Mataiyo 15

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Paliseya yo laugagayo taulauhekataena hekadiyo Yelusalema unai se laoma na Yesu se henamaiyei se wane,

²“Idohagi to yom hekahekatao kada kulutubu yodi kabikabi laugagayona se utusi? Nimadiyao meta nige se deulidi na se kaikai.”

³Yesu ye hededelau udiyedi ye wane, “Na idohagi to komiu kami kulutubu yodi kabikabi debanaena Yaubada yona laugagayo kwa utusi?

⁴Doha Mose yona laugagayo unai Yaubada ye wane, ‘Tamam yo sinam ku hekasisiyeidi.’ Yo ye wane, ‘Ena kaiteya tamana yo sinana ye hededeheyababadi meta bena kwa koihemwaloi.’

⁵Unai ta kita meta Yaubada ye henuwa bena tamada yo sinada ta saguidi. Na komiu kwa hedede kwa wane, ‘Gonowana tamowai hesau ye hededelau tamana yo sinana udiyedi ye wane, “Yogu kainauya bena ya haiyawa kabasaguigomiu wa meta ya talamyeiyako Yaubada unai.”’

⁶Kabikabi ta kwa talamyei, na tama yo sina hekasisidi meta nige! Yomi lauhekata ta unai kwa laupwanokalili. Yaubada yona laugagayo wa kwa tolebasiyeidi na kami kulutubu kabikabidiyao mo kwa miyamiyaidi.

⁷Komiu taukailupolupo! Aisaiya yona hedehedede meta ye mamohoi, doha komiu hedehededemiu ye hededenonohaiyako ye wane,

⁸‘Teina tamowai ta sopagaibudi mo udiyedi se hekasisiyeigau na nuwamamohoidiyao udiyedi meta Yaubada nuwanuwatuna nigele.

⁹Yodi tapwalolo kaliguyena meta nige kaniyodi. Laugagayo saha se lauhekataedi meta tamowai mo se ginaulidi.’”

¹⁰Kabo Yesu boda ye yogagogoidima na ye hededelau udiyedi ye wane, “Kwa lapulapuinamwanamwa na saha ya hedededi ta kabo kwa nuwatulobaidi.

¹¹Ginauli saha kawamyena ku kai ye dobi meta iya nige gonowana ye hebikigo, na saha luwam ne unai ye saema kawam ne unai ye pesa meta kabo ye hebikigo.”

¹²Kabo Yesu yona hekahekatao se laoma iya unai na se wane, “Yom hedehedede ta unai meta Paliseya bodadi se kouyalayalakalili.”

¹³Ede Yesu ye hededelau udiyedi ye wane, “Tamagu galewa ne unai taumiya, iya kaiwa sahasahadiyao nige ye kumaidi meta kabo ma lamdi ye suluhihaidi.

¹⁴Kwa laugabaedi se miyawa, siya tauwoyawoya matagibugibudiyao. Taba taumatagibugibu hesau yona hali taumatagibugibu ye woyai, meta kabo se bekulabulabuidobi duhaena.”

¹⁵Na Petelo ye hededelau Yesu unai ye wane, “Taba gonowana kabahebikida heyaheyasonina wa kaniyona ku hededehemasalaha kalimaiyena.”

¹⁶Ede Yesu ye hededelau udiyedi ye wane, “Idohagi, sola ma nuwapwanopwanomiu?

¹⁷Nige kwa nuwatulobai? Saha kawada ta unai ta kai meta ye dobi bogada ne unai na kabo ta miyagabaei.

¹⁸Na hedehedede saha kawamiuyena se pesama meta nuwamiuyena se masalahama, siya tauhebikigomiu ede.

¹⁹Matawuwuna ede nuwada ta udiyedi kabo nuwatu yabayababadi se masalahama, kaiunu, ganawali, laulaubikibiki udoiꞌudoi, kaiwahali, hedehededelupolupo, yo hinage tamowai hededeheyababana.

²⁰Teina laulau ta, siya tamowai tauhebikina ede. Na ena nimamiu ma bikidi na kai kwa hai kwa kai meta nige gonowana se hebikigomiu.”

