Mateu 8

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Morarame Jezu tyhtose ropa ypy poe. Mame imoihmãkõ toytose imaro.

²Mame imepỹ toytose tupũ motaryke eya. Tosekumuru po typorohse Jezu ẽpataka. Ynara tykase eya, —Jukurãkary se awahtao jukurãkary waro mase, tykase eya.

³Mame tomary ke Jezu a tapose. —Ỹ, okurãkary se ropa ase. Kure exiko ropa, tykase eya. Mame axĩ mokyro pũ totyhse ropa.

⁴Mame ynara tykase Jezu eya, —Etako ke, topoh rokẽ ytoko aporo Ritonõpo maro oturukety a. Osekãtopyra exiko aporo. Eya rokẽ osenepota. Moromeĩpo Moeze omihpyry omi poe onekarory pitiko ekarota eya jahkatohme, okurãkatopõpyry ropa waro imehnõ ehtohme, tykase Jezu eya.

⁵Morarame Jezu toytose Kapanaũ pona. Eporehkasasaka tahtao tõseporyse toto romano maro, sajẽtumã maro. Ynara tykase ynororo Jezu a, —Kuakorehmako, ajohpãme samo.

⁶Ypoetory kure pyra ipunaka mana, ytapyĩtaono. Ytoytopyra toehse ynororo. Tohrame rokẽ mana. Takarah ãko mana itamurume, tykase ynororo Jezu a.

⁷—Ỹ, tykase Jezu. —Ytõko ase amaro atapyĩ taka ikurãkase, tykase eya.

⁸Yrome ynara tykase ynororo Jezu a, —Arypyra, kure mase. Popyra rokẽ ase. Typatakẽme pyra roropa ase. Ytopyra exiko ytapyĩ taka. Õmiry ke rokẽ ypoetory kurãkary waro mase.

⁹Ywy roropa tosẽke ase, Kapitão tomo. Typoetoke roropa ase, soutatu tomo. “Ytoko,” karyhtao ya soutatu tomo a, ytõko mã toto. Mame imepyny a, “Osehko,” karyhtao ya oehnõko mana. Ypoetory a roropa, “Senohne tyriko,” karyhtao ya, tyripohpyry rĩko mã toto. Moro saaro mase. Õmiry ke kurãkõkara kurãkary ropa waro mase, tykase ynororo Jezu a.

¹⁰—To! tykase Jezu morara kary etaryke tyya. Mame ynara tykase Jezu imoihmãkomo a, —Etatoko pahne, mose juteukara. Yrome jenetupuhnõko nase yronymyryme. Ipanõ onenepitopyra ywy taro juteu tõ rãnao.

¹¹Etatoko pahne, tuhkãkõ mã oehnõko xixi tũtatoh wino, xixi porohtoh wino roropa Ritonõpo esaka. Aparão tõ maro otuhnõko mã toto, Izake maro, Jako maro, enara.

¹²Yrome tuhkãkõ toahmase roropa repe. Yrome omõpyra mã toto Ritonõpo esaka. Xinukutumao rokẽ exĩko mã toto tõmase toexirykõke. Moro ao xitãko rokẽ mã toto. Atarypõko rokẽ mã toto. Kui kui ãko mã toto tãtaryporykõke.

¹³Mame ynara tykase Jezu sajẽtu a, —Ytoko ropa atapyĩ taka. Tonetupuhse oya jexiryke opoetory nekurãka ropa. Mame toytose ropa ynororo tytapyĩ taka. Mame typoetory tonese eya. Pake toekurãkase ropa kynexine Jezu omi poe.

¹⁴Morarame Jezu toytose ropa Peturu tapyĩ taka. Moroto Peturu merenoty tonese Jezu a kure pyra. Oxirohnõko kynexine, tohrame.

¹⁵Mame tomary ke mokyro tapose Jezu a. Axĩ kynoxirohkehne ynororo. Mame kynowõne ropa tonahsẽ rise, Jezu napyry rise.

¹⁶Morarame kokonie pukuro jorokohpãkõ tonehse tuhke imehnomo a, Jezu a. Mame tõmiry ke joroko tõ tutũtanohpose ropa eya mokaro ae. Kurãkõkara, tukurãkase ropa eya porehme.

¹⁷Morohne tyrise Jezu a pake urutõ omihpyryae ro, Izaja omihpyryae ro. Ynara tymerose Izaja a pake, “Tamoreme kure pyra kuehtohkõ kurãkãko mana. Tamoreme kukurãkatorỹko roropa mana,” tykase pake Izaja Ritonõpo nymenekahpyry poko. Morara katopõpyryae ro kurãkõkara tukurãkase ropa Jezu a.

