San Marcos 9:2-32

²Tse nii kwloxo xoop kpidz lëë Jesús kwey tu kiy nii per nli busy klaa. Kuni xaa xaktyee Pedre, Jacob ni Juan. Siko xña lo xaa lëë Jesús ptsyëëlo.

³Bibëly xab xaa, byak nguitsy pu rusyo ni ni tu cho chilody ksaan nguitsy ladx singo nikxe nii xare kiibo.

⁴Ni lëë xaa kon nii lëë Elías ni Moisés ncheyutiits ksa Jesús.

⁵Tsigo lëë Pedre chëb lo Jesús: —Maestre, ¡xaatee mbëë nche no nu! Lëë noo ksaa tson yu yagxiidy nu: tuwo par lii, stuwo par Moisés, stuwo par Elías.

⁶Ksa xpëëdscuel Jesús ptsyeb. Ngo nii nandy Pedre pe xñee.

⁷Tsigo lëë tu xkey ptaagw aan lëë xaa kwnity lo xkey. Aan lo xkey go pchoo tsiy Dios chëb: —Lëë xiñaa nii xkëstyoon nrii. Kol jkëëtyag xtiits xaa.

⁸Aan tsiñee lëë xaa buy, ni stu cho kontre xaa, xaktyee Jesús.

⁹Tsiñee lëë xaa siksëëb chex kiy go, lëë Jesús chëb kazh nii kwtiisty xaa nii kon xaa axte nii kpañ mguiy nii pxaal Dios.

¹⁰Por ngo kwlootseysye xaa leñ styoo xaa nii kon xaa, nikxe nii kwnabtiits lsa xaa lo xcombañer xaa xa nak nii kpañ meñ.

¹¹Tsigo lëë xaa kwnabtiits lo Jesús chëb xaa: —¿Penak nii xñee maestre ley nii klo Elías no nii kiid?

¹²Tsigo lëë xaa kwëb chëb xaa: —Nliw, no nii klo Elías kiid par kxixkwaa xaa kchësy cos. ¿Per penak tsigo nii xñee leñ kitsy nii kë xtiits Dios nii lëë mguiy nii pxaal Dios te kchëlo kyalnë ni ksaldy meñ xaa?

¹³Per naa nii xcuentaa xñen nii lëë Elías biidle ni lëë meñ beeñtsyey xaa sinak nii kwlaañtyee styoo meñ, sinak nii xñee leñ kitsy nii kë xtiits Dios nii no nii tedy xaa.

¹⁴Tsi lëë xaa ptsiñ laañee nche stubla xpëëdscuel Jesús, lëë xaa kon nii per nli busy ndaly meñ nche kyako kwi xaa, ni lëë maestre ley nche ktilytiitsni xaa.

¹⁵Siikñee lëë meñ kon Jesús, lëë meñ psee aan lëënlëdy lëë meñ kujkëëptyux xaa.

¹⁶Loxsye ngo lëë Jesús kwnabtiits lo xpëëdscuel chëb: —¿Pe cos nche ktilytiits to ksa do xaa gue?

¹⁷Lëë tu xaa nii so siko kwëb chëb: —Maestre, lëën syely ni xiñganaa lool nu por lëë tu kyalbini mal no leñ styoo xaa aan lëëw beeñ ngop xaa.

¹⁸Laañee sotyee xaa lëë kyalbini mal xsyeñ xaa aan lëëw xchon xaa lyu. Aan xchoo ptsiñ chuw xaa, chaw lay xaa ni xkyedzy xaa. Lëën tse kwnab lo xpëëdscueeloo nii ngwii xaa kyalbini mal go, per pchilody xaa.

¹⁹Tsigo lëë Jesús kwëb chëb: —¡Natsypee nguiedzy styoo do! ¿Axte pa wor këb ñe nii lëën ksaladzy lëë do? ¿Pa slal tiemp kxekwaa lo do? Kol tëni xaa wiñ go nu dyon.

²⁰Tsigo lëë xaa kuni xaa wiñ go lo Jesús. Per tsiñee lëë kyalbini mal go kon Jesús, lëëw beeñ nii lëë xaa wiñ go kutyë, aan lëë xaa byab lyu xtuupxto xaa ni xchoo ptsiiñ chuw xaa.

²¹Tsigo lëë Jesús kwnabtiits lo pxosy xaa chëb: —¿Destye pa wor chak xaa sinrii? Tsigo lëë pxosy xaa kwëb chëb: —Destye nii nak xaa xaa wiñ.

²²Aan ndaly vuelt no kchon kyalbini mal gue xaa lo ki ni lo nis par kutyo xaa. Singo nako deelñee schilo kuuñ kyakoo xaa, pkëstyoo lëë noo ni beeñ noo yudar.

²³Tsigo lëë Jesús chëb: —¿Xa nak nii deelñee schilool? Kchësyo schilo lo meñ nii xniladzy.

²⁴Tsigo lëë pxosy xaa wiñ go kwchuptsyë chëb: —¡Xniladzyaa; beeñ naa yudar kniladzyraa!

²⁵Tsiñee lëë Jesús kon nii lëë meñ xtyopre, lëë xaa kwëntseeb lo kyalbini mal go chëb xaa: —Kyalbini ngop ni ngwaat, naa xñabey nii kchool leñ styoo xaa wiñ re aan kpikchedroo sëëboo.

²⁶Lëë kyalbini mal go kwchuptsyë, aan lëëw beetyë xaa wiñ go stub. Loxsye ngo lëëw pchoo leñ styoo xaa, psaano xaa sootee meñ nii lox kuty. Por ngo ndaly meñ kwnee nii lëë xaa kuty.

²⁷Per lëë Jesús kwseñ ña xaa, lëë xaa blische xaa, aan lëë xaa wiñ go kusoli.

²⁸Loxsye ngo lëë Jesús kwsëëb tu leñ yu, aan lëë xpëëdscuel xaa kwnabtiits chëb: —¿Penak nii pchiloody noo ngwii noo kyalbini mal go?

²⁹Lëë Jesús kwëb chëb: —Por parñee kwii ñe clasy kyalbini mal go no nii kutiitsni kazh ñe Dios.

³⁰Tsiñee lëë xaa bi siko, lëë xaa kwte nëz Galilea. Per koklasty Jesús nii cho nyaknano

³¹porñee lëë xaa noyuuñ kseedy xpëëdscuel xaa xñee xaa lo xaa: —Lëë mguiy nii pxaal Dios jkaa ña meñ, aan lëë meñ kuty xaa. Per tse nii loxo tson kpidz lëë xaa kpañ.

³²Per byeñdy xaa nii kwnee Jesús aan ptsyeb xaa nyabtiits xaa.