San Marcos 7:18-34

¹⁸Jesús gudxëꞌ lequëꞌ: ―¿Ryadzjtsa caꞌ queëliꞌ yöl‑laꞌ rejniꞌi? ¿Naruꞌ cu réjniꞌiliꞌ, yúguꞌtë le ryaz bönniꞌ, cutu gac gun ga cunaquëꞌ dxiꞌa lahuëꞌ Dios?

¹⁹Nac cni le cutu ryaz icj ládxiꞌdauꞌhuëꞌ, san lëꞌëzëꞌ ryaz, len rurúj lëꞌë. Le gnëꞌ cni Jesús, buluiꞌinëꞌ rëꞌu nac dxiꞌa yúguꞌtë le riꞌj ráguruꞌ.

²⁰Gnëꞌ caꞌ Jesús: ―Le r‑ruj bönniꞌ run ga cunaquëꞌ dxiꞌa lahuëꞌ Dios.

²¹Cni nac, le taꞌrúj icj ládxiꞌdauꞌquëꞌ bönniꞌ yuguꞌ le taꞌzáꞌ ládxiꞌquëꞌ le nac xöhuiꞌ, yuguꞌ le tun ga tunëꞌ dul‑laꞌ taꞌguitsjëꞌ zxba qui yöl‑laꞌ nutság naꞌ len yuguꞌ le cunác. Tun ga tuꞌdöddëꞌ bunách

²²len taꞌbanëꞌ, len taꞌzë́ ládxiꞌquëꞌ le dë qui lzaꞌquëꞌ, len tuꞌë döꞌ, len taꞌzíꞌ yëꞌë, len tuꞌzxë́ꞌë, len taꞌnë́ꞌ qui lzaꞌquëꞌ, len tun ba zxön cuinquëꞌ, len tunëꞌ le cunözi.

²³Yúguꞌtë le xöhuiꞌ cni taꞌrúj icj ládxiꞌdauꞌhuëꞌ bönniꞌ len tun ga cunaquëꞌ dxiꞌa lahuëꞌ Dios.

²⁴Buzë́ꞌë niꞌ Jesús, bdxinëꞌ gal‑laꞌ ga nacuáꞌ yödz Tiro len yödz Sidón. Niꞌ gyaziëꞌ tu yuꞌu len guꞌnnëꞌ nutu nu gnözi, san cutu caꞌ guc ucachiꞌ cuinëꞌ.

²⁵Byö́ninu didzaꞌ rzë ca nac queëꞌ Jesús ngul, zoabiꞌ biꞌi nguldauꞌ queënu, yuꞌu lëbiꞌ böꞌ xöhuiꞌ, atiꞌ laꞌ bídtënu ga zoëꞌ Jesús, len buzechu zxibnu xniꞌë.

²⁶Ngul ni cutu nacnu judío, san nababnu bunách Sirofenicia. Gútaꞌyunu lahuëꞌ Jesús ubijëꞌ böꞌ xöhuiꞌ naꞌ yuꞌu‑biꞌ biꞌi nguldauꞌ queënu.

²⁷Niꞌr gudxëꞌ‑nu Jesús, rnëꞌ: ―Bëꞌ latj luhuö́lj ziꞌal nup nacgac ca zxiꞌn xan yuꞌu, le cutu nac dxiꞌa uguaruꞌ yöt quecbiꞌ biꞌi naꞌ len chuꞌnruꞌ lei laucbaꞌ bö́ꞌcuꞌdauꞌ.

²⁸Bubiꞌinu didzaꞌ ngul naꞌ, gudxnu Jesús: ―Ja, Xan, san yuguꞌ bö́ꞌcuꞌdauꞌ nacuaꞌbaꞌ zxani ga tágubiꞌ, tágubaꞌ le bizxj tuꞌhuö́xj ga naꞌ tágubiꞌ.

²⁹Niꞌr gudxëꞌ‑nu Jesús, rnëꞌ: ―Le gnauꞌ cni, huac huöjuꞌ. Chburúj böꞌ xöhuiꞌ naꞌ gyuꞌu‑biꞌ biꞌi nguldauꞌ quiuꞌ.

³⁰Catiꞌ budxinnu lidxnu, bléꞌinu‑biꞌ biꞌi nguldauꞌ queënu naꞌ, dëbiꞌ lu daꞌa len chnurúj böꞌ xöhuiꞌ naꞌ gyuꞌu lëbiꞌ.

³¹Burujëꞌ Jesús latj naꞌ nabáb yödz Tiro atiꞌ gdödëꞌ gap dë yödz Sidón len yuguꞌ yödz Decápolis, bdxinëꞌ raꞌ nis zxön qui Galilea.

³²Bunách niꞌ djuaꞌgac ga zoëꞌ Jesús tuëꞌ bönniꞌ nacödzuëꞌ len curnë́ꞌ, táꞌtaꞌyuëꞌ lahuëꞌ Jesús gxoa nëꞌë lëꞌ.

³³Bubijëꞌ lëꞌ tslaꞌl Jesús ladj bunách naꞌ, atiꞌ bnëꞌë xbönniꞌ nëꞌë yeru naguëꞌ bönniꞌ naꞌ. Gruꞌnëꞌ zxö́naꞌdauꞌ len gdanëꞌ ludxëꞌë.

³⁴Niꞌr buyúëꞌ luzxbál len gnë ladxëꞌë, rnëꞌ: ―Efata. Didzaꞌ hebreo ni rna lu didzaꞌ xidzaꞌ: “Gyalj”.