Mak 7:18-34

¹⁸Qesigetka kewö jii mötket, “O alaurupni, iŋini mewöyök mötmötŋini ölöpŋi qahö akze me? Nene yuai azi yaigepŋeyök uruŋe gemakzawi, mi tölohom waŋgimamgö osimakza. Mi möt kutuze me qahö?

¹⁹Mi urukönömŋe qahö gemakzapmö, kömgokŋe geba yaigep erakza.” Jisösnöŋ keu mewö jiba miaŋön “Numbu nene pakpak mem sarahim teköyök.”

²⁰Jisösnöŋ toroqeba kewö jiyök, “Azi urukönömŋeyök keu kota erakzawi, miaŋön mönö tölohom waŋgimakza.

²¹Ambazip uru könömŋineyök yuai kewöŋi asuhuba korakza: Keu bölöŋi mötmöriba serowilin akingö mörakze. Yoŋgorö memba suŋa jinaŋ memba ambazip eŋguget kömumegö mörakze.

²²Qesabulum akingö mörakze. Membagu membingö nepaqepalok köpösöŋgömakze. Bidaŋda gatmisimisi, jiliwitiŋ aka isimkakalek akingö mörakze. Lösö jiba urupik akingö mörakze. Kezapjupjup aka körögisigisi akingö mörakze. Söŋgöröqök mala andöqeqe keu yöhösaŋ jiba Anutu mepaiköbingö mörakze. Jakbak-öraŋböraŋ aka uruqahö ahakze.

²³Yuai bölöŋi pakpak miaŋön mönö ambazip uru könömŋineyök kota ambazip tölohom eŋgimakza.” Mewö.

²⁴Jisösnöŋ wahöta Genesaret gölme mosöta siti qetŋiri Taiö aka Saidon mietkö distrik qetŋi Fonisia miaŋgö uruŋe anök. Anda miri kunöŋ öŋgöba buzupŋi kunŋan mötpapuköra numbuŋini muhungöyökmö, töndup tölapŋe malmamgö osiyök.

²⁵Osiiga miaŋgöreŋök ambi kun böratŋi moröŋan ömeŋambuk maliga Jisösgö buzupŋi möta yaŋgöreŋ kaba könaŋe geba simin kölök.

²⁶Ambi mi Judaya qahöpmö, Grik keu jiba malök. Iwinamŋan Siria prowinsgö Fonisiagöra. Yaŋön böratŋaŋgö uruŋeyök öme közölmapköra ulet waŋgiyök.

²⁷Ulet waŋgiiga kewö jii mörök, “Juda nini mutuk nanine nahönböraturupnini gumohom eŋgiinga bikŋi eŋguma. Miaŋgöra morö yeŋgö miriŋineyök beret memba kiam eŋgiinga qahö dop kölbapuk. Juda nini kianurup eŋgö qetŋini kiam qerakzin. Nöŋön mutuk Juda ambazip bauköm eŋgibiga kantri tosatŋi eŋön mönö kiamgö dop mamböta malme.”

²⁸Mewö jii möta kewö meleŋnök, “Kembu, mi ölöp mötzalmö, kiam moröŋi yeŋön mönö mewöyök morö yeŋgöreŋ nene boromŋi tebol bapŋe eriga nemakze.”

²⁹Mewö meleŋniga Jisösnöŋ kewö jii mörök, “Keu mewö jizanaŋgöra ölöp möt gihizal. Öme miaŋön mönö dölki böratki mosöta anja. Miaŋgöra ölöp anman.”

³⁰Mewö jii möta miriŋe ani ömenöŋ böratŋi mosöriga dumŋe ahöiga ehök. Mewö.

³¹Jisösnöŋ kunbuk Taiö siti gölme mosöta Saidon sitinöŋ anda oŋgita mösököba Ten-taon gölmegö bibiŋi oŋgita Galiligö o aŋgö kösutŋe kayök.

³²Kaiga kezapduhup azi kun keuŋi qahöwakŋapköra ahöhi, mi waŋgita Jisösgöreŋ kaget. Kaba böröŋi nöröpŋe almapköra qesim waŋgiget.

³³Qesim waŋgigetka azi mi waŋgita ambazip kambu mosöta kungen anohot. Anda Jisösnöŋ börö suapŋi kezapŋe ala kinda kunbuk nanŋi börö suapŋe söutköba nesilamŋe misiriyök.

³⁴Misiriba suepnöŋ ui öŋgöiga osoŋgombuk köuluköba nanŋe keunöŋ “Efata,” nanine keunöŋ Tohonöŋ! mewö jiyök.