1Ti dxi biree caadxi fariseu ne caadxi maistru de ley Jerusalén, uyé ca ra nuu Jesús, ne na ca rabi ca laabe:
2―Xiñee cuchaa ca discípulu stiu' ca costumbre stinu pue, purti qué riguiibi ná ca ora go ca' casi bisaana ca bixhoze gola nu.
3Para rabi be laaca': ―Laatu ya', xiñee cuchaa tu mandamientu sti Dios pur ca costumbre ni napa tu ca.
4Purti ndi nga ni na Dios guni tu: ganaxhii tu bixhoze tu ne jñaa tu. Ne laca na, tutiica cu' dí bixhoze o jñaa la? naquiiñe gati'.
5Peru laatu rabi tu bixhoze tu ne jñaa tu: “Ni ñacaniá laatu ca, ma bidiee Dios.”
6Ne ma qué rulabi ru tu laaca', ne zacá pur ca costumbre ni zeda za lade tu la? napa tu stiidxa Dios casi xiixa de enda riguite.
7Nanaxhi ruaa tu peru rusiguii si tu. Para laape tu nga ni uní' Dios de ruaa profeta Isaías, ra na:
8Ca binni ri', nanaxhi ruaa ca ne naa, peru ladxidó' ca nuu zitu de naa.
9Pur gana si rusisaca cabe naa, purti de laasi cabe riale ni rusiidi cabe.
10Oraque guridxi Jesús irá binni nuu raqué ne na rabi laaca': ―Laucaa diaga ne laguiene chaahui ndi':
11Cadi pur ni chu' ndaani ruaa binni nga guni pur uchee né Dios, sínuque pur ni riree de ndaani ruaa cabe nga runi pur uchee né cabe Dios.
12Ratu si que bidxiña ca discípulu ra nuu be ne na ca rabi ca laabe: ―Ñee biiyu pabiá' naná biaba ni uníu' ca ca fariseu la?
13Para na be rabi be laaca': ―Irá yaga ni cadi Bixhoze bizuhuaa la? ziaaxha dede xcu.
14Zaa nuu cabe nacheepa lú cabe, peru racala'dxi cabe inaaze cabe ná stobi. Ne pa inaaze ti lú cheepa ná sti lú cheepa la? iropa ca ziaba ca ndaani barranca.
15Para na Pedru rabi laabe: ―Bisiidi laadu ni uníu' numbá que.
16Oraque na be: ―Ñee nin laatu ca'ru guiene tu la?
17Qué ganna tu pa irá ni chu' ndaani ruaa binni riaba ndaani', ne de raqué ridi'di ni la?
18Peru irá ni riree de ruaa cabe, zeeda ni de ladxidó' cabe ne nga ni runi pur uchee né cabe Dios.
19Purti de ndaani ladxidó' cabe reeda ni cadi jneza ni cá ique cabe guni cabe: guuti cabe binni, o chu' né cabe ni cadi xheela cabe, gapa cabe jnadxii cabe, cuana cabe, indisa cabe falsu luguiá stobi, cu' dí cabe binni.
20Zacá huaxa ruchee né cabe Dios, peru pa go cabe gueta sin qui'bi ná cabe la? nga cadi cuchee cabe.
21De raqué biree be uyé be neza Tiro ne Sidón.
22Raqué nuu be beda nanda ti gunaa de Canaán laabe, zeda yuni ridxi: ―Biá naa, Señor, xiiñi David, purti naaze binidxaba xiñe dxaapa ne cayuuti laabe.
23Peru qué niní' be gasti'. Para biree ca discípulu, na rabi laabe: ―Gudxi laabe che be, purti zeda yuni be ridxi nanda be laanu.
24Para na be rabi be laaca': ―Ra nuu si cani za de Israel biseenda Bixhoze naa, purti cananiti ca casi dendxu'.
25Peru óraque bidxiña gunaa que ra nuu be bizuxibi xañee be na rabi laabe: ―Señor, ucané naa.
26Para na be rabi be laa: ―Cadi jneza gaxha cabe pan xiiñi cabe para gudii cabe bi'cu'.
27Oraque na: ―Nanna, Señor, peru laca ro bi'cu bigú ni riaba xa mexa sti xpixuaana'.
28Para na be rabi be laa: ―Rihuinni dxichi runi cre lu', zune ni canaba lu ca. Ne oraqueca bianda xiiñi gunaa que.
29Biree Jesús de raqué, uzá uriá nisa Galilea que, ne de raqué udxi'ba lu ti dani ne gurí.
30Raqué zuba be bidxiña jma binni laabe, bedané ca cani nachiita ñee, ne cani nacheepa lú, ne cani qué riní', ne cani nachanga ná' o ñee, ne stale ru binni huará. Gudixhe ca binni que laaca xañee be ne bisianda be laaca'.
31Nabé bidxagayaa ca binni que ora bi'ya ca ma bianda irá ni bedané ca que. Cani qué ñanda niní' ma riní', ne cani qué ñanda nusigaa ná', ma rusigaa ná'. Cani qué ñanda nizá ma rizá, cani qué ñanda niná ma riná, ne irá xixé ca cusisaca ca Dios sti Israel.
32Oraque guridxi be ca discípulu stibe ne rabi be laaca': Caya'ya ca binni ri purti ma chonna gubidxa nuu né cabe naa ne qué gapa cabe ni go cabe. Qué na'ya guseenda laacabe sin go cabe, paxa ora gueda guiaba cabe neza.
33Para na ca discípulu que rabi laabe: Peru ndaani gui'xhi ndi nuu nu. Paraa ndi chi ndee nu ni go irá binni ri'.
34Oraque rabi be laaca': Panda ga pan napa tu ya'. Para na ca': Gadxe, ne chupa chonna benda huiini'.
35Oraque gudxi be ca binni que cui ca layú.
36Ne gucuaa be gadxe pan ne ca benda que, bidii be diuxquixe Dios ne gundaa be ni lú ca discípulu que, de laaca ma bidii ca ni ca binni que.
37Gudó ca binni que dede bidxá ca', ne biaana ru jma nandahui dede bidxá gadxe dxumi de ni biaana que.
38Bigaba bia' tapa mil hombre ni gudó dxi que, sin nigaba gunaa ne ba'du'.
39Ne óraque gudxi be ca binni que ma zanda che ca', para udxi'ba be ndaani ti canuá dede yendá be neza Magdala.
