Matäuj 21

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹NI arail koren ion Ierujalem o lel on Petpake impan dol Oliwe, Iejuj ap kotin poronela tounpadak riamen.

²Majani on ira: Koma ko on nan kanim monen, a madan koma pan diar ejel amen, me jalidi, o na pul mi imp a, lapwa ira da, ap kare don ia!

³A ma meamen pan indan koma meakot, koma pan indada: Kaun o men dake, i ari pan madan kadar ira do.

⁴A mepukat karoj wiauier, pwen pwaida, me lokido ren jaukop o me majani:

⁵Kaireki nain Jion jeripein: Kilan, om Nanmarki kotido re om. A kotin opampap o kaipokedi pon ejel li amen.

⁶A tounpadak ko lao kolar, o wiadar duen Iejuj kotin majani on ira,

⁷Ira ap wado ejel o na, ap irepadi po ’ra arail likau kan a ap kotin kaipokedi poa.

⁸O pokon kalaimunia irepadi arail likau kan nani al o, a akai paledier ran tuka kan irepadi nani al o.

⁹A pokon o, me tion moa, o me idauen, nijinij indada: Ojiana on japwilim en Dawid! Meid iajanai me kotido ni mar en Kaun, ojiana nanlan.

¹⁰A lao kotilon on nan Ierujalem, toun kanim ap mokimokid indada: Ij i?

¹¹Pokon o katitiki: Nan i Iejuj, jaukop en Najaret en Kaliläa.

¹²Iejuj ap kotilon on nan im en kaudok en Kot, ap kotin kaje jan karoj, me kin netinet nan im en kaudok, o kotin wukededi tepel en jaunkawilian moni ko, o deun men netin muroi.

¹³O kotin majani on irail: A intinidi: Im ai pan adaneki im en kapakap, a komail wia kilar deu en lipirap.

¹⁴A me majkun o me jikil akan poto don i nan im en kaudok o; i ari kotin kakel irail adar.

¹⁵A jamero lapalap o jaunkawewe kan lao kilaner manaman akan, me a kotin wiadar, o jeri kan nan im en kaudok, me nijinij indada: Ojiana on japwilim en Dawid! Irail ap makara kidar,

¹⁶Indai on i: Kom jota mani, me mepukat katitiki? A Iejuj kotin majani on irail: Ei, komail jaikenta doropwe: Jan nan au en jeri o me kin kan didi, ir me kotin kapwaiadar kapin eu?

¹⁷I ari kotin muei jan irail, kotila jan nan kanim o, koti don Petanien o pweiokidi waja o.

¹⁸A ni manjan ni a kotin purlan kanim o, ap men konotedar:

¹⁹A kotin majani tuka pik pot ni kailan al o, ap kotilan i. A jota, me a kotin diaradar, pwe ta eta, ap kotin majani on i: Koe jolar pan wa kokolata! A tuka pik ap madan monedier.

²⁰Tounpadak kan lao kilaner, irail ap puriamui kidar indada: Daduen tuka pik o madan monelar.

²¹A Iejuj kotin japen majani on irail: Melel I indai on komail, ma komail pojon, ap jota peikajal, kaidin met eta, me wiaui on tuka pik en, me komail pan kak wiada, pwe ma komail pan indan nana wet: Mokid wei lokidokila nan madau, nan a pan pwaida.

²²O meakaroj komail pan poeki ni omail kapakap, ap pojon komail pan ale.

²³A lao kotilon on nan im en kaudok o, jamero lapalap akan o jaumaj en toun jap o ap ko don i ni a kotin kaukawewe indada: Manaman en ij, me komui wiaki mepukat? O ij me ki on komui manaman wet?

²⁴A Iejuj kotin japen majani on irail: I pan pil kalelapok meakot re omail, ma komail pan japen ia, I pil pan indan komail manaman en ij, me I wiaki mepukat.

²⁵En Ioanej a paptaij a tapi jan ia? Men nanlan de me ren aramaj? Irail ap lamelame nan pun arail katiti, ma kitail pan inda men nanlan, a pan majani on kitail: Da me komail jo pojonki i?

²⁶A ma kitail inda, me ren aramaj, kitail majak pokon o, pwe karoj kin wia jaukopki Ioanej,

²⁷Irail ari japen Iejuj potoan on: Kit jota potoan. I ari pil majani on irail: I jota pil pan indai on komail, manaman en ij, me I wiaki mepukat.

²⁸A iaduen omail lamelam? Aramaj amen naineki ol riamen. A kola ren amen indan i: Lao, kola ran wet dodok nan ai mat en wain.

²⁹A japen indada: I jota mauki; a mur ekij a kalukila, ap koieila.

³⁰O a kola ren me teio indai on pil dueta. I me japen indada: Ei main; ap jota kola.

³¹Ari, ij re ’ra, me wiadar injen en jam a? Irail potoan on i: Men maj o. Iejuj kotin majani on irail: Melel I indai on komail, jaunopwei o me nenek kan pan mo ’mail pedelon on nan wein Kot.

³²Pwe Ioanej pwara don komail, padapadak on komail duen al pun, a komail jota kamelele i; a jaunopwei o me nenek kan kamelele i. A komail lao kilaner, komail jota kalukila, pwen kamele i.

³³Komail ron pil apot karajeraj! Kaun pan im amen padukedier mat en wain eu o kele pene, ap weiradar deun men wunid wan wain, o kauada im en daulik eu, ap kajile kin i on jaumat akai, o momaitelar nan wai.

³⁴A lao anjau en rak, a kadaralan jaumat akan a ladu kai, pwen ale a wan wain.

³⁵Jaumat akan ap jaikedi a ladu kan; re woki amen, kamela amen, a amen me re kate.

³⁶A pil kadarala ladu kai, toto jan men maj, Irail ari wiai on irail pil dueta.

³⁷A ikmuri a kadara won irail na ol majani: Nan re pan majak nai ol.

³⁸A jaumat akan lao kilaner ol o, irail ap kajokajoi nan pun arail: I me pan ale jojo, ukodo kitail en kamela i, a kitail pan id ale a jojo.

³⁹Irail ari jaikedi i o kajapoke jan i nan mat en wain o, o kamela i.

⁴⁰Ari, monjap en mat en wain lao pwarado, da me a pan wiai on jaumat pukat?

⁴¹Irail potoan on i: A pan kamela aramaj jued pukat, ap pan neki on akai jaumat a mat en wain o, me pan ki on i wan wain ni anjau me kon on.

⁴²Iejuj ap kotin majani on irail: Komail jaikenta doropwer nan kijin likau kan: Takai o, me jauje kan kajapokelar, ap id wialar takai en pukakaim. Mepukat wiauier ren Kaun o, men kapuriamui patail?

⁴³I me I indai on komail, wein Kot pan japadoke jan komail, ap ko on eu kainok, me pan kida wa.

⁴⁴O meamen pupedi on pon takai wet, pan ola, a meamen me a pan pupedi on poa, a pan pitaki pajan i.

⁴⁵A jamero lapalap o Parijär akan lao ronadar a karajeraj akan, re mulikiadar, me a kotin karajeraje kin irail.

⁴⁶Irail ari majamajan jili en jaikidi i, a re majak aramaj akan, pwe re wia kin i jaukop amen.