Matäuj 8

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹A LAO kotido jan nin dol o, pokon kalaimun idauendo i.

²A kilan, ol tuketuk amen ap kodo poni i indada: Main, ma re kotin kupura, re pan kak on kamakele ia da.

³I ari kotin kapawei lim a, jair i, majani: I men, koe en makelekel; ari, a tuketuk ap madan modi jan.

⁴Iejuj ap kotin majani on i: Kalaka, koe de kaireki amen; a kola kajale on jamero pein uk, o kida mairon eu, me Mojej majani, pwen kadede on irail.

⁵A lao kotilon on nan Kapernaum, jenturion amen apedon i poeki re a.

⁶Indada: Main, ai ladu wonon nan deu a jomau kokon madak ap wairok kaualap.

⁷Iejuj ap kotin majani on i: I pan kola kakelailada i.

⁸Jenturion japen potoan on: Main, i jowar ren kotilon on nan im ai; a ren majani eta, ai ladu up pan kelailada,

⁹Pwe aramaj amen nai, me mi pan mana en kaun akan, ap kaunda jaunpei kai. A ma i pan indan amen: Kowei, a pan kola, o on amen: Kodo, a pan kodo, o on ai ladu: Wiada met, a pan wiada.

¹⁰Iejuj lao mani mepukat, ap kotin puriamuiki, majani on irail me idauendo: Melel I indai on komail, jon en pojon wet I jo diaradar, jota nan Ijrael.

¹¹A I indai on komail, me toto pan kodo jan maj en lan, o kapin lan, ian Apraam, o Ijaak, o Iakop ni tepel nan wein nanlan.

¹²A me pweledan wei pan lokidokila nan rotorot liki, iei wajan maiei o teterok.

¹³Iejuj ap kotin majani on Jenturion o: U kowei, a pan wiaui on uk duen om pojon. A ladu o ap kelailadar ni auer ota.

¹⁴Iejuj lao kotilon on nan im en Petruj, ap majani, me jaulap a wonon jomau karakar.

¹⁵I ari kotin jair pa a, a karakar ap ko jan. I ari pauridar papa i.

¹⁶A lao jautik penaer re wa don i me toto, me tewil oko ti poa. I ari kotin kaujeki jan nen akan a majan o kakelada me jomau kan karoj.

¹⁷Pwen pwaida, me lokido ren jaukop Iejaia, me majani: A kotin ale on pein i atail luet akan, o wa atail jomau kan.

¹⁸Iejuj lao kotin majani aramaj toto pokon don i, ap kotin majani, ren kotela palio palilan jed o.

¹⁹Jaunkawewe men ap pwara do potoan on i: Jaunpadak i pan idedauen ir waja karoj re pan kotila ia.

²⁰Iejuj kotin majani on i: Pokj akan por arail mia, o manpir en pan lan paj arail mia, a Nain aramaj jota wajan kaulawei mon a.

²¹O amen jan nan pun en japwilim a tounpadak kan potoan on i: Main re kotin mueid on ia en kola maj jarepedi ai papa.

²²A Iejuj kotin majani on i: Idauen ia do! Me melar akan en jarepedi pein ar melar akan.

²³A lao kotida pon jop o, japwilim a tounpadak kan idauenla i.

²⁴A kilan, ap onionidar nan jed, iluk kan ari kadupaledi jop o, a i kotin jaimokelar.

²⁵Japwilim a tounpadak kan ap kai don i, kaupada i, potoan on: Main, re kotin dore kit ala, kit pan mela!

²⁶A ap kotin majani on irail: Komail me pojon tikitik, da me komail majak ki? I ari kotin kipadar majani on an o jed, ap molelar kaualap.

²⁷Aramaj akan puriamuiki indada: Daduen men et, me an o jed kin peiki on?

²⁸A lao kotin lei on palio nan jap en men Kerkajin, ol riamen, me tewil oko ti poa, ap tu on i; ira kodado jan nan joujou kai, me makar kaualap, o jota me kak weid waja o.

²⁹A kilan, ira weriwer indada: Iejuj Japwilim en Kot, da me kit en wia re omui? Kom kotido kame kit mon anjau o leler?

³⁰A pwin pwik kalaimun mi kaila wei manamana jili.

³¹Tewil oko ap poeki re a indada: Ma kom pan kauje kit ala, ap mueid on kit, en tilon nan pwin pwik o.

³²I ari kotin majani on irail: U ko on! Irail keredi jan, rap tilon nan pwin pwik o. A kilan, pwin pwik o tandaui, tanedi on waja ukedi nan jed, irail ari mopelar nan pil o.

³³Jilepa kan ap tandaui tanlon on kanim o kakaireki meakaroj, duen me wiaui on me tewil ti poa ko.

³⁴A kilan, toun kanim koiei jan pokon don Iejuj. Irail lao kilaner i, rap poeki, a en kotila jan jap arail.