Marcos 9:2-32

²Chi­ura­manda sugta puncha­pika, Pedrota, Santiagota i Juan­ta pusaspa, sug awa lumama pai­kuna­lla­wa sikag­rirka. Chipi chaiag­ris­paka, pai­kuna kawa­na­kug­lla­pi, sug rigcha kawa­rimi tukug­samurka.

³Paipa katanga, iapa iura puncha­lla­mi tukurka, kai alpapi ñi mai­kan katanga tagsag mana chasa iura­ia­chii pudin­ga­sina.

⁴Kawa­na­kug­lla­pi, Elías i Moisés kawa­rig­samur­ka­kuna. Chi runa­kuna­ka, Jesus­wa rima­na­kui kalla­rir­ka­kuna.

⁵Chasa kawas­paka, Pedro­ka Jesusta kasa­mi nirka: —Iacha­chig taita, kaipi iapa alli iuia­chi­mi kan­chi. Kimsa tambu kai­pi rura­sun­chi: kam­manda sug, Moises­manda sug, sugka Elias­manda—.

⁶Tukui kimsandi­kuna iapa manchai­wa kas­pa­mi mana ima­pas iuia­ris­pa­lla Pedro chasa nirka.

⁷Chi­ura puiulla, pai­kunata kilpag­samurka. Chi puiu uku­manda sug rimagta uia­rig­samurka, kasa nispa: —Kai, nuka­pa kuiaska wam­bra­mi ka­puá. Paita uia­puan­gi­chi.

⁸Pai­kuna ikuti muiugta kawa­ura, Jesuska ikuti sapalla kawa­rig­samur­ka­kunata; sug­kunaka mani­ma.

⁹Chi luma­manda urai­ku­naku­ura­ka, Jesuska nir­ka­kunata: —Kam­kuna ima kawas­kata mana pi­ta­pas willa­na­kun­gi­chi. Kai Runa Tukuska wañuspa kaugsa­riska­ura­manda­mi chasa kawas­ka­ta willankan­gi­chi.

¹⁰Chasa pai­kuna uias­paka, ñi pi­ta mana willar­ka­kuna. Chi kimsan­di­kunaka tapu­ri­na­kurka: —Chi “wañuspa, ikuti kaugsa­riska”, ¿imatak ni­raiá?—.

¹¹Nis­paka, Jesustaka tapur­ka­kuna— ¿Imapatak Moisés ima nis­kata iacha­chig taita­kuna nin­kuna: “Elias­ta­mi chaia­ku, Taita Dius agllaska Cristopa ñugpa samun­gapa”?

¹²Chi­ura, Jesuska ainir­ka­kunata: —Sutipami Elías ñugpa samun­ga­pa ka. Tukuimi alli­chig­samun­ga­pa ka. Chasa samun­gapa willa­ra­ias­kaka, alli­lla­mi ka. Kasa­pas­mi ñugpa­manda librupi willa­raiá: Runa Tukuska, achka llakii i nanai iukaspa, wabutiimi tukun­gapa ka.

¹³Nukaka, kasa­mi nii­ki­chita: Elías ña­mi samurka. Paitaka imasa munas­ka­sina­mi mana alli­lla rurar­ka­kuna, imasa pai­manda willa­raias­ka­sina.

¹⁴Jesús chi kimsandi­kuna­wa paita kati­raiag­kuna­pagma chaiag­ri­ura, iapa achka runa­kuna pai­kuna­pa muiugta saia­na­kug­ta­mi kawag­rir­ka­kuna. Paita kati­raiag­kuna­wa Moisés ima nis­kata iacha­chig taita­kuna­wa sin­chi rima­na­kurka.

¹⁵Tukui chipi kag­kunaka, Jesusta kawaspa, iapa ujna­rir­ka­kuna. Nis­paka, pai­pagma kalpalla rir­ka­kuna, “Puangi” nin­gapa.

¹⁶Chi­ura, Jesuska tapur­ka­kunata: —¿Imatak chi­kuna­wa sin­chi rima­na­kun­gi­chi?

¹⁷Chi runa­kuna­pura­manda sug runaka, Jesusta ainirka: —Iacha­chig taita, nuka­pa wam­bra­ta­mi kam­bagma pusa­mur­kani. Paita, sug kuku waira­mi iaiku­puarka. Chi­manda­mi mana riman­gapa pudi­puá.

