1Mürin ekoch Farisi me Sensen Allük ra feito ren Jesus seni Jerusalem. Iwe, ra aisini,
2“Pwota noumw kewe chon kaiö ra aleasolap ngeni ekewe kapasen kait seni ach kewe lewo? Pun resap talü pöür lon pwüngün allük mwen ar mongö.”
3Jesus a pölüeniir, “Nge pwota ämi oua aleasolap ngeni än Kot kewe allük o aleasochis ngeni mine ämi kewe lewo ra aiti ngenikemi?
4Pun Kot a apasa, ‘Kopwe asamolu semom me inom’, a pwal apasa, ‘Iö a otteki saman me inan epwe fokun ninnila.’
5Nge ämi oua aiti ngeni aramas, pwe are eman nau a wor ren och mettoch epwe tongeni alisi ngeni saman are inan, nge a üra, ‘Ei mettoch än Kot,’
6esap chüen wor lomoten än ewe nau epwe asamolu saman are inan ren ewe mettoch. Iei usun oua aücheangauei än Kot allük, pwe oupwe föri mine ämi kewe lewo ra aiti ngenikemi.
7Ämi chon likatuputup! A fokun pwüng mine Aisea a fen osuni usumi!
8‘Kot a apasa: Ekei aramas ra asamoluei ren ar kapas, nge leluker a wesewesen toau seniei.
9A lomotmwäl ar fel ngeniei, pun ra aiti ngeni aramas förien aramas allük usun itä nge ai kewe allük!’”
10Mürin Jesus a körato ewe mwichen aramas o üreniir, “Oupwe aüselingaei, pwe oupwe wewela!
11Esap wor och mine a tolong lon awen eman aramas a tongeni alimengaua, nge met mi towu seni lon awen eman aramas, ina mine a alimengaua.”
12Mürin ekewe chon kaiö ra feito ren Jesus o üreni, “Ka silei pwe ekewe Farisi ra chou ren mine ka apasa?”
13Jesus a pölüeniir, “Iteiten irä Semei lon läng esap fotuki epwe üttütä.
14Ousap ekieki usur! Ir chon chun mi emweni ekewe chon chun. Nge lupwen eman chon chun a emweni eman chon chun, ir me ruoman repwe turulong lon pwang.”
15Petrus a üreni, “Kopwe awewe ngenikem wewen ei pworausen awewe.”
16Jesus a üreniir, “Ifa usun, oua chüen pwal wewemang usun ekewe lusun?
17Ousap weweiti pwe meinisin mine a tolong lon awen eman aramas a tolong lon chükükanan, mürin a towu seni lon inisin.
18Nge ekewe mettoch mi towu seni lon awan ra pop seni lelukan, ina mine a alimengaua eman aramas.
19Pun seni lon lelukan a towu ekiek mi ngau, ekiekin ninni, lisowu, mocheisou, solä, chofona me aitengaua aramas.
20Ikkei ekewe mettoch ra alimengaua eman aramas. Nge än eman epwe mongö, nge esap mwo talü pöün, esap limengau ren.”
21Mürin Jesus a feila seni ewe leni o feila lon eu fanü arap ngeni ekewe telinimw Tirus me Siton.
22Iwe, eman fin Kanaan mi nom lon ena leni a feito ren o kökkö ngeni, “Ai samol, Nöün Tafit, kopwe tongeei. Nei nengin a fokun riaföü, pun eman anün rochopwak a wäni.”
23Nge Jesus esap pölüeni an kapas. Iei mine nöün kewe chon kaiö ra feito ren o tüngormau ngeni, “Kopwe tinala neminei, pun a chök kökköto me mürich.”
24Mürin Jesus a pölüeniir, “Kot a chök tinieila ren ekewe sip mi mwalechela, ir ekewe aramasen Israel.”
25Nge ewe fefin a feito, a fotopwäsuketiu o tüngorei, “Ai samol, kopwe alisiei!”
26Jesus a pölüeni, “Esap pwüng pwe sipwe angei anen ekewe semirit mongö o monei ngeni ekewe kolak.”
27Iwe, ewe fefin a pölüeni, “Ewer, ai samol, nge ekewe mwo kolak ra mongö ekewe mworomworen mongö mi mworotiu seni än ar masta chepel.”
28Mürin Jesus a üreni neminewe, “En eman fefin mi watte om lükülük! Epwe fis ngonuk mine ka mochen.” Iwe, lon ewe chök otun nöün we nengin a pöchökületä.
29Iwe, Jesus a feila seni ewe leni o a fetalela ünükün ewe nomun Kalilea. Mürin a feitä won eu chukuchukutä o mottiu ikenan.
30Eu mwichen aramas mi chomong a feito ren, ra uweato ekewe mi pechemä, ekewe mi chun, ekewe mi ter, ekewe mi awemwöch, pwal chomong sokun aramas mi samau o anomuur arun pechen Jesus. Iwe, a apöchöküleeretä meinisin.
31Iwe, ekewe aramas ra fokun mairü lupwen ra küna pwe ekewe mi awemwöch ra fos, ekewe mi ter ra pöchökülela, ekewe mi pechemä ra fetal, pwal ekewe mi chun ra küna mwer. Iwe, ra mwareiti ewe Koten Israel.
32Mürin Jesus a körato nöün kewe chon kaiö o üreniir, “Ngang üa fokun tongei ekewe aramas, pun ra fen nonom rei lon ükükün ülüngat rän, nge iei esap wor och mine repwe äni. Ngang üsap mochen tiniirela lon ar echik, pun repwe tongeni mamasaroch lupwen repwe fetal ngeni lenier.”
33Ekewe chon kaiö ra aisini Jesus, “Ia sipwe tongeni künakün me ie mongö pwe epwe naf ngeni ach sipwe amongööni ei mwichen aramas mi chomong?”
34Jesus a aisiniir, “Fiteföü pilawa a wor remi?” Ra pölüeni, “Füföü me ekoch kükün ik.”
35Iei mine Jesus a allük ngeni ewe mwichen aramas pwe repwe mottiu lepwül.
36Mürin a angei ekewe füföü pilawa me ekewe ik o iotekin kilisou ngeni Kot wor. A kiniretiu o ngeni ekewe chon kaiö, nge ekewe chon kaiö ra aineti ngeni ekewe aramas.
37Iwe, ir meinisin ra mongö o mötüla. Mürin ekewe chon kaiö ra amasoua fisu chüük ren lusun ekewe mongö.
38Iwe, iteiten ekewe mwän mi mongö ei mongö ükükün rüanüngeröü, nge esap alealong fefin me semirit.
39Mürin Jesus a tinala ekewe aramas, nge i a tötä won efoch wa o sai ngeni ewe fanü Makatan.
