Marku 9:2-32

²Anavinre mahuku siita, Yesu ahaakusa Peturu, Yakopu ni Yohani, ni ahaaweliha veekhaya, mwaako woorekama. Ni aheetatusa wamiithoni waya.

³Coowara cawe cahothatuwa coowarya, cootteela usilili toko khaawo mayokattha vathiva uwoorya utteeliha ciicale.

⁴Ahaakhumelela Eliya wamoca ni Musa ni ooyeli yanawuulumaca ni Yesu.

⁵Peturu ahomwiirela Yesu: Mwalimu oreera ukhala vava, niteke marapattha mararu, nimoca na waa, nikina na Musa nikhwawe na Eliya.

⁶Kontha khayaacuwela itthu yaahimyawe nlattu yanawoova venci.

⁷Ni nahokhuruwa nihutte nakhunenle ni ntthuuci, ni nahokhuma ncu nnihutteni neera: Ula mwanaka oofentiya. Yooyo mwiiwe.

⁸Nenna nna, awehaka, khayamoonne tho ntthu, ari Yesu veekhawe.

⁹Wakhuruwaya mmwakoni, Yesu ahaalamulela wiira ahihimerye ntthu itthu yoonyaya, mpaka wahoolo Mwanawe Pinattamu nonwelenle mwaatthu ookhwa.

¹⁰Ale yahotthara moolumo ale, nanso yaanakohana ayayoru manaaya, 'wunwelela mwaatthu ookhwa.'

¹¹Ni yahonkoha yiiraka: Mayowantikha aneerelani wiira woopacera Eliya phinhala uwa?

¹²Ahaakhula: Aye, Eliya, awaaka woopacera naahala weesa wanipuroni waya citthu cothene, nanso yantikhiye isiyani ya Mwanawe Pinattamu, wiira nalamuliya uhuva venci, nuunyoholiya.

¹³Ni mi mweeco kinawuhimeryani: Eliya ahowa, ni yahompankela cothene catthunaya, toko caantikhiye.

¹⁴Naphile waryaya owiitthuca awe ahoona mphwinko muulupale wa atthu warukurenrye ayoca, ni mayowantikha anyakulihanaka na ale.

¹⁵Amoonakaru Yesu yahotikhina ni yahotthimakaca unkoha isalama.

¹⁶Ni ule ahaakoha ale: Nnonyakulihanani?

¹⁷Ntthu mmoca mwa mphwinko ule, ahomwiirela: Mwalimu, kihowiihera mwanaka, rina nnepa woohuulumaca.

¹⁸Wammaraka vale, unamphatela vathi ni ule napacera ukhuma niphooru, ucekesa miino ni phuumaka teyeye. Kihaalepela owiitthuca aa wiira yoomole ncini, nanso khayoonrye.

¹⁹Yesu aheerela: Nyu, nloko noohikupali, kinhala ukhala ni nyu mpaka yakhani? Kinhala wuvilelani mpaka yakhani? Nkiwiihere woono.

²⁰Yahommwiihera. Nimoonakaru Yesu, ncini nahompukunyaa mwanhima ni ikuru, mpaka umphatela vathi, ni ahopacera uphirikyaa akhumaka niphooru mwano.

²¹Yesu ahaakoha athumwane: Itthu ile inomwiiryanyaa ikhumelo yakhani. Na ale yahaakhula: Ikhumelo mwanamwane,

²²ni imaara cinci nahommonyera wamooroni ni mmasini wiira amwiive, nanso wooryaka vale upanka itthu, unoonele ikiriri, nuunikhavihere.

²³Yesu ahomwiirela: Wooryaka! Ntthu nokupali citthu cothene cinawooryanyaa.

²⁴Nenna nna, athumwane mwana oyo yahokhuwa: Kinakupali; nkikavihere uhikupali waka!

²⁵Yesu, oonaka wiira atthu enci yanawa, aholamulela nnepa woonanara ni aheerela: Nnepa wohuulumaca ni wohiwa, Mi kinawulamulela, ukhume wamwana ola, nuuhinturuwele tho.

²⁶Ni nnepa, ukhuwaka ni wicipulacaka ni ikuru, wahokhuma. Mwanhima ahokhala toko ookhwa, mpaka atthu enci wiira hokhwa.

²⁷Nanso, ammaraka ntata, Yesu ahommusa, ni ule aheemela.

²⁸Ukelawawe mpani, owiitthuca yahonkoka veekhawe: Nlattuni hiyano khanoonrye woomola?

²⁹Ahaakhula: Nloko nna ninoomoliya ni iswali ni utthuka paahi.

³⁰Akhumaka wonwo yahottupulaniha ilapo yo Kalileya, ni Yesu khatthuna wiira acuweliye ni ntthu,

³¹nlattu anavira eetthucihaka owiitthuca awe ni anaweerela: Mwanawe Pinattamu naahala urwehiya mmatatani mwaatthu anhala umwiiva, nanso, nakhwile nowowunwelela anavinre mahuku mararu.

³²Nanso ayo khayeewehile nuulumo nne, ni yanamoova unkoha.