Matiu 8

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Totoso taluarae gore pule mae pa toqere se Zisu, si moatana sa puku vinarigara tie pu luli koa Sa.

²Meke mae hoqa todoṉo pa kenuna Sa si keke tie popoquna meke zama, “Baṉara, be guana hiva Goi, si boka va via au mo Goi,” gua si asa.

³Ke qaqama la nia Zisu sa limana koasa tie popoquna meke tiqua Sa si asa meke zama, “Hiva tugo si Rau, ke mamu via tu ba goi,” gua si Asa. Meke pa totoso tugo asa si via sa tie koasa nana minoho.

⁴Beto asa si zama la ia Zisu si asa, “Mu lopu la vivinei nia pa tie si hie, ba mamu la vata dogoro pule nigo koasa hiama pude mani vilitigo. Beto hoi mamu la tavetia sa vina vukivukihi vinulasa sapu tozia sa Tinarae d te Mosese, pude va sosodea koari na tie sapu ele via si goi,” gua si Asa.

⁵Totoso nuquru la pa vasileana Kepaniami se Zisu, si mae koa Sa si keke koimata varipera tadi na tie Roma, meke tepa tinokae si asa koe Zisu.

⁶Zama si asa, “Baṉara, sa qua nabulu si moho sisigiti, korapa eko si asa pa qua vetu; lopu boka niu, na koa ta sigiti hola si asa,” gua si asa.

⁷Meke zama se Zisu, “Leana maqu atu salaṉia.”

⁸Ba olaṉa sa koimata, “Koi, lokari Baṉara, lopu na tie gotogotoqu si arau pude kaqu mae ia Goi sa qua vetu. Mamu zama nia mo sa zinama pude mani magogoso sa qua nabulu,” gua si asa.

⁹“Arau ba hoke zamai mo sari qua tie varipera koasa ṉiniraṉira sapu poni nau ri qua palabatu, pude ‘La’ gunia rau si keke, si la mo si asa. Pude ‘Mae’ gunia pule rau si keke si, mae tugo si asa. Pude zama ia rau sa qua nabulu, ‘Tavetia hie,’ gua, si tavetia tugo sa,” gua si asa.

¹⁰Totoso avosi Zisu sari nana zinama gua asa tanisa koimata, si magasa hola Nana, ke zama la si Asa koari na kobi tie pu luli koa Sa, “Maqu tozi va hinokarani gamu, sapu lopu ele dogoria Rau keke tie Izireli sapu raṉeraṉe kekeṉoṉo gua sa tie hie.

¹¹Tozi hinokarani gamu Rau sapu soku rina tie Zenitailo si kote mae guadi pa doduru kasia popoa, meke kaqu habotu somanae koari Ebarahami, e Aisake, meke e Zekopi pa inevaṉa koasa Binaṉara Maṉauru.

¹²Ba sari na tie Ziu pu ta vizatadi pude somana, si kote ta gona vura koasa butubutu baṉara te Tamasa la pa korapa huporo dudukurumu. Vasina pu kote kabo, na garata livodi si arini.”

¹³Meke tiqe zama la koasa koimata se Zisu, “Mu pule mua, mani ta evaṉa tugo gua sapu va hinokaria goi,” gua si Asa. Meke pa totoso tugo asa si ta salaṉa sa nabulu mohona tanisa koimata.

¹⁴Totoso kamoa Zisu sa vetu te Pita, si dogoria Sa sa kaleqe roana e Pita, korapa eko nana pa teqe, na moho nunuare si asa.

¹⁵La taṉinia Zisu sa limana, meke magogoso nana sa kaleqe, ke tekulu si asa meke va tana ponia ginani sa se Zisu.

¹⁶Pana veluveluna asa, si turaṉa mae ni rina tie koe Zisu sari soku dia tie pu nuquri na tomate kaleadi. Hipuru pani Zisu pa Nana zinama sari na tomate kaleadi, meke salaṉi Sa sari doduru pu moho.

