MAREK 7:18-34

¹⁸A phenďa lenge: “So aňi tumen na achaľon? Na achaľon, hoj ňič, so avel avral a džal andro manuš, les našťi meľarel?

¹⁹Bo oda na džal andre leskero jilo, ale ča andro per a paľis džal avri.” Aleha o Ježiš phenďa, hoj dojekh chaben hino žužo.

²⁰A phenďa: “Oda, so avel avri andral o manuš, oda les meľarel.

²¹Bo andral o manuš – andral leskero jilo – avel nalačho gondoľišagos, te kerel lubipen, te murdarel, te čorel,

²²te pašľol avre romňenca, te kamel o barvaľipen, o nalačhipen, te klaminel, ňisostar pes te na ladžal, te zavidzinel, te ruhinel pes, te el barikano a te kerel o diliňipen.

²³Savore kala nalačhe veci aven andral o jilo a meľaren le manušen.”

²⁴Ušťiľa a geľa odarik paš o fori Tir the Sidon. Geľa andro kher a na kamľa, hoj pes ada vareko te dodžanel, ale našťi pes garuďa.

²⁵Takoj šunďa pal leste jekh džuvľi, sava sas čhajori, andre savi sas nalačho duchos. Oj avľa a peľa paš le Ježišoskere pindre.

²⁶Sas Grekiňa a sas andral e phuv Fenicija andre Sirija. Mangelas les, hoj te tradel avri le demonos andral lakeri čhajori.

²⁷Ale o Ježiš lake phenďa: “Domuk, hoj ešeb (peršo) te čaľon o čhave, bo nane šukares te lel le čhavenge o maro a te čhivel les le rikonorenge.”

²⁸Ale oj leske odphenďa: “He Rajeja, ale the o rikonore chan telal o skamind o trušini, so peren le čhavendar.”

²⁹Phenďa lake: “Vaš oda lav, so phenďal, dža! O demonos imar geľa avri andral tiri čhaj.”

³⁰Sar geľa andre peskero kher, arakhľa peskera čhajora te pašľol pro haďos a o demonos imar geľa andral late avri.

³¹Paľis geľa het pašal o Tir prekal e phuv Sidon. A odarik geľa pašal e phuv, so pes vičinel Dekapolis, ko Galilejsko moros.

³²A ande ke leste manušes, savo sas kašuko the igen šepetľivo, a mangenas les, hoj te thovel pre leste o vasta.

³³O Ježiš les iľa pašal o nipi sikra dureder, thoďa peskere angušta andre leskere kana, čhungarďa a dotkňinďa pes leskera čhibatar.

³⁴Paľis dikhľa pro ňebos, pharipnaha peske vzdichňinďa a phenďa: “Effatha!” So hin: “Phundrav tut!”