Maleko 7:18-34

¹⁸Yesu alinadi ya bui iyen, Umi hola ma nuwa supusupumiu! Sidohana be hige au nuwatuhu lobahi? Hige somo ganamuli yai i luhulau doga ganahewana haba i fabida,

¹⁹paꞌana ya lau boga yai moho be ya kalamahano fuyo. Hige i luhulau nuwanuwana. (Liba te debana yai Yesu iyen, “Kalahe mahudoꞌidi ibege ti fabidaheda.”)

²⁰Na hinaga ya liba iyen, Somo doga ganahewana yai ya hala liwaꞌen mate logena ya fabida.

²¹Paꞌana doga nuwana ganahewana yai, be nuwatuhu heyaheyayadi sa kalamahano doha: nuwatuhu heyaheyayadi, luma gwaꞌu hudoꞌi - hudoꞌi, angafu, aiyunu, doga hesa lahuna maꞌena sa luma gwaꞌu,

²²anduma, laulau heyaheyaya, laulau bwalabwala, luma gwaꞌu nuwanuwatuhudi, nuwa elaꞌela, lau mwanunu, nuwa saesae, yo nuwatuhu yauyaule–,

²³Ginauli heyaheyayadi mahudoꞌidi te, mate ganahewadi yai sa laoma be sa fabidaheda.

²⁴Galili nuꞌuna Yesu ya lau afulen na ya leu Taya nuꞌuna. Ya mahano lau mate ya lau luma hesa ganahewana paꞌana hige i fanuha bena sai i sibai mate in amainiya. In moho hige gonowana i miya alasimo.

²⁵Yaluwa heyaheyayana mate waihin hesa, natuna waihin ganahewana yai. Waihin wasa ya atahiyen mate Yesu ya laoma, yo fede ya lau be ya hoba lidi ahena yai.

²⁶In mate Giliki Waihinina Fonika Nuꞌuna yai ya tubu, Siliya ganahewana yai. Yesu ya anꞌetai bena yaluwa heyaheyayana natuna ganahewana yai ya liba dui.

²⁷Yo fede Yesu iyen, Hola wawaya ti kalahe bwaꞌi! Hige i loholoho bena wawaya adi kalahe ta peidi be ꞌwayowa ti anidi.

²⁸Waihin Yesu alinana ya bui, iyen, Baꞌisa, wawaya adi mapula tebolo ubuna yai haba ꞌwayowa sa anidi!

²⁹Yo fede Yesu ya libalau waihin lisina iyen, Em bui ni debana yai u fuyo em luma, haba wa fawananaha mate yaluwa heyaheyayana natum ganahewana yai haꞌa ya kalamahano.

³⁰Ya mahano fuyo mate natuna ena aba laulau eno yai Yaluwa heyayana haꞌa ya lau afulen.

³¹Taya Nuꞌuna Yesu ya lau afulen na ya lau Sidon be Dekapolisi edaꞌedana ya lau watan ya lau Galili Gabogabona.

³²Amainiya taumoho hudoꞌi beya tuituina yo libaliba gesana dodoga sa leyama lisina. Yesu sa anꞌetai bena nimana ya tole lawen ai hewana.

³³Yo fede dodoga pwaludi yai, ya foya hudoꞌiyen be nimana gigidi ya tole lawedi beya sogona yai. Habahim ya kaniso na ya abilau lelona yai.

³⁴Na Yesu ya itaꞌita hasa galewa yo fede ya nahasi iyen, Haa–, Efata! (Diusi alinadi yai, aniyona mate “Beyam ti taꞌafasi!”)