Matäuj 11

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹KADEKADEO Iejuj lao kaimwijokela a majan on japwilim a tounpadak ekriamen, ap kotila jan waja o, pwen kaukawewe o padapadak nan ar kanim akan.

²A Ioaneij lao roner nan imaten wiawian Krijtuj, ap poronela a tounpadak kai.

³Kalelapok re a: Ir me pan kotido, de jen auiaui amen?

⁴Iejuj kotin japen majani on irail: Komail kowei kaireki Ioanej, me komail ron o kilan:

⁵Me majkun akan kin kilan waja, o me danidan kan kin alu, o me tuketuk kan kin makeladar, o me jalonepon kan kin ron waja, o me melar akan kin maureda, o ronamau kin loloki on me jamama kan.

⁶O meid pai, me jota pan makar kin ia.

⁷Mepukat lao kokola, Iejuj ap kotin tapiadar mamajani on pokon o duen Ioanej: Da me komail koieila en kilan nan jap tan? Alek pot, me kin dueduälokki an?

⁸De da me komail koieila en kilan? Aramaj amen nan likau muterok? Kilan, me kin likau kida likau muterok, kin mi nan im en nanmarki kan.

⁹De da me komail koieila en kilan? Jaukop amen? Ei I indai on komail a laude jan jaukop amen.

¹⁰Pwe iei i, me intinidier: Kilan I kadarala mo ’mui ai men kadar, me pan koko al mo ’mui.

¹¹Melel I indai on komail, jota me ipwidi jan ren li akan, me laude jan Ioanej jaunpaptaij. Ari jo, me tikitik nan wein nanlan, iei me laude jan i.

¹²A jan ni muein Ioanej jaunpaptaij kokodo lel met wein nanlan kokido eta manaman, ari me manaman akan kin koledi on irail.

¹³Pwe jaukop karoj o kapun kokopadar lao lel Ioanej.

¹⁴O ma komail men duki on, nan iei Eliaj, me pan kodo.

¹⁵Me jalon a mia, men ron, i en ron!

¹⁶A da me I en karajai on di wet? A raj on jeri kan, me kin momod nan wajan net akan o likelikwir on kij arail,

¹⁷Indada: Kit kajan on komail, a komail, jota kakalek; kit kauleki on komail kaul en mamauk, a komail jota janejan.

¹⁸Pwe Ioanej pwarado, ap jota kan o nim, a re kin inda: Nan tewil kin ti poa.

¹⁹Nain aramaj pwarado, manamana o nim, a re kin inda: Kilan, me kaped en mana o kamom jakau, kompoke pan jaunopwei o me dipan akan, a lolekon o kin diarok kida na jeri ko.

²⁰A kotin tapiada kidaueda kanim akan, me a wiai oner manaman to to, aki re jota kalula:

²¹Juedi on uk Korajin! Juedi on uk Petjaida! Pwe ma manaman akan, me wiaui on uk er, wiauier on Tiruj o Jidon, nan melel re pan pitipit kalula nan tuk en likau o nan paj.

²²A I indai on komail, a pan monai on Tiruj o Jidon ni ran en kadeik jan komail.

²³A koe Kapernaum, me paidar lel nanlan, pan pijikindi nan pweleko; pwe ma manaman akan, me wiaui on uk er, wiauier on Jodom, nan a pan mimieta lao lel ran wet.

²⁴A I indai on komail, a pan monai on jap en Jodom ni ran mi kadeik jan koe.

²⁵Ni anjau ota Iejuj kotin tapiadar majani: I kapina komui Jam, Kaun pan lan o jappa, me komui okila mepukat jan me lolekon o koiok kan, ap kajale on jeri pwelel akan.

²⁶Ei Jam ai, pwe iduen me komui kupukupura.

²⁷Meakaroj muei on ia er jan ren Jam ai, o jota amen, me aja japwilim a Ol, pwe Jam eta, o jota amen, me aja Jam, pwe japwilim a Ol eta, o me japwilim a Ol pan kajale on.

²⁸Komail karoj, me panadar o toutoular kodo re i I pan kamoleilei komail la.

²⁹Ale on komail ai iok, o padakki jan ia; pwe Nai me opampap o karakarak melel, komail ari pan diarada kamol pan nen omail.

³⁰Pwe ai iok me manai, o katoutou pai me marara.