San Marcos 9:2-32

²Seis arɨ pare, Jesús vɨraso Pedro, Santiago, Juan reseve ɨvɨtrɨ ɨvate vahesave oyeupi. Aheve avɨyeteramo tẽi oñecuñaro güemimbohe rovai.

³Iturucuar sendɨ́, morochí eteanga. Ndipoi eté que ava co nungar co ɨvɨ pɨpe turucuar oyosei vahe.

⁴Iyavei avɨyeteramo tẽi oyemboyecua Elías, Moisés reseve Jesús rese oñemoñeta yuvɨnoha.

⁵Ipare Pedro aipo ehi chupe: —Ore mbohesar, ¡avɨye ai eté cohave yaico! Toroyapo mbosapɨ teyupami: ñepei ndeu nara, ambuae Moisés upe, ambuae evocoiyase Elías upe nara —ehi.

⁶Osɨquɨye tẽi semimbohe yuvɨreco. Sese Pedro ndoicuaise oñehe ãgua, aipo ehiño tẽi.

⁷Ahe ramoseve avei ogüeyɨ ɨva quɨha iharɨve, oyopɨpa tuprɨ yuvɨreco. Ahe ipãhuve oyeendu ñehesa aipo ehi vahe: “Co che Rahɨr, che rembiaɨsu; peyapɨsaca catu iñehe rese” ehi vahe.

⁸Ahe ramoseve avei omahese oɨvɨi yuvɨreco, ndosepiai eté que ambuae ava, Jesús güeraño tuprɨ ité osepia opãhuve yuvɨreco.

⁹Ipare ogüeyɨ ɨvɨtrɨ sui yuvɨreco, aipo ehi güemimbohe upe ou: “Ndapemombehui chietera que ñepei ava upe co mbahe pesepia vahe, pemombehura rumo acoi che, Ava Rɨquehɨr, acuerayevɨse voi” ehi.

¹⁰Oyeupeñomi tẽi vɨreco aipo ñehesa yuvɨreco, ahe rumo oporandu-randu oyeupe: “¿Mara oya pĩha aipo, ‘Acuerayevɨra’ ehise?” ehi tẽi yuvɨreco.

¹¹Evocoiyase semimbohe oporandu chupe: —¿Mahera ru Moisés porocuaita rese oporombohe vahe: “Elías rane rumo oura curi” ehi yuvɨreco? —ehi yuvɨreco chupe.

¹²Evocoiyase aipo ehi chupe: —Elías rane ité niha oura opacatu mbahe moingatu ãgua. ¿Mahera aracahendar icuachiaprɨ pɨpe aipo ehi: “Ava Rɨquehɨr oiporarara mbahe, yamotarẽhɨmbrɨ avei secoira” ehi?

¹³Che niha aipo ahe pẽu: Elías rumo ou ité, ava evocoiyase opacatu güemimbotar tẽi oyapo yuvɨreco sese. Ẽgüe ehi opacatu yavɨye aracahendar icuachiapɨrer sese —ehi.

¹⁴Ipare oyevɨ yuvɨreco güemimbohe recosave. Aheve osepia ava rehɨi oyere guasuse yuvɨreco sese, iyavei oime aheve Moisés porocuaita rese oporombohe vahe oiñehepoepɨ-epɨ semimbohe yuvɨreco.

¹⁵Ichui Jesús repiase, opacatu yuvɨnoña yuvɨraso chupe “avɨrave” apo.

¹⁶Evocoiyase ahe oporandu ava eta upe: —¿Mbahe rese vo peporandu-randu peyeupe? —ehi.

¹⁷Ñepei ipãhu pendar omboyevɨ chupe: —Porombohesar, co aru che rahɨr ndeu, vɨreco vahe caruguar oyese, nomoñehengatu ucai vahe yepi.

¹⁸Iyavei que iguatasa rupi co caruguar avɨyeteramo tẽi opocose sese, oitɨ voi ɨvɨve iyavei sendɨrɨyuiyusu, sãitere-tere avei; sese cũritei nipirata iri eté. “Penosemi caruguar ichui” ahe tẽi nde remimbohe eta upe. Ahe rumo ndoicatui eté yuvɨreco —ehi.

¹⁹Jesús omboyevɨ chupe: —¡Too, ndapeyeroya tuprɨ vɨtei eté che rese! ¿Mbovɨ rupi rutei vo aico vɨtera pe pãhuve che ñemosasa pɨpe? Peru evocoi chĩhivahe cheu —ehi.

²⁰Evocoiyase ogüeru yuvɨreco chupe. Osepiase caruguar Jesús, oitɨ uca iri chĩhivahe ɨvɨve. Omboapayere-yere iyavei sendɨrɨyui guasu-guasu.

²¹Sese oporandu tu upe: —¿Mbahese vo na ehi chupe? —ehi. Tu evocoiyase aipo ehi: —Ichĩhivahemi suive ité.

²²Amove co caruguar oitɨ uca tatave, ɨve avei yuca pota uca ãgua yepi. Sese ereicatuse, ore pɨ̃tɨvɨiñomi tẽi catu eve ore paraɨsuerecosave —ehi.

²³Jesús aipo ehi chupe: —¡Mahera, “Ereicatuse” ere cheu! Acoi che rese oyeroya vahe upe opacatu mbahe yaposa —ehi.

²⁴Aipo hese tu, —¡Orovɨroya niha, che pɨ̃tɨvɨi ru eve nde reroya catu ãgua! —ehi pĩrata chupe.

²⁵Osepiase Jesús ava rehɨi, oyemboyase sese, oñehe pĩrata caruguar upe aipo ehi: —Caruguar noñehei vahe, ndayapɨsai vahe, che orocuai, epoi co chĩhivahe sui, ereique iri eme secocuer rese —ehi.

²⁶Caruguar sãse pucu chĩhivahe yuca tuprɨ oso. “Omano ité co chĩhivahe” ehi ambuae ava yuvɨreco.

²⁷Jesús rumo oipopɨsɨ imopuha; evocoiyase chĩhivahe opũha tuprɨ voi eté.

²⁸Ichui oique oɨ pɨpe. Aheve semimbohe ahe aemi oporandu yuvɨreco chupe: —¿Mahera pĩha ndoromose catui eté caruguar ichui? —ehi yuvɨreco.

²⁹Jesús rumo aipo ehi güemimbohe upe: —Yeroquɨ iyavei yecuacu pɨpeño ité niha co nungar caruguar yaicatu imombo —ehi.

³⁰Ichui yuvɨnosepase, yuvɨraso ɨvɨ Galilea rupi. Jesús rumo ndoyemboyecua uca potai eté que ambuae ava upe.

³¹Esepia, güemimbohe güeraño ité ombohe aipo ehi: —Che, Ava Rɨquehɨr, imondoprɨ aicora che amotarẽhɨmbar povrɨve, che yuca aveira yuvɨreco, mbosapɨ arɨ rupi rumo acuerayevɨra —ehi.

³²Semimbohe rumo ndosenducuai eté oyeupe ñehesa yuvɨreco iyavei osɨquɨye chupe porandu ãgua yuvɨreco yepi.