Markuj 9:2-32

²Murin pon wonu pon Iejuj ap kotin ukada Petruj o Iakopuj o Ioanej kalua ir dalan pon nana ileile eu, ir kalapuk. I ari kotin wukila mo ’rail.

³Japwilim a likau ko linalinala, puetepueteta jno. Jota jaunlopolop nan jappa kak kapuetepuetetala dueta.

⁴Eliaj i Mojej ap pwara don ir, ari, ira o Iejuj ap mamajan pena.

⁵Petruj ap japen potoan on Iejuj: Rapi, me mau on kitail en kotikot met. Kitail en kauada kijin im jilikij: Tanpaj ar, o en Mojej o en Eliaj.

⁶Pwe a jaja, da me a pan inda, pwe re majapwekada.

⁷Pali en dapok pali ap kadupwal irail edi; o nil eu peidido jan nan dapok o: I met nai. Ol kompok! Komail ron i!

⁸Ari, re jaliokeda, jolar amen me re kilan, Iejuj ta, me kotikot re ’rail.

⁹Ari, ni arail kotikot kotido jan nin nana o, a kotin kalik irail edi, re depa indai on meamen, me re kilan ko, lao Nain aramaj mauredar jan ren me melar akan.

¹⁰Re ap edie pena majan pot et nan pun ar, ap peipeidokki pena, da wewe en maureda jan ren me melar akan?

¹¹Irail ap peidok re a potoan on: Da me jaunkawewe kan indaki, Eliaj pan pwarado maj?

¹²I ari kotin japen, majani on irail: Melel Eliaj kodo maj, kamauiada meakan. O iaduen intinidi duen Nain aramaj? Me pan kolokolok toto o jokonekon.

¹³A I indai on komail, Eliaj pwarer, o re wiai on i, me re mauki duen a intinidi due.

¹⁴A lao koti don tounpadak kan, a majani pokon kalaimunia eu kapil ir pena o jaunkawewe kan peipeidok re irail.

¹⁵Ni ar kilanadar i, pokon o ap puriamuiki la tanado ranamau on i.

¹⁶A ap kotin kainoma re irail: Peidok da kai, me komail idedok re ’rail?

¹⁷Amen toun pokon o japen i potoan on: Jaunpadak, i potoan don komui nai putak o, me nen loton mi poa.

¹⁸Ari, waja karoj me a kin tiada poa, a kin kapururada; a ap kin pudopud o katekatete ni o tonetonela. I potoan on japwilim omui tounpadak kan, pwe re en kauja jan i, ari, re jota kak.

¹⁹A ap kotin japen irail majani: Di wet meid jopojon. Ia arain ai pan mimi re omail, ia arain ai pan kokoa komail? Wa don ia i!

²⁰Irail ap poto don i. Ni a kotin majani i, nen o ap madan kupururada i; a ap pupedi on nan pwel, wia pudopud taputapur jili.

²¹A ap kainoma ren jam a: Ia arain me kot et a lel? A ap potoan on: Jan ni a jeri.

²²Pan me toto a kin kajedi on i nan iai o nan pil, pwen kamela i. Ari, ma re kotin kak on, re kotin kupura kit ala jauaja kit!

²³Iejuj ap kotin majani on i: Ma koe me pojon; meakaroj me kak ren me pojon.

²⁴Madan jam en kijin jeri ap weriwer, janejan, potoan: Main, i pojon. Kom kotin katinaiada jan ai jopojon.

²⁵Ni en Iejuj a kotin majani ar tanetan pena, a ap anianiada nen jaut o kotin majani on nen loton o jalonepon: I indai on uk, koieido jan lole! Koe depa pure won i!

²⁶A ap weriwer, kapururada kaualap, ap koiei jan. I ari likamata a melar. Akai ap inda, a melar.

²⁷Iejuj ap kotin ale pa a kauada, i ari uda.

²⁸Ni a koti don ni im o, japwilim a tounpadak kan ap okiok peidok re a potoan on: Da me je jota kak kaujeki jan?

²⁹A ap kotin majani on irail: Jon wet jota kin koki jan meakot kapakap o kaijejol eta.

³⁰Re ap kotila jan waja o, weidala nan Kaliläa. A jota men, meamen en aja.

³¹Pwe a men kotin kawewe on japwilim a tounpadak kan ap majani on irail: Nain aramaj pan panalan ni pa en aramaj. Irail pan kamela i a murin a kamela a pan maureda murin ran kajilu.

³²A irail jota dedeki majan o; a re majak kalelapok re a.