Marka 7:18-34

¹⁸O wii ɓe: —Onon duu, eɗum finkinii on naa? On paamaali ko iwata sella so naata e hunduko neɗɗo koo, soɓintaa joomum?

¹⁹Sabi ɗum naataali e ɓernde joomum, e reedu mum naati, kasen duu ɗum yaltan. Ɗii haalaaji Iisaa daginirii ɲaamdu fuu.

²⁰O wii kasen: —Ko yaltata e ɓernde koo, ɗum soɓinta neɗɗo.

²¹Sabi e ɓernde neɗɗo miilooji bonɗi iwata so ndunƴa ɗum e faasigaaku e nguyka e ɲaako'aaku e

²²jeenu e joote e comndam e jammba e somburaaku e haasidaaku e mbonka e mawninkinaare, kaɲum e majjere.

²³Ɗeen geɗe bonɗe fuu e ɓernde iwata, kasen duu kaɲum'en coɓinta neɗɗo.

²⁴Iisaa iwi ɗon fa'i leydi Tirus. O jippii e galle gooto. O yiɗaano fay gooto humpitoo omo ton, kaa o waawaano suuɗaade.

²⁵E ley ɗum, debbo gooto mo ɓinngel mum dewel laddaa, nani haala makko ana haalee, heɲanii mo sujidi yeeso makko.

²⁶Oon debbo wanaa Yahuudiyanke, o leɲol Sirifenisi'en. O ɲaagii Iisaa itta ladde ndee e ɓiyiiko oo.

²⁷Kaa Iisaa wii mo: —Accu sukaaɓe ɓee kaara tafon. Sabi ɓamde ɲaamdu sukaaɓe so tippoo dawaaɗi moƴƴaa.

²⁸Debbo oo jaabii, wii mo: —Goonga, Moobbo, kaa fay dawaaɗi minotooɗi ɗii ana ɲaama ɲaamdu sukaaɓe iwooru e la'al so saama nduu.

²⁹E oon wakkati, Iisaa wii mo: —Saabe oo jaabu, hootu, ladde ndee yaltii e ɓiya oo.

³⁰E ley ɗum, o hooti, o tawi ɓiyiiko oo ana lelii dow leeso, ladde ndee yaltii e mum.

³¹Iisaa iwi leydi Tirus, wardi leydi Sidon, tacciti leydi ndi geelle sappo ndii, warti weendu Galili.

³²O waddanaa gorko paho mo haala mum laaɓaa, o ɲaagaa o fawa junngo makko e dow mum.

³³E oon wakkati, Iisaa woɗɗintini mo jamaa oo, waɗi peɗeeli mum e noppi makko, sirƴi, memiri cirƴe ɗee ɗemngal makko.

³⁴Caggal ɗum, o tiggitii kammu, o uumi, o wii paho oo: —Efata! (Ɗum woni: «Sukkita!»)