Make 9:2-32

²Yuu gii 6-pela pateamopa, Pita, Jemesa, Jonepi, dutupa iki Jisasame laminao, yuu manda ketae mendenya pea. Dokonya katao kandeaminopa, Jisasa baa waka jia.

³Baanya yonge pee dupa etete kyoo lao pole-pole pia. Jisasanya yonge pee kyoo leamo dopale joo, endakali mendeme kyoo lena lao wasa napingima.

⁴Dokopa Ilaija Mosesapa, Jisasa-pipa pii lao kalyu piaminopa, kandeami.

⁵Kandatala Pitame Jisasa lamaiyoo, “Mana Lenge Akali, naima dakenya katamanopa, auu pilyamona, sele anda tepoma pimana. Mende embanya, mende Mosesanya, mende Ilaijanyana” lea.

⁶Pitame paka kaeyapala, aipa laowape lao masala naeyao, mee lea.

⁷Dopa leamopa, kopa mendeme ipupala, dokaita sanga pia. Kopa dokonya-kaita pii mende epea dokome, “Doo kalyamo doko nambanya Ikiningi mona setenge dokona, nyakamame baanya pii doko sakamaiyepape” lea.

⁸Dokopa disaipolo tepoma dutupame kandayoko leaminopa, Jisasa iki katea.

⁹Yuu manda doko yakinatala, lanao epeaminopa, Jisasame kyeto joo dutupa lamaiyoo, “Nyakamame kanjimino doko mende lamaiya naeyalapape. Tanga Akalinya Ikiningi doko kumapala, dee sakatatamopa, endakali dupa lamaitamina” lea.

¹⁰Baame pii leamo doko mende lamaiya naenya, nyakamalapo laloo pyoo, “Kumapala dee baa sakatata lalamo dokonya tenge doko aipa pyoo laape?” leami.

¹¹Dopa petala disaipolo tepoma dutupame Jisasa tipa pyoo, “Mosesanya loo mana nyepae akali dupame aipuma Ilaija wambao ipatatamopa, Kraisa ipupengena lengemape?” leami.

¹²Baame yanu pyao, “Dupa pitaka depa lasalanya, Ilaija wambao ipupenge. Dopa latae singi-tamo doko, tenge aipuma Akalinya Ikiningi doko maka kaeyapala, tanda longo maitamina lao pepa pyapae silyape?

¹³Jone kaimbu pingi doko Ilaija joo ipatea. Pii pepa pyapae singiliaka pyoo, baa epeamopa, endakali dupame masiamili pyoo, baa minao koeyasiamina” Jisasame lea.

¹⁴Jisasa, Pita, Jone, Jemesapi pilyetala kandeaminopa, endakali kambu andake mendeme disaipolo yangi dokaita katao, kakopeami dokonya, Mosesanya loo mana nyepae akali mendapu katapala, disaipolo dupa-pipa pii yanda pyoo kateami.

¹⁵Jisasa epeamopa, endakali kambu dupa pitakame walu lao kandatala, yapa pao kingi nyiami.

¹⁶Dokopa Jisasame dokaita tipa pyoo, “Nyakama aki mendenya pii longo lelyamipi?” lea.

¹⁷Akali kambu dupanya katea mendeme yanu pyao, “Mana Lenge Akali, nambanya wane doko imambu koo mendeme muumaa jiamosa, embame nisatale lao laminao epo.

¹⁸Imambu koo dokome baa minao, lungu pilyamoli pyoo, lombapae singi. Dopa pilyamopa, wane doko nengekaita kambapupaka mandyuu, nenge kitakato lao, kingi mokopi tinokao tui lenge. Nambame embanya disaipolo dupame imambu koo watao pyakamaina lamaipupa, dupame kapa pao watao pyala naeyalaminona” lea.

¹⁹Dopa leamopa, Jisasame lao pituu, “Nyakama Gote tungi napingi tata, oo koto-koto doko namba nyakama-pipaka tole katatope? Nyakama nongo pilyamino doko andukupa tolataminopa lao, nambame malisoo kataowape? Wane doko laminao asa ipupa” lea.

²⁰Dokopa wane doko laminao, Jisasa kateasa epeaminopa, imambu koo dokome Jisasa kanju katao, wane doko walumane minao, lombanya seteamopa, nengekaita kambapupaka mandea.

²¹Dokopa Jisasame takange doko tipa pyoo, “Wane dake gii andukupa tee pyao dopa piape?” lea. Baame yanu pyao, “Koosa tee pyao pia.

²²Paa longosa imambu koo dokome baa soo itatenya yangata, endakinya soo pyandata pyoo, kumasalanya pingina, embame dopale mende kapa pao piti-tamo doko, naima kondo kaeyao pipoko!” lea.

²³Jisasame baa lamaiyoo, “Embame aipuma, 'Dopale mende kapa pao piti-tamo doko' pii leepe? Endakali mendeme Gote tungi pilyamo dokome kalai dupa pitaka kapa pao pingina” lea.

²⁴Dopa leamopa, wane dokonya takange dokome puu lao, “Nambame Gote kuki tungi pilyona, kyeto joo tungi pyatoo, embame nisepe!” lea.

²⁵Dokopa endakali kambu dupame yapa ipao Jisasa katao kakopeamino kandatala, baame imambu koo doko pyalanya lao, “Emba muumaa kaleketa imambu koo dokome, wane dake yakinatala puu. Emba baa-kisa dee naipupi” lea.

²⁶Dopa leamopa, imambu koo dokome puu lao ae latala, wane doko minao etete walu lasetala, baa yakinatala pea. Dokopa wane doko kumapae joo siamopa, endakali longome, “Baa kumatelyamona” leami.

²⁷Dokopa Jisasame wane dokonya kinginya minatala, toeya katasia.

²⁸Toeya kataseteamopa, Jisasapi, disaipolo dupapi andaka peami. Dokopa disaipolo dupame Jisasa tipa pyoo, “Aipuma naimame imambu koo doko kapa pao watao pyala naeyalamape?” leami.

²⁹Dopa leaminopa, baame dokaita lamaiyoo, “Imambu koo dopale dupa lomame iki watao pingina” lea.

³⁰Jisasame disaipolo dupa-pipa yuu doko yakinatala, Galilea-kaita peami. Pao pituu Jisasame baanya disaipolo dutupa iki mana lamaiyanya, endakali mendeme nakandena lao masia.

³¹Dokopa baame dokaita lamaiyoo, “Akalinya Ikiningi doko enge nyepala, endakali dupame baa pyao kumasetami. Kumapala baa yuu gii tepo dokonya malunya dee sakatatana” lea.

³²Pii leamo dokonya tenge nyala naeyapala, disaipolo dupame baa tipa pyaanya paka kaeyami.