1Geb degi, Garda-Narmaked-Dulemar, Fariseoʼmar-Jerusalénʼgi-danimalad Jesúsʼse nonimargu, Jesúsʼga sogdemalad:
2—¿Ibiga be-sapingan dadgan-Igar-Maidgi-wede yoledimala? ¿Ar ibiga be-sapingan masgunned-iduar argan enukdasurmala?
3Jesús abin-sogded: —¿Ar ibiga bemarmode dadgan-igar-maidba-daed-ular, Bab-Dummad-Igar-Maidgi yoledimarmosunna?
4Ar Bab-Dummad sogsad: ‘Be-bab-nug-odummodii, degi, be-nan-nug-odummodii be nanamalo.’ Éxodo 20:12; Deuteronomio 5:16 Degine: ‘Dule, e-bab-ukabsasale, e-nan-ukabsasale, we-dule, oburgwilegoed.’
5”Ar emigindi, bemardi soged: ‘Ar doa e-babga sogdibe, e-nanga sogdibe: Geg an be-bendakye, ar bela-an-ibmar-nikadi, bato an Bab-Dummadga uksaye.
6Degisoggu, a-dule, e-bab-bar-bendaksulir, degi, e-nan-bar-bendaksulir, gwen akarsurye.’ Ar weyob be be-dadgan-igar-maidba-daed-ular, Bab-Dummad-Igar-Maidgi be yoledimardo.
7¡Bemar wagar-darbodamalad! Ar nabir Bab-Dummad-gayaburba-barsoged-Isaías, epenne bemarnik sogsagusad, deun Bab-Dummad-sogye sogsagusgu:
8‘We-dulemar unnila asginbi an-nug odummomalad, ar e-gwage-ulubgindi angi gwen binsasurmalad.
9Ar binsa asginbi an-nug odummodimalad. E-igar-maid odurdakedi, dulemar-igar-mesisadba bur odurdakmalad.’ ”
10Degi, Jesús dulemar-bukidar-bukwadse gotegu, amarga sogded: —Nue bela be an-itomalo:
11Ar masgunned dule-oichosulid. Dule galagwensuli-sunmakerdi, adi, dule-oichodo.
12Geb degi, e-sapingan Jesúsʼse walik-gunonigua, ega sogdemalad: —¿Be wisi, emi Fariseoʼmar weyob be-ibmar-soge-itoarmargu, sae-itodmalad?
13Jesús, abin-sogded: —Ar an-Bab-nibneggi-maid sapi-digsasulidi, e-sailanagase a-sapi ungoed.
14Mer be Fariseoʼmar bai-dake. Ar ibyasuliyob gudidimalad, amar aku-atakmalad-iduedmalad. Ar dule-ibyasulid, dule-ibyasulid-idumaile, ebobela neg-gullu-dummadgi argwanmaloed.
15Pedro, Jesús-abin sogded: —We, be ibmar-burbar-soged, masgunned-dule-oichosulid, wede, ¿ibu obare? Anmarga be oduloge.
16Jesús abin-sogded: —¿Ar bemarmode amba aku-itomarmoga?
17¿Ar bemar aku-itoge, bela masgunned, unnila sabanse uboddaed, degi, geb gannar mileddabalid?
18Ar dule-galagwensuli-sunmakeddi, e-gwagegi deyob-binsaed noardaed. Degisoggu, deyob-sunmakeddi, dule-oichosundo.
19Ar dule-gwagegi binsaed-isganamar ainiardaed: Iblomalad, ome-dikarba yolemalad, degi, sui-dikarba yolemalad, na abirgunagwarsuli negsichigi nanamalad, ibmar-atursamalad, gakansaar aimar-barsoged, isdar-dulemargi-sunmaked.
20Ar we-ibmarmardi, dule-oichomaladdo. Dule argan-enuksuli-mas-gunneddi, dule-oichogedsulid.
21Jesús Genesaretʼgi-gudiid, Tiro-yarse, degi, Sidón-yarse nade gusad.
22Agi ome-wargwen, Judíoʼsulid, Cananeaʼgined, a-yalaganba-daniki, binnasur Jesúsʼse gordani gusad. Weyob ese gordani gusad: —¡Dummad, David-Wagwa, wile be an-dake! An-bunagwa sabsur niasamaid.
