Maku 7:18-34

¹⁸Mame tozuhse toto eya, —Amarokõ roropa onenetupuhpyra matou? Etatoko pahne, emero otyro enapyryhtao oya xine iirypyryme rito pyra mana.

¹⁹Waku aka rokẽ tykyrysã omõnõko mana. Yrome kuzenukõ aka omõpyra mana. Mame wekanohtao tũtãko ropa mana, tykase ynororo. (Morara exiryke emero tõsẽ kure Jezu omi poe.)

²⁰Morarame tõturuse ropa ynororo eya xine. Ynara tykase ynororo, —Okurohtao xine popyra awahtao xine iirypyryme exĩko matose.

²¹Ynara exiryke, tukurohtao xine iirypyryme epohnohketõ popyra exĩko roropa mana. Ematonãko te, karimotãko te, imehnõ pyty poko exĩko te,

²²imehnõ mõkomory poko typenetarykõ poko te, imehnõ ryhmary poko te, imehnõ enekunopyry poko te, typenetatoh xihpyry poko te, imehnõ zumoxike exiry poko te, imehnõ kerekeremary poko te, tõsenetaonopyry poko te, ajoajohpe toexirykõ poko, enara.

²³Morohne tũtãko mã okurohtae xine. Naeroro iirypyryme exĩko matose, okurohtao xine popyra oepohnopyrykõke, tykase Jezu eya xine.

²⁴Morotoino toytose ropa ynororo Tiro ehpikoxi, Xitõ ehpikoxi roropa. Mame tapyi taka tomõse ynororo tokare pyra repe. Yrome otõnẽsaromepyra kynexine ynororo.

²⁵Morarame nohpo tooehse Jezu a. Tosekumuru po typorohse ynororo nono pona, Jezu ẽpataka, Jezu ekary totase tyya exiryke.

²⁶Mokyro nohpo ẽxiry jorokohpe kynexine. Juteukara kynexine ynororo, Xiro Penixiapõ kynexine, —Joroko itũtanohpoko ropa jẽxiry ae, ajohpãme samo, tykase ynororo Jezu a.

²⁷Morarame Jezu a tozuhse, —Ah poetohti tõ osemazuhme notuhno. Popyra mã kaikuxi zopary poetohti zoh ke, poetohti otuhpyra ro ahtao, tykase ynororo nohpo a.

²⁸—Ajohpe pyra mase Tamuxi. Kaikuxi sã ynanase katohto. Morara exiryke poetohti napyry akumuru eraximãko sã ynanase, tykase, nohpo a tozuhse.

²⁹Mame tõturuse ropa Jezu eya, —Kure kuezuhno kuku. Morara tykase oexiryke ytoko ropa atapyĩ taka. Oẽxiry ae joroko tutũtanohpose ropa mana, tykase Jezu eya.

³⁰Mame tytapyĩ taka toytose ropa nohpo. Tõxiry tonese, tohrame nyhtoh po. Pake joroko tutũtanohpose ropa zae.

³¹Morarame toytose ropa Jezu Tiro ehpioino Xitõ poro, Karirea kuaka, ikuhpo kuaka. Tekapori rãnakuroko toytose ynororo, omame porehme pata rãnakuroko.

³²Mame Jezu a typanarẽ kara tonehse imehnomo a. Pusopusome roropa tomire kynexine, —Mose apoko ajohpãme samo, aekurãkatohme ropa, tykase toto Jezu a.

³³Morarame kurãkara arone myahxo. Morarame tomary tõmase ipanary aka. Ituh tykase roropa ynororo. Moromeĩpo inuru tytemuhmase tomary ke.

³⁴Mame kakoxi tõsenuhmase ynororo. Pusuh tykase. Mame ynara tykase ynororo kurãkara a, —Otato exiko, tykase eya.