¹⁸Chi kuku waira, paipa kag­sina, ima­ura­pas apispa, alpa­pi­mi urma­chi­puá. Chi­ura, tuka sitaspa, kiru mukuspa, kani­ris­pa­mi kallarí. Nis­paka, wañus­ka­sina­mi tukug­samú. Chi­manda­mi kamta kati­raiag­kunata mañag­samur­kani: “Chi kuku wairata llugsi­chi­puai­chi”. Nig­pika, pai­kuna mani­ma llugsi­chi­puan­gapa pudir­ka­kuna­chu.

¹⁹Jesuska, pai­kunata nirka: —¡Ai, kam runa­kuna, Taita Dius­wa ñi ima mana iuiag­kuna­mi kan­gi­chi! ¿Ima­ura­kamatak kam­kuna­ta chasa chari­na­kusa­ki­chi­ta?—. Chasa nis­paka— Chi ungug­ta, kaima pusa­mui­chi— nirka.

²⁰Chi­ura, wam­brata Jesus­pag­ma pusar­ka­kuna. Kuku waira­ka, Jesusta kawanga­lla­wa­mi wam­bra­ta iapa chabsi­chig­samurka. Chi­wanka, alpapi urmaspa, tukui­ma builtia­ri­kurka, tuka sitaspa.

²¹Chi­ura Jesuska, taitan­dita tapurka: —¿Maituku unaitak chasa ungui iuká? Chi­ura ainirka: —Uchulla­ura­mandata.

²²Achka biajimi chi kuku waira, nina ukupi i iakupi urma­chi­puá, paita puchu­kan­gapa. Kamka, ima­lla­pas pudis­paka, nukan­chi­manda llaki­rispa, aida­wai.

²³Jesuska nirka: —¿Imapatak niwakungi: “Kam­ka, ima­lla­pas pudis­paka, aida­wai”? Mai­kan­pas nuka­manda suma iuia­wagtaka tukui ima­pas alli­lla­mi tukug­samú.

²⁴Chasa nig­lla­pi, chi wam­brapa taitaka, kapa­rispa, nirka: —Ari, kam­manda suma­mi iuia­ni. Aida­wai, mas iuia­rin­gapa.

²⁵Achka runa­kuna, chima kalpa chaia­na­kug­rirka. Chasa kawaspa, Jesus­ka chi mana alli kuku wairata sin­chi piñarka, kasa nispa: —Kam kuku waira mana riman­ga­pa i mana uian­gapa sakig­ta­mi nii­ki: wam­bra­manda llugsii. Mana mas ikuti iaikug­samungi.

²⁶Chasa ni­uraka, kapa­ri­chispa, ikuti iapa chabsi­chispa, llugsirka. Chi­ura chi wam­bra, wañus­ka­sina tukug­samurka. Chasa kawas­paka, achka­kuna ni­na­kurka: —Wañuskami ka—.

²⁷Jesuska, chi wam­brata maki­manda apispa, atari­chirka. Chi­ura­lla, alli­lla saia­rig­samurka.

²⁸Chi­ura­manda Jesuska, sug wasipi iaikug­rirka. Chipika pai sapa­lla ka­ura, paita kati­raiag­kuna tapur­ka­kuna: —¿Ima­wan­tak nukan­chika mana pudir­kan­chi, chi kuku waira­ta llugsi­chin­gapa?

²⁹Chi­ura, Jesuska ainir­ka­kunata: —Taita Diusta sin­chi mañas­ka­kuna­wa­mi chi kuku waira­kunata llugsi­chin­gapa pudirí.

³⁰Chi­manda llugsis­paka, Gali­lea alpata iali­na­kurka. Chita iali­na­kuspa, Jesús munarka, mana pipas iacha­chu­kuna.

³¹Kati­raiag­kuna­ta­mi iacha­chispa ri­kurka, kasa nispa: —Kai Runa Tukus­kaka, mana alli runa­kuna­pag­ma­mi chaia­chii tukun­gapa ka. Pai­kunaka wañu­chi­wanga­pa­mi kan­kuna. Chasa wañuska kaspa­pas, kimsa puncha­pika ikuti­mi kaugsa­rin­gapa kani.

³²Chasa nis­kata uias­paka, kati­raiag­kuna mana iachar­ka­kuna ima ni­raiagta. Chi uias­kata mana iachas­pa­pas, manchaspa kar­ka­kuna, ima ni­raiagta Jesusta tapun­ga­pa.