeŋini gili tirinbirin akepuköra i öne melaim eŋgimamgö töközal. Miaŋgöra i nene gumohom eŋgimamgö mötzal.”
33Mewö jii gwarekurupŋan meleŋda kewö jiget mörök, “Gölme qararaŋkölkölŋe kiaŋgöreŋ neŋön mönö denikeyöhök numbu nene gwötpuk miwikŋaiba ambazip kambulelembe ki gumohom eŋgibinak?”
34Mi möta Jisösnöŋ kewö qesim eŋgiyök, “Eŋgöreŋ beret dawik ahöza?” Qesim eŋgiiga “Beret 7 aka söra moröŋi tosatŋi ahöza,” jiget.
35Jigetka Jisösnöŋ ambazip kambu mi gölmenöŋ geba tatmegöra jim kutum eŋgiiga geba tatket.
36Geba tatketka beret 7 aka söra mi memba Anutugö saiwap jiba mindipköba gwarekurupŋi eŋgiiga yeŋön mi ambazip kambu dop toto qem eŋgiget.
37Toto qem eŋgigetka nemba nem timbireŋ-göget. Nem timbireŋgöba nene kitipŋi mosötket geyöhi, mi sakap 7 miaŋgöreŋ qezakögetka numbuŋe qeyök.
38Azi nene negeri, yeŋgö jaŋgöŋini mi 4000. Ambi nahönbörat yeŋgö jaŋgöŋini mi qahö meget.
39Jisösnöŋ ambazip kambu melaim eŋgiiga angetka nanŋi waŋgenöŋ öŋgöba Magadan gölmenöŋ anök. Mewö.
