SAN MARCOS 9:2-32

²Chihno a̱n ro me ne, quenda Dihvo vo Pedro ma̱n, Jacobo ma̱n, Jua̱n ma̱n, cuahn ye nduco vih a̱ma tingüete. Min ndo diya̱hn ye na̱n ihyan chahn.

³Tino yahn ye ne, a̱ma ndo cua nduhca̱ ihve, nde tuno diya̱hn ro. Nde a̱ma ihyan rena̱n che vate ye muhn iyehnse cuh ne, hua co din ye che tihca̱ ndo cua.

⁴A dena̱n chihnde ro Elías nduco Moisés, ne ndihchero ihyan chahn che rente ye nduco Dihvo vo.

⁵Tuhme ra̱hn Pedro ri ye Dihvo vo: ―Ihyan ricuahn yáhn, a̱ma nda̱hca̱ che chenan vo muhn. Dendah nuhn ino vache vah. A̱ma na̱n che cuhnde ne, ta̱ma na̱n che cuhnde Moisés, ne ta̱ma na̱n che cuhnde Elías.

⁶Tihca̱ ra̱hn ye, te a̱ma dihya ihyan chahn chi, nde hua renta̱quino ye deh che ca̱hma ye.

⁷Ura min chiya a̱ma man, quendihco na̱n che chenun ihyan chahn. Va̱n man me ne, chenun a̱ma ndudo che ra̱hn tuhca̱: ―Sa̱hnguh che Da̱yá. Yahinó sa̱hn. Che ca̱hma se ne, chemin che codinahn nchuhn.

⁸A dena̱n cuahn che ndihchero ihyan chahn ne, ametah duhva. A dema̱n Dihvo vo nti ye.

⁹Ura che cuenchan ihyan chahn cuete me ne, ra̱hn Dihvo vo ri ye ihyan: ―Hua ca̱hma nchuhn nduco nde a̱ma ihyan yahn vederihno che ndihchero ne nde nda̱ ro che u che rinducó nducoya̱ca ihyan ntuché va̱n tena̱hn.

¹⁰Dinahn ihyan chahn che ra̱hn Dihvo vo, chahtenun ino ye vederihno min, ne retumerune vih ye: ―¿Dehra conahn ndudo che tihca̱ ra̱hn ye che ntuche ye va̱n tena̱hn ne?

¹¹Numanahn che chenun yune ca ye ne, tumerune ye Dihvo vo: ―¿Deh cuande che ra̱hn sa̱hn devano ley che dirun Moisés che Elías va che chi ye mena̱n ne?

¹²Ndahconan Dihvo vo, ne ra̱hn ye: ―Cua̱co te va che chi Elías mena̱n, ne nda̱hco ca̱de ye nducuahn. Ate, ¿a renahn ne nduhca̱ che ndirun yáhn na̱n Ndudo yahn Dendiohs?, te a ndirun te u che rinducó nducoya̱ca ihyan ne, va che chuhríhn ma̱n, va che nda̱hchenan ihyan u ma̱n.

¹³Ate rá̱hn rí nchuhn te a nda̱ Elías, ne din ta̱n ihyan nduco ye nduhca̱ che a ndirun yahn ye na̱n Ndudo yahn Dendiohs.

¹⁴Cuahn che nta̱ Dihvo vo na̱n che chenun ihyan apóstol chena̱hn ne, ndihchero ye che a̱ma ndito ihyan. Sa̱hn devano ley che dirun Moisés ne, rahteruhn chende se nduco ihyan apóstol.

¹⁵Ndeta̱hno che ndihchero ihyan che chenun ye min Dihvo vo ne, cuahn ino nducoya̱ca ye, ne aderano ye chahn ye neca̱h ye Dendiohs ihyan.

¹⁶Tumerune Dihvo vo ihyan apóstol chahn: ―¿Deh cuande che rahteruhn chende sa̱hn sih nduco nchuhn ne?

¹⁷Tuhme chenda̱ menda̱hn a̱ma ihyan che quenun ye va̱n ihyan chahn, ne ra̱hn ye ri ye Dihvo vo: ―Ihyan Ricuahn yáhn, hua te u ne, ndá̱ ndevah, te ra̱hcó te muhn quenun ne. Ndá sa̱hn da̱yá che quenun a̱ma vaco chihnga̱ sa̱hn, nedin che ndi lihme se.

