2मिनु ६ नाक्त नोले येसुमी पत्रुस, याकूब नु यूहन्ना, सां आन कली सुइ मबाक्तीके डांडामी लदा बाक्त। मिनु मेको आन ङोंइती येसु फांइसे बाक्त।
3दोपा फांइसे बाक्त देंशा हना, आ फेक्शो वा बुबु पा जिलील बुश दुम्शो तामे बाक्त। मोदेंशो बुश सुइमी सेल्ने मचाप्नीम।
4मिनु एलीया नु मोसा ग्रूशो तामे बाक्त। मेको निक्शीमी येसु नु लोव़सी पाम्से बाक्त।
5मिनु पत्रुसमी येसु कली “ए शेंब, इं कली एकेर बाक्चा रिम्शो दुम्ब। बाक्तीके सां सेल्य। इन कली का, मोसा कली का नु एलीया कली का सेल्य” देंमाक्त।
6मारदे हना मार देंचा दे मतुइक्ता बाक्त। मिनु शुश हिंमा बाक्त।
7मिनु गोस्सुमी नेल्ल आन कली गिल्मी बाक्त। गोस्स आगा रे सेंदा का ग्रूशा “एको आं दाक्शो तौ बाक्ब। आ लोव़ नेनीने” देंशो नेन्मे बाक्त। मर्कूस १:११; २पत्रुस १:१७
8मिनु एर ओंथ कोव़ङमेनु, येसु ला तामे बाक्त।
9मिनु डांडा रे ब्रुम्मानु, येसुमी “रागीम जरमेशो बेक्शो रे सेंचा मपुंइसे सम्म इन तशो सुइ आन कली मशेंदीने” दे माइक्मी बाक्त। मर्कूस ८:३०
10मिनु मोदेंशो दुम्शो सुइ आन कली मशेंदमे बाक्त। “बेक्शो रे सेंचा पुंइसीचा देंशो मार बाक्म माइ” दे हिल्लो पमुमा बाक्त।
11मिनु आ शेंसीबपुकीमी येसु कली “ङोंइती एलीया जाक्चा माल्ब, दे सास्त्रीपुकीम शेंनीम। मारदे मोदें शेंनीमी?” दे हिल्लो पामेनु,
12येसुमी “एलीया ङोंइती जाक्शा, नेल्ल ठीक सेल्ब। मिनु रागीम जरमेशो श्येत जाइब नु महिक्सीशो दुम्ब, दे ब्रेक्शो बाक्बा, ममाइ ङा? मलाकी ३:१३; यसैया ५३:३-५
13एलीया ङोंइती जाक्त। मिनु आ पर्बम ङोंइती ब्रेक्शो खोदेंशो दुम्शा, मेको कली मार पचा दाक्तमे, मेको पाम्तेक्म” दे शेंदीमी बाक्त। मत्ती ११:१४; १राजा १९:२-१०
14मिनु अरु शेंसीब आन बाक्तीकेमी लेश्शा जाक्शा, शुश मुर देल्शो नु सास्त्रीपुकीमी लीशो शेंसीब आन कली लोव़ हिल्लो पशो तामे बाक्त।
15मिनु देल्शो मुरपुकीमी येसु कली तशा, छक लाक्शा, दोरशा पिशा, येसु कली सेउ पदमे बाक्त।
16मिनु येसुमी “मेकोपुकी नु मार लोव़सी पनी” दे हिल्लो पवानु,
17देल्शो मुर आन दाते ङा कामी “ए शेंब, आं तौ एक चाक्ता, मारदे हना वोलमी तशा, लाटा दुम्शो बाक्ब।
18वोलमी सुमानु, गोल्ब। आ शोव़ रे बोग्यो ग्रुंइब। आ ख्रुइ शेप्ब। मिनु आ रां मदुक्ब दुम्ब। इन शेंसीब आन कली ‘वोल ग्रुंइदीन’ दे पुंइता, तन्न वोल ग्रुंइने मचबेम” देंमाक्त।
19मिनु येसुमी “गे थमा पा थमा मसुइक्बपुकी, गेना सम्म गेपुकी नु बाक्नुङा ङा? ओदेंशो इन पशो गेना सम्म फाल्शा बाक्नुङा ङा? रोइ पाइब कली चाक्कीन” दे माइक्मी बाक्त।
20मिनु वोंइश आल कली येसु आ ङोंइती चाक्ग्मे बाक्त। मिनु वोलमी येसु कली तवानु, आल तिङ गोल्शा, रोम्सीशा, आ शोव़ रे बोग्यो ग्रुंइदा बाक्त।
21मिनु येसुमी आ आफ कली “गेना रे ओदेंशो दुम्शो?” दे हिल्लो पवानु, आ आफोमी “आइक्च रेन,
22एको वोलमी साइक्चा कली मीमी दुप्पदानु, ब्वाक्कुमी ग्रुम्पदानु, शुश खेयप हेर हेरा बेक्त। गे मारेइ पने चाप्नीनी हना, शिशी पा एको श्येत जचा रे प्रोंइयीकी” देंमाक्त।
23मिनु येसुमी “गे मारेइ पने चाप्नीनी कों देंनीनी। तन्न सु सुमी गेन चाप्नीनी देंशा, थमा सुइक्नीमी, मेकोपुकीमी आन पुंइशो ताइनीम” देंमाक्त।
24मिनु आल आ आफोमी “थमा सुइक्ता, आं थमा मसुइक्ब थुं कली थमा सुइक्पतीने” दे थुं खाइश्शा, ङाक्शा देंमाक्त।
25मिनु येसुमी शुश मुर आन कली एर ओंथ रे जाक्शो तशा, ग्रांग्रा दिचा ङा वोल कली “गे लाटा नु नोफा मनेंब वोल, गेनायो लेंशा मओव़चा ङा पा ग्रूशा लावो” दे हुइश्शा, खेरा बाक्त।
26मिनु वोल वाइ ब्रेश्शा, आल कली रोप्पाइश्शा ग्रूमाक्त। मिनु आल बेक्शो खोदेंशो दुम्माक्त। मुरपुकीमी “बेक्त” देंमा बाक्त। मर्कूस १:२६
27मिनु येसुमी आल आ गुइ ग्याइश्शा पोक्गानु, राम्माक्त।
28मिनु येसु नु आ शेंसीबपुकी खिं लमा बाक्त। मिनु शेंसीबपुकीमी “मारदे मेको वोल कली ग्रुंइने मचाप्का?” दे हिल्लो पामे बाक्त।
29मिनु येसुमी “ओदेंशो वोल कली प्रार्थना पशा ला ग्रुंइने चाम्सीब” दे माइक्मी बाक्त।
30मिनु मेकोपुकीमी “इं गाक्शो सुइम मतुइक्तमेक्ल” दे गालील लां पा गाक्मा बाक्त।
31मारदे हना आ शेंसीब आन कली “रागीम जरमेशो दा मुर आन गुइमी गेशा, साइक्चा पुंइसीशा, आ नित्थ नाक्ती बेक्शो रे सेंसीब” दे शेंचा दाक्ता बाक्त। मर्कूस ८:३१; मर्कूस १०:३२-३४
32शेंसीबपुकीमी चहिं आ शेंशो मरुप्मे बाक्त। मिनु हिल्लो पचा यो हिंमा बाक्त। लूका १८:३-४