²¹Kabo Yesu teha Galili ye laugabaei na ye sae teha Taiya yo Sidona udiyedi.

²²Na Kanana waihiuna hesau temenai taumiya ye laoma Yesu unai ye kaibwadalakilaki ye wane, “Guiyau, Dawida natuna, ku katekamkamnaegau! Yaluwa yababana hesau meta ye luwu natugu sinesinekukuna unai na ye hekasiyebwakaliliyei.”

²³Na Yesu nige saha hesau ye hedede waihiu wa unai. Kabo yona hekahekatao se wane, “Waihiu ta ku hetamali ye tausuwala, matawuwuna ede ye dahikwatakwatakalili.”

²⁴Ede Yesu ye hedehedede ye wane, “Tamagu ye hetamaligauma ta meta Isalaela yodi mamoe tautaukwadaleledi hesabadi.”

²⁵Kabo waihiu wa ye laoma ye tulibonodobi Yesu matana wa unai na ye kaibwada ye wane, “Guiyau, ku saguigau!”

²⁶Yesu ye hededebui ye wane, “Nige ye dudulai bena wawayao kadi kai ta haidi na ta gabalaedi kedewa udiyedi.”

²⁷Na waihiu wa ye wane, “Guiyau, mamohoi, na iyamo kedewa kadi tanuwaga yona hatahataena kana kai mapuladi se bekudobi meta kabo kedewa ne se laoma se kaidi.”

²⁸Unai Yesu ye hededelau unai ye wane, “Waihiu, yom sunuma meta ye lakikalili! Unai saha ku kaibwadai meta kabo ye masalaha.” Mahanana ne unai waihiu wa natuna sinekuku wa ye namwanamwa.

²⁹Yesu teha Taiya yo Sidona ye laugabaedi na ye uyo Galili, na Galili Gabwana dedekanaena ye yona ye lau. Ye lau ede ye sae kuduli gagilina hesau unai, na ye tuli.

³⁰Kabo bodalakilaki se laoma na taukasikasiyebwa se laedima, kasiyebwa doha taubunibuni, taumatagibugibu, tamowai kae yo nima yabayababadiyao, unaꞌunadi yo taukasikasiyebwa hekadi hinage se laedima Yesu unai, ede maudoidi ye henamwanamwadi.

³¹Unai boda wa se siliyatakalili, matawuwuna ede matadiyena tauꞌunaꞌuna se hedehedede, taubunibuni ye henamwanamwadi, tamowai kae yabayababadiyao se laulau yo taumatagibugibu matadiyao se lala yo se kaikewa. Na Isalaela yodi Yaubada se hedebasae.

³²Yesu yona hekahekatao wa ye yogagogoidima na ye hededelau udiyedi ye wane, “Tamowai ta ya katekamkamnakaliliyedi, matawuwuna ede mayadai haiyona inai maiyadao na nige sola kai hesau se kai, unai nige ya henuwa ma hasalidi na ya hetamalidi se lau. Taba ma hasalidi na se lau kabo kedaena hasahasali ye haidi na se guli.”

³³Na se hededebui se wane, “Teina balabalagaibu ta unai kabo haedi kai ta hai na boda ta ta hekaidi?”

³⁴Yesu ye henamaiyedi ye wane, “Pwalawa hisa kalimiuyedi?” Ede se wane, “Pwalawa haligigi-labui yo yama habuhabuludiyao hisa ede teina.”

³⁵Ede ye hededelau boda wa se tulidobi bwatano wa unai.

³⁶Kabo pwalawa yo yama wa ye haidi na ye hededelautokisae Yaubada unai, ye kihidi na ye moseidi hekahekatao wa kalidiyena, na se soiyedi boda wa udiyedi.

³⁷Boda wa se kaikai meta maudoidi bogadiyao se sese. Na kadi kaitole wa hekahekatao wa se tanoi na se usagogoi meta bosa haligigi-labui se hemwayaudi.

³⁸Taukaikai bodana wa unai meta tatao badodi 4,000, na sinesineo yo wawayao nige se hasilikesegaidi.

³⁹Kabo Yesu boda wa ye hetamaligwaligwalidi. Na yawalana ye lau kabo waga hesau unai ye gelu se lau teha Magadani.