¹⁸Adecotino che rinuhn yahn se ne, redin vaco chihnga̱ me che rendava se. Riche yan chende se ma̱n, reh dihyon se ma̱n, ri cheche se ma̱n. U ne, chicá ihyan apóstol yahn ne che ndetenda̱h ye vaco chihnga̱ me sa̱hn, ate hua chi ndetenda̱h ye.

¹⁹Tuhme ra̱hn Dihvo vo: ―¡A̱ma rendedecadinó ca̱va nchuhn! ¿Dehco che hua ritahno ne? ¿Ticua̱hn ca̱hcoma̱n ne vedenine yahn ne, co ne ihyan? Cuahn ne nguan ne sa̱hn.

²⁰Tuhme chehua ihyan chahn sa̱hn dihn me, ne cuahn che checadino vaco chihnga̱ me che a ihyan min che Dihvo vo Jesucristo ne, din che nuhn yahn sa̱hn dihn me, ne chendava se. Racondihte ya̱hn se ma̱n, riche yan chende se ma̱n.

²¹Tumerune Dihvo vo chida se: ―¿A ra̱hn che tihca̱ ri yahn se ne? Ndahconan chida se, ne ra̱hn ye: ―Nde ro che lihn se.

²²A̱ma ndeh yune redin vaco chihnga̱ me che renda̱hnun se va̱coya̱hn ma̱n, va̱n nune ma̱n, che nahn ca̱hno sa̱hn. Ate ndete che co ndetenda̱h ne vaco chihnga̱ me sa̱hn ne, conan va̱hino ne nuhn, cuinan ne nuhn.

²³Ra̱hn Dihvo vo ri ye chida sa̱hn dihn me: ―Ndete che ritehne ne, adecodehno che caque ne, conahn.

²⁴Ndeta̱hno ra̱hn chida sa̱hn dihn me numa dito ye: ―Ritahnó. Ate cuenan ne u ca̱va che tahque ndah cotahnó.

²⁵Ndihchero Dihvo vo che a̱ma rida̱ma ihyan, ne numacuahn vedeyudo chihquentiyon ye vaco chihnga̱ me, ne ra̱hn ye: ―Vaco chihnga̱ che redin che nde lihme nde chato sa̱hn dihn tih, rihquentiyón di che ndiquendah, ca̱hcoman sa̱hn. Ametah ndaconen conda sa̱hn.

²⁶Tuhme cah vaco chihnga̱ me, din che a̱ma chih dihca sa̱hn dihn me, ndiquenda̱h sa̱hn. Chih ta̱hn sa̱hn dihn me, quendite dihn se, ne a̱ma ya̱hn ihyan ra̱hn ye che a chih se.

²⁷Ate cheta̱h Dihvo vo ta̱h se, ndedecuan ye sa̱hn, ne chandi se.

²⁸Chihno min ne, cona̱hn Dihvo vo, ne cuahn che a ndonda̱ ye vah ne, tumerune ihyan apóstol chahn ihyan devavih, ne ra̱hn ye: ―¿Deh cuande che hua chi ndetenda̱h nuhn vaco chihnga̱ me ne?

²⁹Ra̱hn Dihvo vo ri ye ihyan chahn: ―Ca̱va che ndetenda̱h vo vaco chihnga̱ chemin chan ne, nahn che cova̱h vo ma̱n, cuahte vo ya̱hte ma̱n.

³⁰Chihno min ne, chica ihyan chahn min cuahn ye. Chuh ye esta̱do yahn Galilea, ate hua nahn Dihvo vo che cadino nde a̱ma ihyan,

³¹te ricuahn ye ihyan apóstol yahn ye. Ra̱hn ye ri ye ihyan chahn: ―U che rinducó nducoya̱ca ihyan ne, din se preso u, ne ca̱hno se u. Ate cuihno ino ro ne, ntuché va̱n tena̱hn.

³²Hua chenahn ihyan chahn ndudo che tihca̱ ra̱hn Dihvo vo, ne va̱hino ye tumerune ye ihyan deh conahn.