23Ar Jesúsʼdi gwen abin-imaksasulid. Geb degi, Jesús-sapingan Jesúsʼse nonimargu, egi wilenaigusmalad, ega sogdemalad: —We-omega be soge, be naye. Ar anmar-sorba binnasur gordanikid.
24Jesús abin-sogded: —An barmilealidi, dulemar-baiganse an barmilearsulid. Unnila Israel-dulemar-sibad-wawaadyob-yoggus-gudimaladse an barmilealid.
25Degi, geb ome Jesús-abin yokorgi signonikid, ega sognonikid: —¡Dummad, be an-bendake, anga an-bunolo be nudake!
26Jesús abin-sogded: —Be Judíoʼsursoggu, an be-bendakele, mimmigan-mas achuga-uknaiyob an imako-itole. Ar mimmigan-mas achuga be ukoye igar maisulid.
27Ome, Jesús-abin sogded: —Dummad, nabir be sogendo. Ar degi-inigwele, achumarse-bakar, sunna mimmigan-mas mese-urba-batemamaid gunmogad.
28Geb Jesús, ome-abin sogded: —Ome, ibibayobi be an-bensuli. An bega be-bunolo an nudakoed. Degisoggu, deyob be ibmar-egisnaid gusun. Ar a-wachigi e-bunolo yog nuguar naded.
29Jesús Tiro-yargi, degi, Sidón-yargi, bangudgua, Galilea-mata-dummad-naidse nonikid. Geb degi, Jesús yargi-nakwisgu, agi sigidapid.
30Agi dulemar-bukidar Jesúsʼse nonimalad, ese senonimalad: Dulemar-muya-muya-nanamalad, dulemar-ibyasurmalad, dulemar-geg-sunmakmalad, swida-burgwarmalad, degi, bukidar dulemar-galagwensuli-uellemalad. Bela wemala, Jesús-nagaba mesnonimalad. Jesús amar bela nudaksagusad.
31Degisoggu, bela dulemar-bukwamalad dakdegu, Jesús, dulemar-geg-sunmakmalad sunmak imaksa, dulemar-swida-burgwarmalad nudaksa, dulemar-muya-muya-nanamalad nabir-nanae imaksa, dulemar-ibyasurmalad mag-dake imaksa, dulemala, geger dakdemalad. Degisoggu, Israel-Bab-Dummad-nug odummodmarsunnad.
32Degi, Jesús e-sapinganse gochagua, amarga sogded: —We-dulemar an nue-wile daked. Ar ibapaagus anmarba bipirmakdanimalad, masgunned sate gudimalad. Degisoggu, an mas-gunsuli dulemar-barmidele, abakalegi igarba negoearmalale.
33Geb degi, e-sapingan abin-sogdemalad: —We-dulemar-ichesulid-masgi-ogunnegala, ¿ar wede bia anmar neg-dulesulidgangi mas-ichesur amimalosunna?
34Jesús e-sapinganga sogdebalid: —¿Gwabigwa be madu nikmarsunna? E-sapingan abin-sogded: —Wis anmar madu-gwagugle (7) nikmalad, wis ua-burwi ichesaar nikbalid.
35Jesús dulemar-bukidarmalad napagi sigega imaksad.
36Jesús madu-gwagugled-susgua, degi, uamar-susbargua, Bab-Dummadga dog-nuedye sogded. A-sorba, madu, degi, ua, bisge-bisge imaksagu, e-sapinganga ukded. Geb degi, e-sapingan dulemarga mimidmogad.
37Bela dulemar madu-guchamargu, degi, ua-guchamargu, nue-immelesmalad. Jesús-sapingan mas-gwabgusad bela wesmargu, garba-gwagugle (7) enosmalad.
38Bela madu-guchamalad, degi, ua-guchamalad, macherganbi milibake-mergu (4,000) daklealid. Omegan, degi, mimmigandi gwen obarilesulid.
39Degi, Jesús dulemar-barmisgu, urgi nakwissunnad. Geb degi, Magdala-yalaganse nadsunnad.
