Mateo 8

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Cuöc hualtemoac de ipan tepietl, tiehualtocaya meyac giente.

²Hua necö sente tlöcatl sa söhuayo ohuöla, hua tiemabesutiöya. Oquejto: ―Tlöcatzintle, mach tomonequitis, cuale teniechmopajtelis.

³Hua omösohualuc Jesús, hua oquemötocaque. Oquejtojque: ―Necneque; xepajte. Hua sa nima icocoles opajtec.

⁴Yecuöquenu Jesús oquelfejque: ―Xequejta, amo öque xequelfe tli metzpasöro. Cache xebeya, xomotieijtete ica teopexque. Hua xetlacuetlabilte inu bentle tli otlanahuate Moisés, para ma quematecö yejua lo que tli omochi ca taja.

⁵Hua ocalacoac Jesús ipa inu puieblo de Capernaum. Cuöquenu ohuöla tietlac sente capetö, hua tietlajtlötlajte,

⁶hua otieyelfe: ―Tlöcatzintle, notlatequepano betzteca ompa nochö cojcultzi, ca lalebes checöhuac tietunie.

⁷Hua Jesús oquelfejque: ―Naja neyös hua necpajtis.

⁸Hua onöhuat inu capetö, hua oquejto: ―Tlöcatzintle, amo necmeresieroa para tomocalaquis ipa nochö. Cache sa xomojtalfe sente tlajtule, hua notlatequepano pajtes.

⁹Pues naja nuyejque necpea que nequenneltocas tli cache quepea autoridad que naja. Hua nuyejque nequenpea soltörojte tli niechneltoca naja. Hua tlö nequelfea sente: “Xebeya niepa”, yaja iya. Hua tlö nequelfea ocsente: “Xehuöla”, yaja yebitz. Hua tlö nequelfea notlatequepano: “Xecchihua ini”, pues yaja quechihua. Ejqueu necasojcömate que tejuatzi tomopilea checöhualestle para tomopajtelis notlatequepano ca sente tlajtule.

¹⁰Hua cuöc Jesús oquecajque ini nönca, oquetietzöbejque. Hua oquemelfejque quiejquech tietocaya: ―Melöhuac nemiechelfea, que nimpor inca giente de Israel amo onecniexte tönto lalebes meyac neltoquelestle quiename quepea ini nönca tlöcatl, mös amo de Israel icaca.

¹¹Hua nemiechelfea que huölösque meyac giente de cöneca quisa tunale hua de cöneca calaque tunale. Yejua motlölisque itlac Abraham, hua Isaac, hua Jacob, ompa elfecac cöne Deus tlamandöruro.

¹²Pero meyactie de nemejua tli nenjoriojte, tli nemiechtocörusquea para nenquepeasque pörte ca ompa, nemiechtlajcalesque ca queyöhuac ipa tlajtlayohuaquelestle. Ompa nenchojchucasque hua nemotlantesesque.

¹³Yecuöquenu oquelfejque inu capetö: ―Xebeya, hua san quiene ca tomoneltocac ma ejqueu mochihua. Hua itlatequepano opajtec ipa inu ura.

¹⁴Hua obiloac Jesús ipa ichö Piero. Ompa oquejtaque imontiesyo Piero betztaya ipa tlapechtle ca totunealestle.

¹⁵Hua oquemötocaque imö, hua totunealestle oquecö. Hua yaja omie hua tietlamacaya.

¹⁶Hua cuöc omochi ca ye yohuac, quenhualecaque tietlac meyactie tli quepeaya demunios. Hua oquenquextejque inu demunios sa ca sente tlajtule, hua oquenpajtejque innochtie tli mocojcocoöya.

¹⁷Ejqueu omochi lo que tli omojto por icamacopa tlayulepante Isaías, cuöc oquejto: Sie yejuatzi oquemönele tococoles, hua oquebicaque totuniejcöyu.

¹⁸Hua cuöc oquejtaque Jesús que meyac giente tieyehualojtaya, otlanahuatiluc ma panucö ca icuetlapa ötiescatl.

¹⁹Hua oaseco sente tlamachtiöne de teotlajtule, hua otieyelfe: ―Maestro, temetzmotoquelis cöne beletes tomobicas.

²⁰Hua Jesús oquelfejque: ―Coyume quenpea inustuhua, hua tutume tli patlöne ipa yejyecatl quepea intepasol; cache naja, öque onochi netlöcatl, amo necpea cöne necsiebis notzonteco.

²¹Hua ocsente de tiemachtejcöhua otieyelfe: ―Tlöcatzintle, xeniechmocöbele ma nebeya cachto, ma nectlölpachute notöta.

²²Hua Jesús oquelfejque: ―Xeniechtoca; xequencajcöhua que mimejque ma quentlölpachucö inmimejcöhua.

²³Hua cuöc yejuatzi ocalacoac ijtec börco, tiemachtejcöhua nuyejque ocalajque.

²⁴Yecuöquenu omochi sente bieye öyejyecatl ipa ötiescatl, que inu börco cöso motlapachoöya ca ötzintle. Cache yejuatzi cochihuaya.

²⁵Hua omopachojque tiemachtejcöhua, hua otieixetejque. Otieyelfejque: ―¡Tlöcatzintle, xetiechmomöquextele, pues temequesque!

²⁶Hua yejuatzi oquemelfejque: ―¿Tlica nemomajtea? Lalebes nemiechpoloa neltoquelestle. Yecuöquenu neyehualuc, hua quemajajuaque yejyecatl ca tiehua ötzintle. Hua sa nima omoquetzque complietamiente.

²⁷Hua inu tlöca oquetietzöbejque. Oquejtojque: ―¿Tli tlöcatl iloac ini nöiloac? Pues hasta yejyecatl hua ötzintle tieneltoca.

²⁸Hua cuöc yejuatzi onaxihuato ca nie löro intzölö giente de puieblo de Gadara, tienömequeco unte tlöca tli quepejpeaya demunios. Inu tlöca hualquistiejque de ijtec mejcöcoyocme. Petzoteque oyejyeya lalebes, que hasta nionöque abele panuya ipa inu nieca ojtle.

²⁹Cuöc yejua tieijtaque Jesús, otzajtzeque, hua oquejtojque: ―¿Tli tecpea tejua ca taja, öque teca teiconie Deus? ¿Otehuöla necö para tetiechmacas tiecoco antes ases ura?

³⁰Hua tepetzi bejca de yejua oyejyeya meyactie petzome tlajtlacuajtenemeya.

³¹Entunses inu demunios otietlajtlötlajtejque, otieyelfejque: ―Tlö tetiechquextis, xetiechcöhua ma tecalaquecö imijtecopa inu meyactie petzome.

³²Hua oquemelfejque: ―Xeyöcö noso. Hua yejua oquistiejque de imijtec tlöca, hua uyajque inca petzome. Hua ye ompau innochtie inu niecate petzome omomiemeröjque omotietepexebito ijtec ötiescatl. Hua innochtie omejmejque ijtec ötzintle.

³³Hua inu giente tli quentlajtlacualtejtenemeya petzome ochucholojtiejque. Cuöc oaseto ipa puieblo, oquepujque noche sösantle hua tli omochi inca inu tlöca tli quepeaya demunios.

³⁴Yecuöquenu, noche tlöca de inu puieblo otienömequeco Jesús, hua cuöc otieijtaque, tietlajtlötlajtejque ma quixoa de intlöl.