¹⁷Evaṉia Zisu sa tinavete hie pude tava gorevura gua sapu zama nia e Aisea sa poropita te Tamasa, sapu guahe: “Ele salaṉi Sa sari nada minoho na vinagauru,” gua.

¹⁸Meke totoso dogoria Zisu sa puku vinarigara pu mae vari likohae nia, si ria i Sa sari Nana disaepeli pude karovo la pa kali karovona sa kopi Qaleli.

¹⁹Meke keke rina tie va tumatumae koasa Tinarae te Mosese si mae meke zama la koa Sa, “Baṉara, maqu luligo pa doduru vasina pu la i Goi.”

²⁰Ba olaṉa la koa sa se Zisu, “Sari na kurukuru ṉame na kurukuru tapuru ba hite ari dia qoqoro na vori tu, ba sa Tuna na Tie, si loke Nana vasina soti pude eko magogoso.”

²¹Keke ri Nana disaepeli si zama la koa Sa, “Baṉara, kekenu Mu va malumau pude la pomunu paki nia sa tamaqu,” gua si asa.

²²Ba olaṉa la ia Zisu si asa, “Vekoi saripu matedi pude madi pomunu ni sari na tie matedi. Ba agoi si mamu luli Au mo,” gua si Asa.

²³Meke suraṉa pa koaka se Zisu meke sari kasa Nana disaepeli, meke toka la si arini pa kali karovona sa kopi Qaleli.

²⁴Meke raza mae gana sa raneboṉi koasa kopi, meke puzakia na ololobagea sa koaka, ba se Zisu si korapa puta gana.

²⁵Ke va vaṉunia ri kasa disaepeli si Asa, meke zama ia rini, “Harupu gita Baṉara, tata mate si gita,” gua si arini.

²⁶Meke olaṉa la i Zisu si arini, “Na vegua ke matagutu si gamu? Hiteke hola sa mia rinaṉeraṉe!” Tekulu si Asa, meke norea Sa sa givusu na kolo, ke bule nodolo va hodaka nana.

²⁷Magasa beto sari doduru meke vari zamai teledia, “Na tie sa si guahe, ke va tabea tu rina givusu na bogusu,” gua si arini.

²⁸Totoso hogoto se Zisu pa kali karovona sa kopi, pa popoa Qadarini, si vura mae guadi koari na bae popomunuana sari karua tie pu ta higorae tomate kaleadi, meke mae koe Zisu. Hoke kokoa koari na lovu vasina sari kara. Variva matagutu sari karua tie hire, ke loke tie si hoke hiva ene hola gua pa siraṉa vasina.

²⁹Sipu dogoria tugo ri kara se Zisu, si gagaemana mo sari kara, meke zama, “Agoi na Tuna Tamasa, nasa si hiva taveteni gami Goi? Hiva va kilasa gami Goi pa tinasigiti sipu lopu ele kamo sa rane vinaripitui?” gua sari kara.

³⁰Lopu seu vasina si koa nana si keke rovana boko lavata, korapa ganigani gedi.

³¹Meke tepa koe Zisu sari na tomate kaleadi, meke zama, “Pude hipuru pani gami Goi, si Mu garunu lani gami koasa rovana boko hoi,” gua si arini.

³²“Ego, la!” gua se Zisu. Ke taluarae sari na tomate kaleadi koari karua tie, meke la nuquru koari na boko, taluarae sari na boko hire, meke haqala gorea rini sa taba, meke la hoqa suvu pa kopi meke lodu mate beto.

³³Meke govete la pa vasileana sari na tie pu kopudi ri na boko, meke la vivinei ni rini sari doduru ginugua pu ta evaṉa koari karua tie pu koa i na tomate kaleadi.

³⁴Ke topue la tutuvia ri doduru tiena sa vasileana se Zisu, meke sipu dogoria rini, si tepa ia rini si Asa pude taluarae taloa pa dia popoa.