¹⁸Mame imoihmãkõ eneryke tyya, ynara tykase Jezu typoetory tomo a, —Ehmaropa ikuhpo mõpozakoxi, tykase.

¹⁹Mame Moeze omihpyry poko imehnõ amorepane tooehse Jezu a oturuse. Ynara tykase ynororo, —Jytory se ase amaro emero rokẽ pata pona, atamorepary se jexiryke. Orumekary se pyra roropa ase jũme, tykase ynororo.

²⁰Yrome ynara tykase Jezu eya, —Oetuarimary zuno pyra hma ymahro? Onokyro tõ tosake mana. Torõ tõ roropa, tosake mana. Yrome Kapu ae Ayhtohpyry tytapyike pyra mana, tosake pyra taro, tykase Jezu eya.

²¹Imepỹ Jezu maro atamorepakety kynexine. Ynara tykase ynororo Jezu a, —Ajohpãme sã ytoxi aporo papa tapyĩ taka. Tãhpome toehse mã ynororo. Mame toorihse ynororo ahtao oehnõko ropa ase, tonẽse ahtao roropa amaro jytotohme, tykase ynororo Jezu a.

²²Yrome ynara tykase Jezu eya, —Toipe orihnõko exino mana. Mame toorihse ahtao imehnõ zonẽnõko mana epẽpyry tomo. Yrome omoro rokẽ eropa ymaro, tykase Jezu eya.

²³Morarame Jezu kynotyrine kanawaka. Mame ipoetory tõ roropa tõtyrise imaro.

²⁴Mame okynã pyra tyryrykane konõto tooehse itamurume, ikuhpo akuotyryhtao eya xine. Mame poh tykase roropa itamurume kanawa pona. Jezu kanawao kynexine, nyhnõko.

²⁵Mame Jezu a axĩ ipoetory tõ toytose. Mame tõpakase Jezu eya xine. —Jezu, yna ipynohko. Nerỹko sytatose, tykase toto.

²⁶—Oty katoh oserehnõko matou? tykase Jezu eya xine. —Jenetupuhpyra ro hmatou? tykase eya xine Jezu. Mame towõse ynororo. Ynara tykase tyryrykane a, pohkane a roropa, —Omynyhpãko. Tyryry kara exiko, tykase. Mame axĩ tyryry kara toehse. Poh kara roropa toehse. Mynytyme konõto rokẽ toehse.

²⁷Mame imarõkõ tõsenuruhkase, —To! tykase toto. —Imehxo mose nase. Tyryrykane aomipona nymynyhpãno. Pohkane roropa nymynyhpãno aomi poe tykase toto.

²⁸Morarame tuna ehpikoxi Jezu toeporehkase, ikuhpo ehpikoxi. Moroto Katarapõkõ esary kynexine. Mame okepy esary poe asakoro jorokohpãkõ toytose Jezu a. Zehnoto kõ kynexine. Mokaro eneryke tyya xine, imehnõ tõserehse. Ytopyra toehse toto moro esemary ae.

²⁹Mame kui tykase toto jorokohpãkomo Jezu eneryke tyya xine. —Oty kase moehno Ritonõpo mũkuru? Yna htomase moehno? Atapiakatohpo pyra ro nase, tykase toto Jezu a.

³⁰Mame moe pyra poinokoimo tõ kynexine. Tuhke toh kynexine otuhnõko.

³¹Ynara tykase joroko tõ Jezu a, —Yna aroporyhtao oya, poinokoimo aka yna aropoko, tykase toto Jezu a.

³²Mame, —Ytotoko, tykase Jezu eya xine. Morara exiryke toytose toto ahno ae poinokoimo aka. Mame poinokoimo tõ tururume toytose ypy poe ikuhpo kuaka. Moro kuaka tyneryse toto.

³³Mame poinokoimo erasẽpyã toytose pata pona tururume. Moroto tõturuse toto imehnõ netaryme. Tynenehpyrykõ tokarose imoihmãkomo a. Ahno ae joroko tõ tũtatopõpyry poko turuse toto.

³⁴Morara exiryke patapõkõ tuhke toytose Jezu enese. Mame Jezu tonese tyya xine ahtao, —Ytoko ropa taroino yna esae ajohpãme samo, tykase toto eya.