Maleko 5:20-36

²⁰Yo fede doga wa ya aulaha ya lau Dekapolisi Nuꞌuna yai be somo Yesu ya ginauli lisina yai ya falibadi. Salumadi sa atahiyen mate sa noꞌo.

²¹Waga yai Yesu sa dohe be sa mahano yo fede baiwa sa faꞌoigogon.

²²Aba oiꞌoigogo baꞌisana hesana Diyailusi ya mahanoma Yesu ya ita yo fede ya hoba lidi ahena yai.

²³Ya anꞌeta gadogadola lau lisina iyen, Natugu waiwaihin mate nuꞌanuꞌana. Te lau be wa abilau ai tauna haba ya loholoho!

²⁴Yo fede Diyailusi maꞌena Yesu sa lau. Dodoga mate sa faipapipapi na sa laulau watanidi.

²⁵Waihin hesa ana asiyebo mate ꞌwasina ya miyamiya afulen ee–, bolima safuhudohudoꞌi luwaga.

²⁶Doketa boludi fuya lofalofa edi mulamula yai sa fafakamkamna. Ena moni mahudoꞌina ya pei faꞌofi bena haba loholoho ya lobahi. In moho ana asiyebo ya fafalaꞌi.

²⁷Yesu wasana waihin wa ya atahiyen be nuwana yai iyen, Ibe ana luhuluhu moho E abiꞌona haba E loholoho. Yo fede Yesu mulina yai ya laoma be dodoga pwaludi yai ya andudu balabala be ana luhuluhu ya abiꞌona.

²⁹Amna ya atahi mate ꞌwasina ya miyamiya afulen ya fatautau yo ena kamkamna wa ya ofi.

³⁰Yesu amna ya abi mate gigibwali ya lau afulen. Yo fede baiwa ganahewadi yai ya timuli bui be ya fatiꞌo iyen, Sai agu luhuluhu ya abiꞌina?

³¹Tau anpate alinana sa bui tiyen, Baiwa haꞌa wa ita, na sidohana be uwen, “Sai ya abiꞌinagu?”

³²Yo fede Yesu ya itaꞌita asiꞌasi be tau abiꞌinana ya yoꞌoi.

³³Waihin asiꞌasiyebona somo lisina yai ya tubu ya sibai yo fede ma ꞌwasabuna ya laoma be ya tulibono ahena yai na ya faliba dudulain.

³⁴Yesu iyen, Natugu, nuwam i amna! Em kawawananaha debana yai asiyebona ni, ibege u abi fuyoi.

³⁵Yesu hola waihin asiꞌasiyebona ya fafaliba na Diyailusi ena luma yai dodoga sa laoma be aba oigogo baꞌisana sa faliba tiyen, Natum haꞌa ya peꞌi. Tabu u modemode lau tanuwaga lisina.

³⁶Sa libaliba, Yesu ya atahi yo fede iyen, Tabu u ꞌwasabu! U kawawananaha moho.